misiliummik suliniut
Aappaasut nakuusertartut ikiorneqarusuttut
Isumaginninnermut Ilaqutariinnermullu Naalakkersuisoqarfik misiliutitut suliniutip Alliap, ilaquttaminnut aserorsaataasumik nakuusertartut nammineq kajumissutsiminnik katsorsarneqarnissaannik neqerooruteqartup, soqutigineqarluarneranik nalunaarpoq.
Namminersorlutik Oqartussat misiliutitut suliniutaanni Alliami nakuusertartut tallimat ikiorneqareersimapput maannakkorpiarlu aqqaneq-marluk allat aserorsaataasumik pissusilersortarnertik pillugu katsorsarneqaleruttorlutik. Soqutiginnittut katillugit 40-t saaffiginnissimapput.
Taama tarnip pissusaanik immikkut ilisimasalik Preben Svoldgaard, aapparisamut nakuusertoqartarneranik akiuiniarluni suliniummi maannamut sivikitsuinnarmik ingerlanneqarsimasumi aqutsisuusoq, oqaluttuarpoq.
Atuaruk: Nakuusertartut maanna katsorsarneqarsinnaalissapput
Ilaqutariit meerartallit salliutinneqassapput
Katsorsarneqarnerup ingerlanerani nakuusertartoq aappaasorlu tarni pissusaanik immikkut ilisimasalimmi akunnerni arfineq-pingasuni oqaloqateqartussaasarput, tamatumalu kingorna qaammatialuit ingerlareerneranni utersaartoqaqqissagaluarpat ilaqutaasut annertunerusumik ikiorneqarnissamik neqeroorfigineqartarlutik.
Ilaqutariit meerartallit tulleriiaarinermi salliutinneqartarput, akerlianilli kisermaat inuilluunniit assersuutigalugu atornerluinermik annertuumik ajornartorsiutillu allanut innersuunneqartarlutik.
- Inuit tallimat katsortillutik naammassereerput, taakkualu tamarmik katsorsartissinnaanertik nuannaarutigalugu oqaatigaat, angutinit arnanillu iluaqutaasimanera oqaatigineqarpoq. Taamaattumik maannamut oqartariaqarpugut naliliinerit pitsaasuusimasut, Preben Svovlgaard oqarpoq, katsorsaanerlu aapparisamik persuttaasarneq unitsilluinnarneqarpat aatsaat katsorsaanermik iluatsilluarsimasutut naliliiumasoq, oqarpoq.
Atuaruk: Persuttaasarneq pillugu sulisunik ilinniartitsineq
Misigissutsinik oqaluuserinninneq
Peqataasut pingaartumik pissutsit ilungersunartut oqalunnissamut taarsiullugu persuttaanermik kinguneqartartut oqaloqatigiissutiginissaannut periarfissinneqarnertik nuannaarutigaat.
- Misigissutsit aqunneqarsinnaajunnaartut pineqarput. Tamakkua ilarpassui peroriartornermi atugassarititaasunut attuumassuteqarput. Angerlarsimaffimmi nakuuserneq, imigassaq suugaluarnersumillu atornerluineq atuussimasarput. Nakuusertartunit taakkunannga inuunerup taamaaginnartussaanera ilinniarneqarsimasarpoq. Assersuutigalugu misigissutsit nuanniitsut eqqartornissaannut allanik sakkussaqaratillu periusissaqarsimanngillat, Preben Svovlgaard oqarpoq.
Allaaserisaq tamaat sapaatip-akunnerani AG-mi saqqummertumi atuaruk. Aviisi uani pisiariuk: