Aaqqissuisuuneq innersuussivoq: Inatsisilerinermi professori - Tigummigallagassanngortitsisimaneq paasiuminaalluinnarpoq
Inatsisilerineri professori Eva Smith naliliivoq, kalaaleq nukappiariaq 16-inik ukiulik, pinngitsaaleeriarsimasutut qaammatini pingasungajanni tigummigallagaasimasoq, rektorimit aaqqissuussaanermillu sumiginnarneqarsimasoq. Suliaq ima suunngitsigaaq, isumaqatigiissaariniarluni ataatsimeeqatigiinnermi aaqqiivigineqarsimasariaqaraluarluni, oqarpoq Trine Juncher Jørgensen.
Inuusuttut 15-it aamma 17-it akornanni ukiullit suliamik taakkununnga tunngasumik paasiniaasoqartillugu tigummigallagassanngortinneqarsinnaapput. Kisianni tigummigallagassanngortitsinissamut tigussaasumik pissutaasoqassaaq, pineqartorlu peqqarniissuseqangaatsiarsimassalluni, inatsisini allassimasoqarpoq. Tamatuma saniatigut Danmark nunat tamalaat akornanni pisussaaffeqarpoq inuusuttunik 18-it inorlugit ukiulinnik kiffaanngissusiaanerup taamaallaat periarfissatut kingullerpaatut atorneqarnissaanik qulakkeerinninnissamut.
Suliaq suunngitsuararsuaq
16-inik ukiulik ”Jonas” pinngitsaaleeriarsimasutut pinngitsuutinneqarnissami tungaanut qaammatini pingasungajannit tigummigallagaasimasoq pillugu suliaq Københavnip universitetiani inatsisilerinermut ilisimatusarfimmi professorimut soraarnermut, Eva Smithimut saqqummiupparput, taannalu 16-inik ukiullip pineqarsimaneranik quarsaarutiginnittorujussuuvoq.
– Tamatuminnga tunngaveqarluni 16-inik ukiulimmik qaammatini pingasungajanni tigummigallagassanngortitsisoqarsinnaanngilaq. Suliarmi suunngitsuararsuuvoq. Illuatungeriillu attuumassuteqartut marluk pisut qanoq ingerlasimanerat pillugu isumaqatigiinnerupput, taamaattumik ilisimannittunik sunniisinnaanera tunngavilersuutigalugu tigummigallagassanngortinneqarsimanera paasiuminaatsilluinnarpara. Ilinniarnertunngorniarfimmillu anisitaasimavoq, taamaattumillu tigummigallagassanngortitaasimanngikkaluaruni Kalaallit Nunaannut utersimassagaluarluni. Isumaqarpunga taamatut kiffaanngissusiiarneqarsimanera ingasaassinerusoq.
– Tigummigallaganngortitaasimanera paaqqinniffimmi isumannaallisakkami pigaluartoq, tamatumani inuusuttut taassumannga pinerluuteqarnerujussuusimasut peqatigisussanngorsimavai. Tamatuma saniatigut oqaatsit pikkoriffigivallaanngilai, taamaalillunilu suli immikkoortitaaneroratarsinnaalluni.
Isumaqatigiissaarinissamut periarfissaq
Suliamik taassumatut ittumik ilinniarnertuunngorniarnermik aallartissuteqarnerup rektorimut nuanniitsuunera Eva Smith paasilluarsinnaanerarpaa. Kisianni isumaqarpoq, nukappiaqqap tigummigallagassanngortinneqarneratigut rektorip ajornartorsiutaanik ikiornissaa eqqartuussiveqarnerup suliassarinngikkaa. Taarsiullugu rektorip suliaq eqqartuussiveqarneq avaqqullugu aaqqiivigisinnaasimagaluarpaa.
– Apeqqutaavoq rektorip siullertut politiinut sianersimanera torrallataanersoq. Rektori suliaq tusaramiuk inuusuttunik taakkuninnga marlunnik oqaloqateqarneq aamma aallartissutigisimasinnaagaluarpaa. Isumaqatigiissaarisartutut ingerlataqartumik aamma pissarsiniarsimasinnaagaluarpoq sulianimi taamakkunanerpiaq pisut qanoq ingerlasimanerannik isumaqatigiiffiunerusuni isumaqatigiissaarisartumik atuisoqartarpoq Nukappiaraq tamatumani qularnanngitsumik niviarsiaqqamut utoqqatserumassuseqarsimassagunaraluarpoq, niviarsiaqqallu utoqqatsineq akuerisimassagunaraluarlugu, taamaalillunilu suliaq immaqa aamma aaqqiivigineqarsinnaasimassagaluarluni.
– Isumaqarpunga ilinniarnertuunngorniarfimmit anisitaanermigut naammattorsuarmik pillarneqarsimasoq. Tamatumali saniatigut aamma tigummigallagassanngortitaasimanera ingasaassinerulluinnarpoq, Eva Smith oqarpoq.
Arlalinnit sumiginnaaneq
16-inik ukiulliup tigummigallagaanermini ulluni siullerni 14-ini anaanaminik oqaloqateqaqqusaasimannginnera Eva Smithip aamma paasisinnaanngilaa.
– Isumaqarpunga tamanna naleqqutinngitsoq. Inuusuttunnguunerata siornatigullu pillagaasimanngisaannarnerata saniatigut suliaq aamma annikitsuararsuuvoq, tamatumalu saniatigut nunami takornartamiilluni, oqaatsillu atorsinnaarpiarnagit. Taamaalilluni aarlerinartorsiortorujussuuvoq pisumilu tassani anaanaminik pisariaqartitsilluni. Isumaqarpunga inuttaanut uggornarluinnartuusoq. Arlalinnit sumiginnarneqarsimavoq, Eva Smith oqarpoq, nukappiaqqamullu 16-inik ukiulimmut anaanaasup taama sakkortutigisumik pineqarsimaneranut Kalaallit Nunaanneersuunerata pissutaaneranik eqqarsalersimanera paasilluarsinnaanerarlugu.
– Immikkoortitsinermik pissuteqarneranik eqqarsarnerat paasinarpoq. Tamanna aamma eqqarsaatigeqqajaanarpoq, Eva Smith oqarpoq.
Gribskov Gymnasiumip rektoria Kristoffer Høy Sidenius Eva Smithip isornartorsiuineranik saqqummiussivigineqarami tamatuma kingorna Sermitsiamut ima allappoq:
– Oqaatigerusuppara ilinniarnertuunngorniarfimmi rektoritut pisup pillarneqaataasinnaaneranik pillarneqaataasinnaannginneranilluunniit aalajangersaanissamut uanga oqartussatut eqqortuunnginnama. Taamaattumik politiit oqaloqatiginiarlugit attaveqarfigaakka suliallu politiinut nalunaarutiginissaanik siunnersorneqarlunga. Politiinit siunnersorneqarnerma malinnissaa soorunami toqqarpara.
Suliaq pillugu, eqqartuussivimmilu inerniliunneqartoq allaaserisami uani atuarsinnaavat:
