Aaqqissuisuuneq innersuussivoq: Tusassimi pisortaanerup tunuannginnermini qinnuiginnissutaa
Tusassip pisortaanera Kristian Reinert Davidsen, attaveqaqatigiinngermik suliffeqarfiup Savalimmiuni atorfittaarluni qimannginnerani, Naalakkersuisunut aamma danskit naalakkersuisuinut pimoorussaminik qinnuiginnippoq.
Savalimmiormiup Kristian Reinert Davidsenip Tusass A/S-imi pisortaanertut atorfinitsinneqarneranit ukiut arfineq-pingasut qaangiupput, suliffeqarfillu taassuma aqutsinerani allannguerujussuarpoq, niuernerup pisariillisarneqarnera pitsaanerulersinnissaalu eqqarsaatigalugit, minnerunngitsumillu digitalikkut periarfissanut nutaanut naleqqussarluni, mobilikkut internetikkullu atuisut nunami sumiikkaluarpataluunniit sukkasuumik attaveqaateqalernerannut naleqqussaasoqarpoq.
Tusass A/S ukiut tamaasa Nunatta Karsianut annertuumik isertitaqartarpoq, ilaatigut attaveqatigiinnermik suliffeqarfissuup mittarfiit nutaat – Kalaallit Nunaanni attaveqaasersuutitigut suliniutit annersaata aningaasalersorneqarnerannut peqataasarluni.
Nunap karsianut tapiissuterpassuit
Kristian Reinert Davidsenip Tusassip Nunatta Karsianut millionilikkaanik tapiissuteqarsimanera tulluusimaarutigaa, Thorshavnimulli aallarluni kuffertimi poortornissaata tungaanut sammisamik immikkut ittumik pingaartilluinnagaqarpoq:
Tusassip attaveqaatit pingaarutillit akisussaaffigimmagit pilersuinerup isumannaatsuunissaa pineqarpoq.
Ukiuni kingullerni pisut pingasut erseqqissarpaat Kalaallit Nunaata avataanit attaveqarfigineqarnissaata qulakkeerneqarnissaa qanoq pingaaruteqartigisoq.
Tamakku tamarmik immap naqqatigut kabelimit aallartipput, taakkulu 2019-imi imminnut attuumassuteqanngitsunik kipineqarput, tamatumalu kingunerisaanik Namminersorlutik Oqartussat ingerlatseqatigiiffiutaata mobilikkut internetikkullu attaveqarnerup qulakkeernissaa ajornartorsiutigaa, attaveqarnerlu tamanna niuernermut inuiaqatigiillu ingerlaannarnissaannut pingaaruteqarpoq.
Tunillaassuunnerup ilungersunartui
Ukiup tulliani nunarsuaq tamakkerlugu covid-19-ip tuniluunnera pissutigalugu sulisut amerlasuut angerlarsimaffimminnit sulisariaqarput, tamannalu pissutigalugu angerlarsimaffiit internetimut attaveqarluarnissaat qulakkeerniarlugu iliuuseqartariaqarpugut, Kristian Reinert Davidsen oqarpoq.
Pisimasut pingajuat, arlalitsigut iluaqutaasinnaasunik – tassa immap naqqatigut kabelinik marlunnik ataqatigiissunik, aappaa ajoquteqassagaluarpat – pisariaqartitsinermik erseqqissaasoq tassaavoq 2022-mi Østersømi gassip aqqutaata Nordstreamip saassunneqarnera, tamatumalu kingunerisaanik Europami tamarmi nukissiuutitigut ajornartorsiortoqalerpoq.
Ruslandip Ukrainemik tiguaanerata kingorna isumannaallisaanermut politikki allanngorluinnarpoq. Aamma maani Issittumi, ungasissusii pissutigalugit mianernartuuvoq, pisortaaneq oqarpoq.
Pisut pingasut taakku isumannaallisaanermullu politikkimut tunngatillugu pissutsit nutaat pisortap ernummatigai, isumaqarporlu Kalaallit Nunaata aningaasatigut ajornartorsiulersinnaanera annikillisinniarlugu immap naqqatigut kabelimik nutaamik ilassutaasumillu pilersitsisoqarnissaa pingaaruteqartoq.
Kisianni akiligassaq. Kikkut akilissavaat?
