Aaqqissuisuuneq innersuussivoq: Sorpassuarnik sapigaqarneq tamaviaartitsivoq
Nukappiaraq qulinik qaammatilik Nuummeersoq amerluuteqarnini pillugu qaammatini arlalinni naalliuuteqarpoq. Suna amerluutigineraa qanittumi aatsaat paasineqarpoq. Nakorsiat naammagittaalliortarfiannut naammagittaalliornissaq angajoqqaavisa isumaliutigaat Nunatsinni sullinneqarnertik naammaginagu
- Qujanaqaaq erninnguarput Danmarkiliaassimagatsigu, angajoqqaajusut Lena Broberg aamma Kunuuteeraq Isaksen oqaluttuarput, tassami porski sioqqutilaarlugu ernertik Tugdluartok’ quliinnarnik qaammatilik Danmarkiliaappaat.
Pisut aallartiffiat siusinnerusukkut AG-mi oqaluttuarereerpaat. Qaammatini arlalinni nukappiaqqap suna amerluutigineraa Nunatsinni peqqinnissaqarfimmi paasiniarneqarpoq, amerluutaalu nukappiaqqamut angajoqqaavinullu sinnakilliortitsisarsimavoq. Nukappiaqqap amerluutaa iluarsiartunngimmat Danmarkiliarput. Københavnimullu tikitsiaannarlutik nukappiaraq napparsimasorujussuanngormat pikkorinnerpaanit ikiorserneqartariaqarsimapput.
- Aallarnissatsinnut aqaguttoq ernitta amerluutaa seerilerpoq inuunilullunilu. Meeqqanut nakorsiartarfik attaviniaraluarparput oqarasuaalli tiguneqanngilaq. Kangerlussuarmut apuukkatta suli peqqinngittorujuuvoq nalunaaquttallu akunneri sisamat timmisartornissarput toqqissisimanarinngikkaluarparput. Taamaattoq Københavnimut ingerlaqqissalluta aalajangerpugut, Lena Broberg aamma Kunuuteeraq Isaksen oqaluttuarput.
Immikkut inilerlugu unitsinneqartoq
Tikinnermillu aqaguani Rigshospitaliliarmata pisoqalertorpoq.
- Ernerput immikkut inilerlugu unitsinneqarpoq erngiinnarlu nakorsarneqalerluni. Immikkut inilerlugu unitsinneqarnera tusaannarlugu sakkortusinnaavoq, taamaattoq toqqissisimavugut misigisimalluta ernerput ikiorluarneqartoq. Qanoq innersoq misissorneqartuarpoq. Ernerput napparsimaqimmat nakorsamit ilisimatinneqarpugut pissutsit taamaanneranni allami pitsaanerusumiissinnaanngitsugut, Lena Broberg aamma Kunuuteeraq Isaksen oqaluttuarput.
Nukappiaqqap timaani proteinit annikittuaranngorsimagaluarput. Tamanna pissutigalugu imeq timaaniit anillassinnaajunnaaraluarpoq. Timaa pullalerpoq namminerlu quisinnaajunnaaraluarluni. Nakorsaatilli atorlugit katsorsarneqarnera iluaqutaasoq ingerlaannaq takuneqarsinnaalerpoq.
Sorpassuit sapigarigai
Tugdluartup amerlunnera seeriunnaarpoq amerinnerulerlunilu. Angerlarnissaannulli billettit siumut pisiareriigaapput taamalu porskip arfininngortuani Nuummut angerlarlutik.
- Nuummut tikikkatta amerloqqilerpoq. Sulilu nukillaajallaqqippugut arlaannik sapigaqarnersoq misissorniarlugu qaammatit marluk matuma siorna Dronning Ingridep peqqissaaviani aaversinneri periarfeerunneqarmata. Aqqusaarsimasavut eqqarsaatigalugit tamanna assut nakeriallannarpoq, Lena Broberg aamma Kunuuteeraq Isaksen oqaluttuarput.
Maanna aaverseqqereerpoq arlaannik sapigaqarnersoq misissorniarlugu, akissutisiaallu apeqqutinik suli amerlanerusunik qaffakaatitsivoq.
- Aaversinnerisa takutippaat sorpassuit ernitta sapigarigai. Imaappoq suulluunniit saperpai nerisassaniit illup iluani pujoralaat ilanngullugit. Nappaammut akiuussutissai annikippallaarmata meeraqatimi akornanneeqqusaanngilaq amerlunnini kumillugit amiilakatsernermigut aseruuttuulersarami. Suliffinniit napparsimasutut nalunaarsorneqarnissamik qinnuteqaqqippunga ernerput angerlarsimaqatigalugu paarisariaqarakku. Maanna Rigshospitalimut innersuunneqarpugut. Sulili apeqquterpassuaqarpoq suli akissutissaqartinngisatsinnik soorlu nukappiaraq sorpassuarnik sapigalik qitornarlugu ulluinnarput qanoq ingerlassanersoq, Lena Broberg oqarpoq.
Maanna Rigshospitalimut innersuunneqarnerup naammassinissaa utaqqiinnarpaat. Sorpassuarnillu sapigaqarnera apeqquterpassuarnik pilersitsivoq.
Siunissap pitsaanerulernissaanik neriuut
- Paasivarput nerisassiornermi nassaarsiullaqqilluinnartuusariaqarluta. Ernitta sapigaasa ilagaat qaqqortarissat, aalisakkat, qaleruallit, immuk laktoselu arlaannik assersuuteqassagutta. Aqqusaakkatsinnut assigusumik misigisaqarsimasut tutsiuttarput. Sapigalinnut naleqquttunik nerisassiassanik taakku siunnersuuteqartarput, Lena Broberg aamma Kunuuteeraq Isaksen oqarput.
Angajoqqaajusut neriuutigaat qaammaterpassuarni ernermik amerluutaa pillugu nalorninertik qaangiutilersoq.
- Naammaginngilarput siusinnerusukkut ernitta Rigshospitalimi immikkut ilisimasalinnut siusinnerusukkut innersuunneqarsimannginnera. Sunami amerluutigineraa nakorsat sivisuumik paasiniarsaraat. Maanna misissorparput nakorsiat maalaaruteqartarfiannut naammagittaalliuuteqarnissarput. Aqqusaakkavut naatsumik oqaatigalugit naammaginanngilluinnarput – pingaartumik ernerput eqqarsaatigalugu, Lena Broberg aamma Kunuuteeraq Isaksen naggasiipput.
Aviisi AG uani pisiariuk: