Aaqqissuisuuneq innersuussivoq: Inuuneq allanngortinneqarsinnaavoq
Lea Holmimut inuuneq ajornaatsuinnaajuaannarsimanngilaq, arnaami aapparisimasaminit toqutaasimavoq. Kisianni kiisami namminerisaminik inissisimaffeqalersimavoq ullumikkullu inuit allat inuunermi pissutsinik ilungersunartunik nalaataqarsimasut ikiorlugit.
Ileqquliussanik allanngortitsisimasutut imminnut oqaatigisinnaasunik inoqarpat taanna tassaavoq 29-nik ukiulik Lea Holm. Nuannersunik eqqaamasaqarfigisaminik misigisaqarfigisaminillu meeraasimagaluarluni angerlarsimaffimmi meeqqamut inussiarnersuujuaannanngitsumi aamma peroriartorsimavoq inuunermilu alianartumik sakkortuumik qanimut nalaataqarsimalluni.
Kisianni tamanna imminut aalajangiisuutikkunnaarsimavaa. Inuunermit ingerlanneqarnissaminut taarsiullugu nammineq inuunermik ingerlatsilernissaminik toqqaasimavoq.
Lea Holm maannakkorpiaq New Zealandimi Okere Fallsimi najugaqarpoq. Corona pissutigalugu ingerlariaqqippallaarsinnaanngilaq.
- Nunanut kiannerusunukartaraluarpunga maani ukioraangat qiianarsisarmat. Europami nunarsuarmiluunniit sumiiffinni allani aasaraangat taakkua ornittaraluarpakka, illarluni oqarpoq.
AG-mit decembarip 2-ani nalunaaqutaq 14 sianerfigaarput. Taassumunnga decembarip 3-ani ullaakkut arfininngortoq. Nunarsuup illuatungaani taqqavani akunnernik 16-inik siulliuvoq.
Lea Holm coachiuvoq yogamilu ilitsersuisuulluni ilaatigullu qarasaasiakkut pikkorissaanernik neqerooruteqarluni. Lifecoachingimi assigiinngitsunik allagataqarpoq Indiamillu aamma yogami ilitsersuisutut ilinniagaqarsimalluni, mindfulness aamma meditation ilanngullugit. Qarasaasiakkut suliffeqarfeeqqamit Seqineq/Lea Holm Coachingimit kiffartuussissutinik taama ittunik neqerooruteqarpoq. Tassanngaanniit arnanut immikkut qarasaasiakkut pikkorissaanernik aamma neqerooruteqarpoq.
- Qarasaasiakkut pikkorissaasarpoq taaguuteqartumik Kvindeportalen/Seqineq Arnanut, arnat namminneq ineriartornissaannut ikiorusukkakkit, tamatigut nukittumik inissisimaffeqarniassammata, oqarpoq.
Tamanna annernaqisumik misigisimasaanit arnaata toqutaaffigisimasaanit aallaaveqarpoq, tamanna allaaserisami kingusinnerulaartukkut atuarsinnaavat. Neqeroorutigisai tamarmik nammineq inuuneranit aallaaveqarput.
- Neqeroorutigisakka tamaasa uanga nammineq aqqusaarsimavakka. Ingerlatara tamakkerluni inuuninnik aallaaveqarpoq. Misigisimavunga inuunera tamarmi misigisimasakkalu tamarmik, meeraaneq imigassartornermik nakuusernermillu malunnaateqaqisoq anaanagalu toqutaasimasoq maanna inissisimaffinnut inunnut allanut piginnaasani ineriartortikkusutaanni ikiuussinnaaffigisannut ingerlatitsisuusimasut.
- Nalunngilarput nunatsinni arnarpassuaqartoq atugarliortunik, nakuusernerit, pinngitsaaliinerit tarnikkullu nakkarsaanerit annertoorujussuummata, oqarpoq.