Atuisut akilissanngilaat
Kalaallit atuisut nunani allani innuttaasunut sanilliullugit mobiltelefonimut internetimullu akisuumik akiliuteqartarput. Immap naqqatigut kabelimik immikkut ittumik millioninik pingasunik kisitsisitalinnik naleqartumik atuisutta iluaqutigingaarnavianngisaannut – toqqissisimassutigiinnagassaannik – atuisut akiliuteqartinneqartariaqanngillat, Kristian Reinert Davidsen isumaqarpoq.
Tusass A/S-ip isumannaallisaanikkut aaqqiissutissat pitsaanerpaamik pilersinnissaat ajornakusoornerujussuuvoq. Aap, Naalakkersuisut qallunaallu naalakkersuisui akuliuttariaqarpavut, Tusass A/S-imi pisortaaneq oqarpoq.
Siorna aasakkut naalagaaffeqatigiit ataatsimiinneranni ministeriunermut Mette Frederiksenimut, Múte B. Egedemut Savalimmiunilu naalakkersuisunut ajornartorsiummik saqqummiussinissamut periarfissaqalerpoq.
Ajornartorsiutip inunnut pingasunut taakkununnga saqqummiunnissaanut periarfissaqartitaanera nuannaarutigaara. Uanga isumaga naapertorlugu Kalaallit Nunaata attaveqaqatigiinnermut atortuisa siunissami isumannaatsuunissaat illersornissaq pillugu isumaqatiginninniarnerni, maanna Folketingimi ingerlanneqartuni aningaasartuutigineqartariaqarput, Kristian Reinert Davidsen oqarpoq.
Maanna taamaatsillugu Kalaallit Nunaanni attaveqaasersuutit ulorianartorsiortinneqarnerat appasippoq, Ukrainemut saassussisoqarnera sioqqullugu ilisimasatsitut. Tassami saassussisoqarnera pissutigalugu attaveqaatit kipineqarpata inuiaqatigiinnut ajorluinnassaaq, tamannalu aamma peqqinnissaqarfiup aaqqissuussaaneranut, upalungaarsimanermut, oqartussat suliffeqarfiinut tamanut inuussutissarsiortunullu sunniuteqassaaq. Nunaqarfinnullu avinngarusimasunut.
Nammineq nakkutilliineq
Attaveqaasersuutit nakkutigineqarnissaat pingaaruteqartoq, pisortaanerup oqaatigaa, taamaalilluni nunanit allanit sullissisunut pisariaqartitsivallaartoqassanngimmat.
Ullumikkut qaammataasatigut attaveqaatit atortarpavut, teknikilli tamatuma kabelit arlaannik pissuteqarluni kipineqarpata pisariaqartitavut matussusersinnaanngilai, Tusassimi pisortaaneq oqarpoq, nassuiaallunilu ullumikkut qaammataasatigut attaveqaatit immap naqqatigut kabelip maannakkut atorneqartup 3 procentiinnaanik matussusiisinnaasut.
Qaammataasatigut taamaallaat attaveqarsimasuugutta oqartussaasut ataasiakkaat kikkut qaqugukkullu attaveqaatitsinnik atuinissaat aalajangertariaqartarsimassagaluarparput. Tamanna attanneqarsinnaanngilaq, siunissamilu qanittumi qaammataasatigut teknologi kabelinik taarserneqarsinnaanngilaq, pisortaaneq oqarpoq.
2,5 milliardit koruuninik aningaasartuutitalik
2,5 milliarder koruuninik akeqartussaasoq naatsorsuutigineqarpoq, tamanna Kalaallit Nunaata nammineq nammassinnaanngisaa. Tassanili pisortaanerup erseqqissarpaa aningaasartuutit teknologiimik marlunnik atuiffiusumik, inuiaqatigiinni sakkutuujunngitsuni aammali sakkutuut upalungaarsimasullu pisariaqartitaannik matussusiisumik, pilersitsinissamut attuumassuteqartut.
Politikerit oqariartuut paasisimaneraat Kristian Reinert Davidsenip marsip aallaqqaataani Tusassimi pisortaanertut atorfimminit tunuarluni atorfik Toke Binzerimut ingerlateqqinnginnerani pimoorullugu qinnuiginnissutigaa. .
Kristian Reinert Davidsen Savalimmiuni Tusassimut assingusumi pisortaanertut atorfininniarluni angerlassaaq. Taamanikkut Tele-Postiusimasumi atorfininniarluni suliffeqarfik taanna qimassimavaa.
