Aaqqissuisuuneq innersuussivoq: Allamik aqqusinniortoqassasoq
Sisimiuniit Kangerlussuarmut aqqusinniaq, ATV-nut atugassatut naatsorsuussaq, aappaagu piariissaaq. Aqqusinivimmilli borgmester Malik Berthelsen takorluugaqarpoq.
Qeqqata Kommuniani borgmesteri Malik Berthelsen nuannaarluni pingasunngormat aasaanerani sulinngiffeqalerpoq.
Sisimiuniit Kangerlussuarmut aqqusinniorneq, ATV-nut atugassiamik, piareerneqartussanngorpoq. Kangerluarsuk Tullermiit Sisimiunut aqqusinniornissamut avatangiisinut sunniutigisinnaasamut nalunaarusiaq ASN akuerineqartoq Qeqqata Kommunia paasitinneqarpoq. Aqqusinniaq aappaagu tassa piareerneqarsinnaanngorpoq.
Aqqusinniap Sisimiut eqqaani imeqarfimmut sunniutigisinnaasaanik nalunaarusiaq ukiorpassuarni suliarineqartoq kiisami akuerineqartoq borgmester Malik Berthelsenip nuannaarutigaa.
– Imeqarfikkut taakkualu killeqarfiisigut aqquserngit nunani issittuni allani ajoqutaanngitsut takusarpagut, Sisimiunilu aamma taamaattoqarsinnaanngornera nuannaarutigeqaarput, Malik Berthelsen Sermitsiamut oqarpoq.
Toqqaannaq nunamukartoqarsinnaanngussasoq
– Sumiiffimmi ineriartornermut sunniuteqarluassaaq. Sisimiuniit Kangerlussuarmut aqqut pinngortitamukarnissamik Kalaallit Nunaanni takusimanngisatsinnik piariarfissiivoq.
– Siullertut takornariaqarnermut sunniuteqarluassaaq aammalu nunaqavissunut. Suliffeqarfiit illuaqqanik akunnittarfinnillu aqqutip ingerlaarfiani sanaartorusuttut ukiuni kingullerni saaffiginnittarput – tamannalumi kommunimi piviusunngortinnissaa pilersaarutigereerparput. Aqqut piviusunngortussanngorpoq – suliniutigerusutallu amerlasuut timitalerneqarnissaat qularinngilara.
Kikkut qassillu sanaartornissamik soqutiginninnersut Malik Berthelsenip oqaatigerusunngilaa.
– Pilersaarutit piareeqqapput - ASN akuersissutigineqareermat sanaartortoqalernissaa
ilimanarluinnarpoq.
– ATV-nut aqqut piniariartarfiusimasumut Aasivissuit – Nipisanut Unescop eriagisassatut nalunaarsornikuusaanut aamma sunniuteqassaaq. Piniariartarfitoqqamukarnissaq ajornannginnerulissaaq – kommunitta takornarialerisuinut nittarsaannissaanut atorluarneqarsinnaanngorluni, Malik Berthelsen oqarpoq.
Triatlonertitsisoqartalersinnaasoq
– Aqqut triatlonerfigineqarsinnaanngussaaq, tassa sikkilerluni, arpalluni nunap killingatigullu nalulluni. Ukiukkut Arctic Circle Racetitsisoqartarneratuut aaqqissuussisoqarsinnaasoq takorloorpara, triatlonertitsineq aasakkut ingerlanneqartalerluni. Uanga aalajangissasuugukku triatloni nunarsuarmi sakkortunerpaajussalluni soorlu Arctic Circle Race taamaattoq.
Borgmesterip takorluugai annertoqaat, soorlu takornariaqarnermi aqqut iluaqutaalluarsinnaasutut.
– Kalaallit Nunaanni pinngortitaq taama ajornanngitsigisumik allani tikinneqarsinnaanngilaq. Tamanna takornarianit soqutigineqarluassaaq, illoqarfinnimi allani asimukassagaanni umiatsiaqqaartariaqarpoq. Nunap sinnerani ATV-nik taama aamma periarfissaqanngilaq, taamaammat ATV-enermik nuannarisallit nunatsinnukarusulersinnaanerat ilimagilluinnarpara, Malik Berthelsen siulittuivoq.
Angorusutarpassuit
Qeqqata Kommuniani angorusutat annertupput – borgmester Berthelsenilu takoluuinissani tunuarsimaarfiginngilaa. ATV-nut aqqusinniap piareernissaa kisimi takorluugaanngilaq.
Allamimmi aqqusinniortoqarnissaa borgmesterip angorusuppaa. Aqqusinniassaq, borgmesterip taaneratut pinngortitap aqqutaa, meterinik arfinilinnik silitsigissaaq. Pinngortitap aqqutaa maanna pilersaarusiorneqaleruttorpoq. Naalakkersuisut Qeqqata Kommunialu pilersaarusiornermut 5 millionit koruunit aningaasaliissutigaat.
– Suliaq aasap ingerlanerani suliarineqarpoq, teknikikkut suliaqartut ATV-mut aqqummut paasissutissanik katersipput. Nuna qulaaniit assilisaarneqarpoq, nunap qanoq issusianik isikkuanillu allaatigisamut atugassanik, Malik Berthelsen oqarpoq.
– Aqqusinniassap suliaanissaata ajornakusoornissaa ilimaginngilarput. Nunani allani qaqqaqarfinni ajornaquteqanngitsumik aqqusinniortoqartartoq takusarparput. Imeqarfiup killingani pinngortitamut sunniutaasinnaasumik nalunaarusiap akuersissutigineqarnerani tamanna aamma paasivarput.
– Nunalerinermut, imminut pilersornermut, nukissiutinut avatangiisinullu naalakkersuisoq Kalistat Lund isumaqatigilluinnarpara. ASN-imi akuersinermigut inuussutissarsiornikkut ineriartorneq imeqarfeqarfiillu mingutsinneqaratik ingerlaqatigiissinnaanerinik takutimmagu.
– Qeqqata Kommuniani takornariaqarnerup inuussutissarsiutinillu ineriartortitserusunnerput Naalakkersuisut tapersermassuk aamma qutsavigerusuppakka. Aqqusinniaq piviusunngussasoq neriuutigaara, namminersorlutik oqartussallu taanna pillugu isumaqatiginiarnissai qilanaarilereerlugu, Malik Berthelsen oqarpoq.
Kissaat annertooq
Sisimiuniit Kangerlussuarmut aqqut 60-ikkunnili eqqartorneqalerpoq. Taamani amerlasuut isuma qularutigaat – aamma Sisimiuni. Aqqusinertaarusunnerli ukiuni qulini kingullerni kissaatigineqaleraluttuinnarsimavoq – Qeqqata Kommuniatalu aqqusinertaarnissaq sulissutigingaatsiarsimavaa. ASN-illu akuerineqarnerata kinguneranik ATV-mut aqqusinniassamik takorluugaqarneq piviusunngortussanngorpoq.
Borgmester Berthelsenip tamanna iluarisimaaqaa.
– Sukataarnerup akilersinnaaneranik tamanna ersersitsivoq – uangalu borgmesteriuninni Kangerlussuup Sisimiullu akornanni biilersinnaanngornissarput ilimanarseriarluinnarpoq.
Aviisi Sermitsiaq uani pisiariuk: