Aalisartut marluk Ilulissani annanneqartut
Aalisartut marluk annanneqarput Ilulissat kangerluanni sikunit nikeriarfissaarutsinneqarnermik kingorna
SAR-imi sillimaniarnermik isumaqatigiissut nutaaq atuutilersorlu sapaatip akunnerata siuliani tallimanngornermi SAR-imik annaassiniarneq siulleq ingerlanneqarpoq, qulimiguulik S-61 atorneqarpoq Ilulissat kangerluani aalisartut marluk imaanit annanniartariaqalermata.
Aalisartut marluk 42-nik aamma 69-inik ukiulik kangerlummut pulasimapput kingornali sikunit anillariaqqissinnaajunnaarlutik.
Aalisartut namminneq radiortik atorlugu ikiorneqarnissamik kalerrisaarisinnaasimapput qanittuannili angallateqanngimmat aalajangiisoqarpoq SAR-imik aannaassiniarneq ingerlanneqartariaqartoq taamaammallu Kangerlussuarmit S-61 ikiuukkiartortillugu aallartinneqarluni, Qaasuitsup Kommuniani politiit immikkoortortaanit Leo Thelin nalunaarpoq.
Annaassiniarneq pilersaarutit naapertorlugit ingerlanneqarpoq, politiit, Ilulissani napparsimmavik, Issittumi sakkutooqarfik aamma Aasiaat Radio ikioqatigiillutik. Qulimiguulik Ilulissanut nal. 20.11 apuuppoq minutsit 20-t qaangiummata aalisartut ajunngitsut nunamut apuullugit.
- Aalisartut nunamut pigamik ajunngillat annanneqarnertik nuannaarutigalugu, Leo Thelin Sermitsiaq.AG.-mut oqaluttuarpoq.
Aalisartut angallatiminnik ammaanartunik kangerlummut qimatsiinnartariaqarsimapput kisianni politiit naalagaasa oqaatigisinnaanngilaat umiatsiaaqqat qanoq pisimassanersut.