Aappani persuttaraa
Angut 22-nik ukiulik arfininngormat ullaakkut Nuummi politiinit tigusarineqarpoq aappaminik 22-inik ukiulimmik persuttaasimasutut
Arnaq politiinut oqaluttuarpoq angerlarsimaffimminni oqqatsillutik tillunneqarlunilu isimmitsarneqarsimalluni.
Angut 22-inik ukiulik Nuup Eqqartuussivianut arfininngormat unnukkut pisimasoq pillugu sassartinneqarpoq, aammattaarli pissutigalugu siusinnerusukkut persuttaanernik allanik sioorasaarinermillu unnerluutigineqartarsimammat.
Eqqartuussiviup akunnerni 24-ini pingasoriarlugu tigummigallagassanngortippaa, taassumali aalajangiineq Nunatta Eqqartuussivianut ingerlateqqipput, taassumalu sapaatiummat aalajangiineq attatiinnarpaa.
Nuummi politiit pisimasoq suli misissorpaat marlunngorpallu isummerfigissallugu angut eqqartuussivimmut sassartinneqaqqissanersoq, politikommissær Niels Nyvang paasissutissiivoq.
Persuttaaneq alla
Sapaatiummat unnukkut angummik persuttaasumik tigusarinneqqipput. Nalunaaqutaq 12 nalunaarutigineqarpoq arnaq 28-inik ukiulik aappaminit attorneqarsimasoq.
Taanna nujaartorneqarsimavoq, isanneqarsimalluni toqqusassineqarsimallunilu ilisimajunnaangajalluni.
Aappaa 24-inik ukiulik sapaatiummat unnukkut tigusarineqarpoq ataasinngormallu nal. 13.00 Nuup Eqqartuussiviani sassartinneqarluni.
Eqqartuussivik aalajangerpoq 24-inik ukiulik sapaatip akunnera ataaseq tigummigallagaassasoq, misissueqqittoqassammat pisimasumilu eqqartuussisoqassammat.
Unnerluutigineqartup tamanna akueraa.