Aallartitat 30-t sinneqartut nunatta aatsitassaanik soqutiginnittut
Aatsitassanut Naalakkersuisoq Københavnimeeqqammerpoq ilaatigut nunatsinni aatsitassat pillugit paasissutissiiviusumik ataatsimeeqatiginnikkiartorluni. Aallartitat 30-t sinneqartut nunarsuarmit tamarmeersut ataatsimiinnermut peqataapput.
Nalunaarusiami nutaami Nordisk Ministerrådip ataaniittumit Nordisk Innovationimit saqqummiunneqaqqammersumi, Kalaallit Nunaata ilarujussuani aatsitassanik annertuunik peqartoqarnera takutinneqarpoq. Naaja Nathanielsen Københavnimeeqqammerpoq ilaatigut pineqartoq pillugu paasissutissiiviusumik ataatsimeeqatiginnikkiartorluni. Uranimik piiaanissap inerteqqutaanera novembarimi akuersissutigineqaraluartoq soqutiginninneq annertuvoq.
- Qallunaat Nunaanni sinniisoqarfipput suleqatigalugu aamma aallartitanut arlalinnut Kalaallit Nunatsinni aatsitassanik periarfissarujussuit pillugit paasissutissiiviusumik ataatsimeeqatiginnittoqarpoq. Soqutiginninneq annertuvoq, nunallu assigiinngitsut 30-nit amerlanerusut aallartitaat peqataapput. Naalakkersuisut tusagassiuutitigut nalunaarummi paasissutissiipput.
Nuna tamakkerlugu aatsitassaqarpoq pissarsiariuminaatsutut pisariaqarluinnartutullu oqaatigineqartunik, taakkualu taama nalilerneqartarput, pilersuinermi annertuumik nalorninaateqarmata, aamma aningaasaqarnermut, periutsinut inuiaqatigiinnullu pingaaruteqarmata.
- Mingutsitsinngitsunut ikaarsaarnermi peqataarusukkutta suliassat suut suliarissagivut nunat avannarliit qanimut suleqatigiinneranni qulaajaavigineqarpoq. Tassani aatsitassarsiortut atugassaannik ujarassiornermi paasissutissanik nutaanik pissarsiniarluta sulinitta nanginnissaata pisariaqassusaa uppernarsarneqarpoq, taamaalilluni aatsitassat pissarsiariuminaatsut pisariaqartinneqartulli Kalaallit Nunaannit nunarsuup sinneranut mingutsitsinngitsumik nukissiornermut anngussinnaaqqullugit, Aningaasaqarnermut, Aatsitassanut, Inatsisit atuutsinnerannut Naligiissitaanermullu Naalakkersuisoq Naaja H. Nathanielsen oqarpoq.
Naalakkersuisut naapertorlugit, nunat avannarliit aatsitassanut tunngasuni suleqatigiinnerisa qanoq annertusarneqarsinnaaneranut tunngasunik nalunaarusiami aamma arlalinnik kaammattuuteqarpoq.
Aatsitassat pissarsiariuminaatsut, Kalaallit Nunaat tamakkerlugu nassaassaasut, ilaatigut tassaapput gallium, litium, kobolt, nikkel, kobber allarpassuillu.
Naalakkersuisut uranimik misissuinissap piiaanissallu inerteqqutaalernissaannik inatsisissatut siunnersuutaat siorna 2021-mi novembarimi akuersissutigineqarpoq. Tamanna, aatsitassanik allanik, peqarfimmi tamarmiusumi uraneqassuseq agguaqatigiissillugu 100 ppm-imit annertuneruppat, misissuinissap inerteqqutaaneranik isumaqarpoq.