Aaqqissuisuuneq innersuussivoq: Takorluugaq piviusunngorpoq – naatsorsuutigisamit siusinnerusukkut

Inuit ikigisassaanngitsut tupaallaatigisimassagunagaannik Demokraatit naalakkersuisooqataaleramik toqqarpaat 28-nik ukiulik Jens-Frederik Nielsen inuussutissarsiornermut aatsitassanullu naalakkersuisussatut innersuunneqassasoq. Inuit nittartakkatigut ataatsimoortarfinni qisuariaataat ataatsimut eqikkassagaanni sassarnikuunnginnera aammalu qinikkatut inissisimannginnera maluginiarsimagaat malunnarpoq.

Tamannali siulittaasunngortup uniffiginngilaa:

- Partiimi 2014-mili peqataalernikuuvunga, taamani Nivi Olsen (D) naalakkersuisunngormat allattaalerpunga. Tamatuma kingorna aamma siulittaasorisimasatsinnut Randi Vestergaard Evaldsen-imut aamma allatsinngorlunga, siulittaasunngorlaaq imminut tatigilluartoq Jens-Frederik Nielsen (D) Sermitsiamut oqarpoq.

Taassuma isertuarani oqaluttuaraa politikkikkut sullissinermut peqataaqaaleramili partiimi maanna siulittaasuuffigilikkamini siulittaasunngorumaarnissani takorloortarsimallugu:

- Uannut sinnilimmik nukissaqarluarpunga inuiaqatigiinnik sullississallunga, partiip politikkikkut anguniagai annikinngitsumik sunniuteqarfigaakka aqqutaani, aamma sivisuumik piareersarnikuuvunga ullut arlaanni kommunalbestyrelsemut aammalu Inatsisartunut sassarumaarlunga – taamaattorli 28-nik ukioqarlunga aammalu taamak siusitsigisukkut akisussaaffimmik tigusinissara takorloorsimanngikkaluarpara. Periarfissarli takkuppoq, uangalu nangaananga sassarpunga, tassami sularerusutara taannaavoq, aamma pitsaasup tungaanut allanngueqataarusussuseqarpunga annertuumik aammalu inuiaqatigiit politikkikkut sullisissallugit kajumissuseqarluarpunga, Jens-Frederik Nielsen (D) erseqqissaavoq.

Demokraatit anguniagaat allanngussanngillat

Demokraatit partiiuvoq inuup kiffaanngissuseqarnissaanik pingaartitsisoq (socialliberalt parti), tassa innuttaasut ataasiakkaat kiffaanngissuseqarnissaannik pisortanillu akuliuffigineqartarnerisa minnerpaatinneqarnissaannik pingaartitsisoq, aqqullu taanna allanngortinneqassanngitsoq siulittaasortaap naqissuserpaa:

- Uagut isumaqarpugut innuttaasut tamarmik sapinngisamik annerpaamik qanoq inoorusunnertik aallaavigalugu namminneq ineriartortitsinissaminnut pisortanillu akuliuffigineqaratik periarfissaat annerpaatinneqartariaqartoq. Taamaattumik inuup nammineq imminut isumaginissaa akisussaaffiginissaalu aallaavigalugu sinaakkutissanik pitsaasunik pilersitserusuttuuvugut.

- Tamanna pissaaq politikkikkut sinaakkusiornikkut, innuttaasut ataasiakkaat naatsorsuutigisinnaasaannik. Assersuutigiinnarlugu pisortanik isumalluuteqarneq sapinngisamik qimanniartariaqarparput, paarlattuanilli politikkikkut aqqutissiuuttariaqarparput inuup nammineq imminut akisussaaffigaluni imminut pilersorluni inuunerminik nammineq aqutsinissaminut periarfissarissaartinneqarnissaa, taamaammanuna aamma sulissutigigipput innuttaasut ataasiakkaat aningaasaateqarnerulernissaat, ilaatigut sulinermut ilanngaat aqqutigalugu, Demokraatit siulittaasortaavat Jens-Frederik Nielsen nassuiaavoq.

Siulittaasutut qinigaanermi kingorna siullerpaamik partiiminut oqalugiarami, Jens-Frederik Nielsen-ip nalunaarutigaa pisortat akileraarutitigut akitsuutigigullu aallertarnerat unitsinneqartariaqartoq, namminerlu siulittaasuunermi nalaani akitsuutit aqqutigalugit innuttaasunut aallertarneq atuutsinneqassanngitsoq:

- Nalunngilara aqqutaani anguniakkatsinnut uniuuttumik iliortariaqartarsimalluta, taamaaliortariaqarsimavugullu nunatta aningaasaqarnerata oqimaaqatigiissarneqarneranut atatillugu. Taamaattorli siunissaq eqqarsaatigalugu uanga siulittaasuutillunga, uagut parteerput peqataassanngilaq aningaasaqarnermi putut matuniaannarlugit akitsuutinik qaffaasarnernut. Paarlattuanilli sukkulluunniit piareersimassaagut akitsuutikillisaanermut akileraarutitigullu apparsaanermut peqataassalluta, tassami uagut isumaqarpugut nunarput politikkikkut aningaasarsiornikkullu nukittuumik inississimassappat, taava aamma innuttaasut nukittullutillu nammineersinnaaanerat annertusartuarneqartariaqartoq, taamaaliornikkut innuttaasut imminnut akisussaafigalutik pisortanit akuliuffigineqaratik inuuneqarnissaat qulakkeersimasariaqartoq, pisortallu taamaallaat isumagisariaqaraat sinaakkutissat eqqortut inatsisitigut piunissaat, Jens-Frederik Nielsen (D) erseqqissaavoq.

Ingerlatseqatigiiffiit akileraarutaat suli apparneqassaaq

Ingerlatseqatigiiffiit akileraarutaat 5 procentimik apparneqarnikuuvoq. Partiit ilaat isumaqarput pissakinnerniit aalleriarluni pissaqarnerit aningaatigullu nukittuumik inissisimasut tuniorarneqartut, taamaattorli Demokraatit aalajangiusimavaat ingerlatseqatigiiffiit akileraarutaat sapinngisamik appasinnerpaatinneqartariaqartoq:

- Ajuusaarpunga ingerlatseqatigiiffiit akileraarutaannik appaanerput siunertarinngilluinnagaanut sangutillugu paatsuunganartunngortinniartarmassuk. Siunertaavormi inuussutissarsiornermik ingerlataqartut pitsaasumik atugassaqartinneqarnissaat qulakkeerniarneqassasoq aammalu nunanut allanut sanilliullugu nunarput unammillersinnaassuseqarluassasoq kiisalu aamma aningaasaliiffigissallugu kajungernartuussasoq. Inuussutissarsiuteqartut ajunngitsunik atugassaqartinneqarunik aammalu aningaasaleerusussuseq qaffasippat, tamanna isumaqarpoq suliffissanik pilersitsinermik, suliffissallu pilersinneqarpata aamma innuttaasunut ataasiakkaanut tamanna iluaqutaassaaq, Demokraatit siulittaasortaavat, Jens-Frederik Nielsen oqarpoq.

Assaat kissartut amerlanerit

Inuit ataasiakkaat kiffaanngissuseqarlutik inuusinnaatitaanissaanik pingaartitsinermisut annertutigisumik Demokraatit siulittaasortaavat amama isumaginninnikkut peqqussutsikkullu pingaartumik inuiaqatigiinni qajannartumik inissisimasunut atugassat pitsaasuunissaannik pingaartitsitigaaq, pingaartumik meeqqat pineqartillugit:

- Pingaaruteqarluinnarpoq meeqqat toqqissillutik eqqissillutillu arlaannaatigulluunniit innarlerneqaratik peroriartorsinnaanissaat tamatigut qulakkeersimassallugu. Meeqqat innimiilliorfigineqartarnerat piaaralunilu innarlerneqartarnerat unitsilluinnarneqartariaqarpoq, aamma meeqqat kinguaassiutitigut innimiilliorfigineqartarnerat atornerlunneqartarnerallu unitsissallugu nukiit tamaasa atortariaqarpagut. Meeqqeriviit, atuarfiit aammalu meeqqat sunngiffimmi ornittagaat assannik kissalaartunik naammattunik peqartinneqartariaqarput, taamaaliornikkut meeqqat arlaatigut atugarliuuteqartut sapinngisamik piaartumik paasineqartalerniassammata iliuuseqarfigineqarlutillu. Tamatta pisussaaffigaarput meeqqat toqqissillutik peroriartorsinnaanissaat qulakkiissallugu, taamaaliornikkummi aatsaat inuiaqatigiit peqqissunik nukittuunillu innuttaasoqarnissaat qulakkeerneqarsinnaavoq, Jens-Frederik Nielsen (D) oqarpoq.