- Aqqutissiuunneqaannaraanni tamatumalu malinnissaanut piumassuseqaraanni inuunerisap allanngortinneqarsinnaanera upperisorujussuuara, Lea, surfernermik aallussisorujussuusoq, oqarpoq.
Pissutsit allanngortinnerat
Lea Nuummi inunngorlunilu peroriartorsimavoq, ukiunili pingasuni New Zealandimi najugaqarnerusimalluni. Maanna nunarsuaq tamakkerlugu nappaalaneq pissutigalugu ukioq ataaseq sinnerlugu nikeriarsinnaaqqalluni uninngasimavoq ukiuni pingasuni aapparisani, 31-nik ukiulik Jesper Sørensen, raftingguideusoq, peqatigalugu. Imminnut iluatsitsinerinnakkut naapissimapput.
- Jesper Norgemi najugaqarsimavoq ajoqusersimallunilu, tamatumalu kingunerisaanik Danmarkiliartariaqalersimalluni, taamaalillutalu naapilluta. Qaqutigorujussuaannaq Danmarkimiittarsimagaluarpoq, Lea, ilinniarnertuunngorniarfimmi ilinniartuusimasoq, oqarpoq.
Inatsisilerituunngorniarluni ilinnialersimagaluarpoq unitsiinnarnissaanullu sapiissuseqalernissami tungaanut ukiuni marlunni affarmilu ingerlassimagaluarlugu.
- Taamani aliasuttorujussuuvunga. Nuanniigisorujussuuara, ”nuanniigisorujussuuara” immikkut naqissuserlugu oqarpoq.
Taamaammat aallaqqaammut ilinniakkamik toqqaasimanera eqqumiigineqarsinnaavoq.
- Meeraagallarama anaanaga oqarfigalugu eqqaamavara, angisuunngoruma pisiniarfiutitaarusullunga. Kisianni 2010-mi annaareerlugu inatsisilerinerup silarsuaa iserfigaara. Siullermi eqqartuussissuserisut allaffianni piccolinetut, ulluinnarni qanoq sulisarnerat takullugu. Tamanna nuannaraara, inuillu ilungersorlutik sulisut periaaserissaartullu nuannaralugit. Ulluinnaat taakkua nuannaraakka, taamaattumik sammivimmi tassani ingerlanissanut isumassarsisinneqarlunga, oqaluttuarpoq.
Piccolinetut atorfimmi suliunnaarami naalakkersuisumut allatsitut suliffeqalerpoq.
- Assigiinngitsorpassuarnik suliaqarluni inuillu assigiinngitsut suliassaqarfinnik assigiinngitsunik ilisimasalerujussuit attaveqarfigalugit nuanneqaaq. Inuit ilinniarluarsimasut tamakkua naapittakkakka ilisimasanillu pissarsivigisakka nuannarisimavakka.
- Kisianni ilimaginngilara inatsisilerituujunerup qanorpiaq isumaqarnera paaseqqissaarsimanngikkiga. Aamma arnanik marlussunnik ikinnguteqarpunga inatsisilerituunngorniartunik. Inuunermi inuusuttuaqqatut ukioqarnermi pisoqartarneratut ingerlaqatigiittuaannarsimavugut, taamaattumik inatsisilerituunngorniarnissaq naggataatigut qinerpara, oqaluttuarpoq.
Ilinnialernerminiit qaammammi siullermiilli nalusimanngikkaluarpaa ilinniagaq imminut tulluartuunngitsoq, taamanili inuiit allat pilluni qanoq eqqarsarnerat pingartinnerusimavaa, uniinnarsimasutullu isigineqarusussimanani.
Kisianni taava qallunaaq aappani ukiuni aqqanilinni nunani allani najugaqarsimasoq naapippaa. Tamanna ingerlariaqqissutigaa.
- Inigisanneersunik tuniniaavunga, inigisaralu attartorunnaarlugu. Uannut toqqissisimanartut ilisimaneqareersullu tamaasa qimallugit, tassami Kalaallit Nunaannut uternissara inatsisilerituutullu sulilernissara naatsorsuutigisimagaluarpara. Kisianni taamatut ingerlasoqarsinnaanavianngitsoq paasilertorpara. Ingerlaannaraluaruma pillualinngisaannartussaavunga, oqarpoq.
