Aallartitaqarfiit ilinniartussarsiortut
Nunarsuaq nunani allaniikkiartornernut praktikkernissamullu periarfissani maannakkorpiaq matoqqasorinaraluartoq siunissami isumalluarnartoqarpoq. Sverigemi, Finlandimi, Norgemi Canadamilu aallartitaqarfiit maannakkorpiaq Issittoq pillugu immikkut ilisimasalinnik ilinniartussarsiorput
Danmarkip Finlandimi, Norgemi, Sverigemi aamma Canadami aallartitaqarfii 2021-mi upernaakkumiit praktikkertussarsiorput Issittumi, Kalaallit Nunaanni Savalimmiunilu pissutsinik immikkut ilisimasaqartunik.
Piukkunnartussarsiarineqarsinnaassagaanni naalagaaffeqatigiinnerup iluanit kandidatinngorniartuusariaqarpoq imaluunniit nunanit allanit kandidatinngorniartuusariaqarluni naalagaaffeqatigiinnerup iluani ilinniarfimmi ilinnuartutut allatsissimasoq. Aallartitaqarfinni praktikkertutut suliassat tamatigoortutut oqaatigineqarput imaqarlutillu misissueqqissaarnernik, innuttaasut saaffiginnissutaasa akissuteqarfigineqartarnerannik, ataatsimiinnernut peqataanernik kiisalu nalunaarusianik allakkianillu suliaqarnernik. Atorfik Issittumut immikkut sammiveqassaaq, naalagaaffeqatigiillu Issittumut politikkiannik pingaarnersiuinerannillu ilisimasaqarluarnissaq iluaqutaassalluni, atorfinnik allagarsiussani atuarneqarsinnaavoq.
Suliassat allat sammineqartussatut qilanaarineqarsinnaasut tassaapput Public Diplomacy, attaveqaqatigiinneq kulturilu. Attaveqaqatigiinnermik suliassani pineqarputavammut aallartitaqarfiit ingerlatseriaasiat SoMe aqqutigalugu attaveqarneq, Danmarkip naalagaaffeqatigiillu Finlandimi, Norgemi, Sverigemi Canadamilu soqutigisaannik siuarsaanissaq siunertaralugu. Tamatumunnga atatillugu ilinniagaqartoq nunani aallartitaqarfiusuni niuernermik allaffinnik aamma suleqateqassaaq.
Angalaqatigiinnik tikeraartoqartarnera attaveqaqatigiinnerlu
Qallunaatut tuluttullu allassinnaaneq, atuarsinnaaneq paasisinnaanerlu piumasaqaataapput. Norskisut svenskisullu oqaatsinik paasinnilluarsinnaaneq aamma pingaaruteqarpoq aallartitaqarfiit nunani taakkunani marlunni avammut attaveqarnerannik isumaginnissinnaanissamut. Kalaallisut Savalimmiormiutullu oqaatsinik ilisimasaqarneq iluaqutaassaaq. Taamatuttaaq nittartakkanik inuit attaveqatigiittarfiinik onlinemillu attaveqaqatigiinnermik ilisimasaqareertariaqarpoq.
Praktikkertutut Finlandimi, Norgemi, Sverigemi Canadamilu naalagaaffeqatigiit soqutigisaqarfiinut atatillugu aningaasaqarnikkut politikkikkullu ineriartornerup malinnaaffiginissaa periarfissaqarfigineqassaaq. Taamatuttaaq Danmarkimit angalaqatigiinnik nunanut tikeraartoqarnissamut piareersaanerit akuuffigineqartassapput. Aallartitaqarfinni suliassat tamalaat nalinginnaasumillu suliassat aamma peqataaffigineqassapput.
Ilinniartitaaneq pillugu sammisami allaaserineqartoq tamakkiisumik atuarneqarsinnaavoq. Aviisi akeqanngitsumik uani aaneqarsinnaavoq