Aappilattumi eqqaavissuup inissisimanera tikittunut akornutaasartoq
Takornariat, angallattullu allat Aappilattumut tikikkaangamik naamasartagaat siulleq tassaakkajuppoq eqqakkat anartarfiillu puui ulikkaarsimasut tikkat. Nunaqarfinni aqutsisut siulittaasuata eqqaavissuup nuunneqarnissaa kissaatigigaluarpaa.
- Heliporti eqqaavissuarmut qanittumi inissisimavoq, aqqutaaniippoq, tassanilu eqqakkat katersorneqartarput ikuallanneqartarlutillu. Taannaavoq tipi, nunaqarfitsinnut tikittut naamasartagaat, Karl Petersen oqaluttuarpoq.
Karl Petersen Aappilattumi, Naajaani Innaarsunnilu nunaqarfiit aqutsisuini 2013-imili siulittaasuuvoq. Taassuma erseqqissarpaa nunaqarfimmi eqqaaveqarfiup allamut nuunnissaa pillugu nunaqarfinni aqutsisut kommunimut arlaleriarlutik saaffiginnittareersimasut. Eqqaaveqarfiup sumut inissinnissaanut siunnersuuteqarlutik kommunimut illoqarfiup pilersaarutaanut siunnersuummik nassiussisimagaluarput, akineqaratilli.
- Neriuppugut kommunip tusaassagaatigut. Oqartuaannarpulli suliaq suliarineqartoq. Ukiuni arfinilinni siulittaasooreerpunga, ilisimavaralu aaqqiissutissatut siunnersuut uanga siulimma aamma siunnersuutigisarsimagaat, oqarpoq.
Eqqakkat siulliullutik takuneqartarput
Eqqakkat tamarmik heliportip ungasinngisaanut maanna katersorneqartarput. Aammali anartarfiit puui eqqaaveqarfimmi imaarneqartarlutik. Karl Petersenilu oqaluttuarpoq tipi taanna tassaasoq Aappilattumut tikittut naamasartagaat.
- Soorunami ajuusaarnarpoq. Inissisimaffia allamut nuuttariaqarparput, tikittut pitsaanerusumik tikilluaqqusinnaaniarlugit, oqarpoq.
Aappilattumi aqquserngit eqqakkanik anartarfiullu puuinik ulikkaarsimasunik maanna ulikkaarput. Eqqaavilerisormi anartarfilerisorlu sukkanerusumik assartuisinnaanngikkallarpoq.
Eqqagassalerineq nutaaq
Karl Petersen oqaluttuarpoq Avannaata Kommunia ilisimatitsisimasoq eqqagalerisarneq ukiamut nutarterneqassasoq. Eqqakkat poortorneqartalissapput eqqaaveqarfimmilu katersorneqartalissallutik. Kingorna aaneqartassapput illoqarfimmullu ikuallaaveqartumut assartorneqartassallutik, ikuallanneqarlutillu. Tamanna isumaqarpoq nunaqarfimmi eqqakkanik ikuallaasoqartarunnaassasoq.
- Siunnersuut akuerinikuuarput, nunaqarfipput eqqiluitsuutikkusukkatsigu. Kommunili aamma ilisimatipparput nunaqarfipput novembarip naaneraniit maajip tungaanut umiarsuarmit tikinneqarsinnaasanngitsoq. Tamanna isumaqarpoq ukiup affaata ingerlanerani eqqakkanik