Aammali peqqinnissaqarfik, partiip naalakkersuisooqataalernermigut akisussaaffigiligaa immikkut eqqumaffigalugulu aallunneqassasoq siulittaasunngortup ilimasaarutigaa:

- Innuttaasutut imminut napatittutut aammalu kiffaanngissuseqartutut inissisimasoqaraluarpalluunniit, taamatulli pingaaruteqartigaaq innuttaasut aamma peqqissuunissartik pillugu akisussaaffimmik tigusinissaat. Qanittunnguakkut suliassaminut piukkunnarluinnartumik naalakkersuisunngortitsivugut, qularinngilaralu tapersersorneqarluarnermigut siuttuulluarumaartoq nappaatit inooriaatsimut tunngasut pinaveersaartitsinikkut ikilisarneqarnissaannik sulissutiginninnermut, taamaaliornikkummi peqqinnissaqarfiup namminneq pisuussutiginagu napparsimasunut kiffartuussisinnaanera annertunerpaatinneqassammat. Tamanna iluatsissappat innuttaasut qanimut suleqatigineqartariaqarput, ataatsimoorlutami peqqinnissaqarfitta qanoq atorneqarnissaa paaseqatigiissutigissavarput aammalu kikkulluunniit pisinnaasut tamarmik peqataasariaqarput pitsaasumik pilertortumillu kiffartuussisinnaanissaa qulakkeerniarlugu sulinermut, tamannalu aamma iluatsissappat assaat kissalaartut naammattut aamma peqqinnissaqarfimmi pigineqartariaqarput, Anna Wangenheimilu aquummik tigummitillugu qularinngilara peqqinnissaqarnermut tunngatillugu aalaakkaasumik patajaatsumillu ingerlatsinissaq qulakkeersimaneqassasoq, Jens-Frederik Nielsen (D) oqarpoq.

Naalakkersuisooqatigiit suleqatigiinnerat

Jens-Frederik Nielsen erseqqissaavoq piffissaq ikinnerussuteqarlutik naalakkersuisooqatigiinnut partiip tapertaasimanera suleqatigiilluarnermik tunngaveqarsimasoq, taamaammallu pisariitsumik naalakkersuisooqatigiinnut ilanngussinnaasimallutik:

- Immitsinnut ataqqeqatigiippugut aammalu immitsinnut naalaarluartuuvugut, suleqatigiinnerput nukittuumik inissisimavoq aammalu aalajangiinerit annertuut, inuiaqatigiinnut annertuumik iluaqutissiisussat peqatigiilluta nangaanata ingerlattarsimavagut, aammalu naalakkersuisooqatigiilernitsigut isumaqatigiissutip naleqqussarlugulu nutarterneratigut siunissami angorusutagut tunaartalersorpagut, taamaattumik isumaqarpunga eqqortuliornerusoq Demokraatit naalakkersuisooqatigiinnut ilanngummata, tassami aalajangiuteriikkagut aalajangiusimavagut timitalersornerallu ingerlateqqikkusupparput, akisussaaffimmillu kivitseqataarusunnerput aallaaviuvoq, demokraatit siulittaasortaavat Jens-Frederik Nielsen Sermitsiamut oqarpoq.

Coronap ajornartoortitsinera

Suli maannamut ilisimaneqalinngilaq coronap ajornartoortitsinera aningaasatigut qanoq annertutigisumik inuiaqatigiinnut annaasaqaataassanersoq, taamaattorli tamatta nalunngilarput aningaasaqarnikkut aningaasarsiornikkullu kingunerluuteqartoq, tamanna pillugu Jens-Frederik Nielsen partiimi siulersuisoqatigilikkani peqatigalugit akisussaaffimmik tigumminneqataarusuppoq pissutsit nalinginnaasunngoqqitsinniarnissaanut:

- Kalaallit Nunaat massakkorpiaq nalitsinni takuneqarsimanngitsutut aningaasarliorluinnarfimmiippoq, uangalu Demokraatit peqatigalugit pisinnaasarput tamaat akisussaaffimmik tigusinissamut pisussaavugut, taamaaliornikkummi nunarput ajutoorfissuarmit pitsaanerpaamik aninguisinniarsarissavarput, Jens Frederik Nielsen (D) naqissusiivoq.

Aviisimi Sermitsiami atuarnerusinnaavutit:

Sermitsiaq Uge 24 2020

Klik her for at læse