Aappariinnik inuunerissaanermut kinguaassiuutitigullu ilisimatusarnermut Nuummi ilinniarfeqalissaaq
Manna tikillugu internetsikkut avataanullu ilinniariartortarnikkut aappariinnut inuunerissaanermut kinguaassiuutitigullu ilisimatusarnermut ilinniartoqarsinnaanikuuvoq. Tamatumuuna kinguaassiutit Yazmin Fox sexologskolen Nuummi ilinniarfimmik aallartitsilerpoq, tamannalu ilinniarfimmi tassani sexologitut ilinniarsimasup Salome Godtfredsen-ip nuanaarutigivaa.
Salome Godfredsen isumaqarpoq, aappariinnik inuunerissaanermik suliaqartussanik (parterapeuter) aammalu kinguaassiuutit pillugit immikkut ilisimatusarsimasunik (sexologer) nunatsinni ilinniartoqarsinnaanera maanna periarfissaalermat inuiaqatigiinnut kalaallinut pingaaruteqartumik alloriarnerusoq:
- Uanga nammineq kinguaassiuutit pillugit ilisimatusarnissara toqqarnikuuara, kinguaassiuutitigut pinerluffigitissimasut atornerlugaasimasullu ikiorusukkakkit. Inuunerminni ajoquserneqarnermikkut kingunerlutsitsisimasut ingerlariaqqinnaveertutullu inissisimasut ingerlaqqinnissaannut ikiorusukkakkit.
- Suli tamanna ingerlakkusuppara. Taamaattorli aamma ilinniarninni uannut erseraluttuinnarnikuuvoq ataatsimut isigalugu inuiaqatigiit tamatta annerusumik minnerusumilluunniit paqumisuutigeqisarput taanna pillugu ammasumik oqaloqatigiissinnaanissarput pisariaqartikkipput, taamaaliornikkullu peqqinnartumik atoqatigiittarnerneq aamma aqqutissiuuttariaqaripput, Salome Godtfredsen Sermitsiaq.AG-mut nassuiaavoq.
Paquminarluinnartutut isigisaq
Salome Godtfredsen oqaluttuarpoq, ilinniarnini aqqutigalugu paasiartuinnarsimallugu, inuiaqatigiit ataatsimut isigalugit kinguaariillu arlalippassuit ingerlanerini, atoqatigiittarneq paqumigalugu sattaasertutullusooq ingerlasimasut naggataatigullu ingerlariaqqissinnaajunnaarfimmut killissimasut, atoqatigiittarneq paquminartutut isigineqartuarmat.
- Uanga nammineq 1986-mi inunngorpunga, nammineq peroriartorninni inuup atoqatigiittarnerup tungaatigut ineriartortarnera pillugu inummik ataasinnguamilluunniit oqaloqatissaqarnikuunngilanga, aperisassaqarnikuunngilanga qanoq ilioruma atoqatigiikkusussuseqarnera peqqinnartumik ineriartortissinnaanerlugu, taamaalillunga aamma ilinniartinneqarnikuunngilanga killissakka sumiissanersut, allaammi aamma meeqqat atuarfianni oqaluuserineqarnerluunniit ajorpoq, tassa nipangiusimalluinnarneqarsimavoq, Salome nassuiaavoq nangillunilu:
- Atoqatigiittarneq pillugu paqumisunnerujussuup kingunerissanik inuppassuit inuunerminni kinguaassiuutitigut ajoquserneqarsimanermikkut kingunerluutitik nammatarillugit inuuneqalersimapput, uffa ammasumik peqqinnartumik kinguaassiutitigut ineriartornissarput oqaluuserisarsimagutsigu ajornartorsiutit pinngortartut ilarpassui pinngitsoortissinnaagaluarlutigit. Ammasumik asissuinertaqanngitsumillu oqaluuserisinnaasariaqarparput, tassami kinguaassiutigut pinngortititaassutsitsinni nukittoorujussuarmik inissisimapput, sexolog Salome Godfredsen tikkuaavoq.
Kinguaassiuutit pillugit ilisimatusarsimasut amigaataaqisut
Salome Godtfresen ilanngullugu oqaluttuarpoq kinguaassiuutit pillugit ilisimatusarsimanermi kingorna assigiinngitsunik suliakkerneqartalersimalluni, assersuutitullu taavaa meeqqat atuarfianni kinguaassiuutit pillugit ilinniartitsisarneq aammalu aappariinnut, arlaannik pissutilimmik inooqatiinnerlulersimanermikkut ikiortarialinnut peqqinnartumillu aappariittut ingerlaqqikkusuttunut inuunerissaanermik ilaatigut ingerlatsisarsimalluni.
Maanna ilinniartitaaneq matumani pineqartoq aallartereernikuuvoq, taannalu ilaatigut internetsikkut ilinniarnertaqarpoq, ilinniartoqatigiillu siulliit september 2023-mi naammassissapput. Ilinniarfimmiillu nalunaarutigineqarpoq ukiaru ilinniartoqatigiit marluk aallartinneqarumaartussanut nalunaartoqarsinnaanngortoq, taakkunanngalu aappaa Nuummi ingerlanneqartussaasoq ilanngullugu ilisimatitsissutigineqarpoq. Ilinniartitaaneq sulinerup saniatigut ingerlanneqartarpoq. Pisortanit tapiiffigineqarneq ajorpoq aammalu ilinniartut ilinniarnermusitinneqarneq ajorlutik.