- Aappara naapereerlugu taassuma inuunermut tassunga ilisaritippaanga, inuuneq piusoq ilisimanngisara, nammineq akunnernik pilersaarusiorfigisinnaasara, suliffinni nuannisarfigisinnaasara, inuttullu pissutsinnut naleqquttunik suliaqarfigisinnaasara… tamatuma sammivimmik allanngortitsisissimagaanga oqartoqarsinnaavoq.
Yoga ineriartornermik aallartitsisoq
Lea Holm sammivini allanngortinngikkallaramiuk arnaasimavoq pissutsinik isertuussiniartartoq sakkortuunillu misigisaqarsimagaluarluni ajunnginnerminik takutitsinartartoq.
Ukioq 2017 tassaalerpoq immikkuullarissoq. Ikinngutimi qanigisarujussuusami ilaat annaavaa, misigisarlu tamanna anaanaminik, Diana Kleistimik, aapparisimasaminit toqutaasumik, annaasaqarnerminik anniaammik qaffakaalersitseqqippoq. Meeraanerminit misigisimasani ungasinniarsimasaagaluani qanillisoortippai. Tamatumani yoga inuuneranut ilaalerpoq.
- Yoga inuttut nammineq ineriartornerma aallartinnissaanut periaasitsialaarsimavoq. Yoga nammineq pineqarpallaanngilaq, kisiannili inuttut ineriartornerup aallartinnera pineqarnerulluni, oqarpoq.
Yoga, meditation aamma mindfulness siornatigut misigisimasat nuanniitsut sakkortuullu qaangerniarnissaannut sooruna iluaqutaasimapput, ilimaginngilaali nukkani ukiunik sisamanik nukarleq, Inequ Holm, tapersersortigisimanngikkaluaruniuk tamakkua qaangersimassagaluarlugit.
- Anaanatta oqarfigisarpaatigut uaguinnaasugut, taamaattumillu immitsinnut pissuserissaarfigisariaqartugut, Lea oqarpoq, ilanngullugulu oqaatigalugu, qatanngutigiillutik inissaqartitsinertik, misiginneqatiginninnertik imminnullu paasisinnaanertik anneruliinnarsimasoq anaanartik 15-inik 19-inillu ukioqarlutik annaagamikku.
- Ataqatigiinnerput nukittoorujussuuvoq, oqarpoq.
Lea oqarasuaatikkut arnatut oqimaaqatigiissutut inuunermullu nukittuutut inuunermut isumalluartorujussuarmik isiginnittaasilittut nipeqarpoq. Tamanna ukiut pingasut matuma siornatigut qanoq ittuuneranit allaanerujussuuvoq. Piffissaq tamanna kingumut eqqarsaatigileraangamiuk qiasunnguummertarpoq.
- Taamani nuanniilliortorujussuuvunga. Inuuninni unammilligassat iliuuseqarfiginiarnerat ajornartorsiutigaara, siornatigut misigisimasakka pissutigalugu ilorlikkut anniaateqartorujussuugama. Qalliinnarsiortorujussuarmik inuuneqarpunga, matoqqasorujussuullunga imminullu aserorsarlunga. Imminut upperinngilluinnarpunga. Isumaqarsimagaluarpunga inuttut naleqanngitsunga. Akiuullunga tamaviaarpunga. Pissutissaqarluartumik. Maannali – oqariartaasiinnartut nipeqaraluartoq, kisianni ilumoorpoq: Aatsaat taama maana pilluartigaanga. Taamani inuttut qanoq ittuunera ullumikkullu inuttut qanoq ittuunera assigiinngitsorujussuupput. Inuunera allanngortinniarlugu iliuuseqarsimavunga, tamattami piumagutta taamaaliorsinnaavugut, oqarpoq.
AG uani pisiariuk: