Aaqqissuussat: Inerteqquteqarneq atuuteqqilerpoq

Tunillatsissimasumik ataatsimik Nuummi paasisaqartoqarmat, aaqqissuussisarnerit pillugit nalunaarut atuutsinneqaqqilerpoq. Namminersorlutik Oqartussat tusagassiorfinnut nalunaaruteqarlutik ilisimatitsipput. Nalunaarummi ilanngullugu ilisimatitsissutigineqarpoq, tuniluunnerup paasiniarneqarnissaanut suliniutit pisariallit aallartinneqareersut.

Suliffeqarfissuarmi Nuummiittumi sulisut pingajussaat ulluni kingullerni Covid-19-imik tunillatsissimasut paasineqarput. Inuit 80-it missaanniittut tunillatsissimasut taakku suleqataat mattusimasussanngortinneqarsimapput, tallimanngornermilu ullup-qeqqata siorna misissorneqarnissaannik neqeroorfigineqarsimallutik.

Nunatta Nakorsaanerata pisoq Nuummi tunillaassuuttoqalersutut nassuiaatigaa, tamannalu siusinnerusukkut atuussimanngilaq.

Aaqqissuussinerit katerisimaarnerillu

Tunillatsittoqarsimanera pissutigalugu, kommuninit allanit peqataasoqartussatut pilersaaruteqarluni Nuummi aaqqissuussinernik ingerlatsisoqaqqusaajunnaarpoq.

Inerteqqulli tamanna peqqissutsimut aarlerinaateqanngippat Nunatta Nakorsaaneqarfiata immikkut akuersissuteqarfigisinnaavaa.

Namminersorlutik Oqartussanit ilisimatitsissutigineqarpoq, pisimasumut tunngatillugu inaarutaasumik tamakkiisumillu aatsaat ullut tulliuttut ingerlanerini paasisaqartoqassasoq.

- Inaarutaasumik paasisaqartoqareerpat Nunatta Nakorsaaneqarfiata inerteqqut immikkut akuersissuteqarfigineqarsinnaanersoq aatsaat nalilissavaa. Nunatta Nakorsaaneqarfia allamik nalunaaruteqanngippat inerteqqut soorunami atuutissaaq, Namminersorlutik Oqartussat allapput.

Namminersorlutik Oqartussat mianersoqqusisut

Innuttaasunut tamanut tunillaassuuttoqarnissaanut aarlerinaatit annikillisinniarlugit maleruagassanik malinninnissaq eqqumaffigilluinnassagaat innersuussutigineqarpoq:

• Qanillinaveersaarit.
• Assavit eqqiluitsuutinnissaat eqqaamajuk.
• Nappaammut ersiuteqaruit angerlarsimaannarit, misissortinnissarlu siunertaralugu erngertumik najukkanni napparsimaveqarfik attavigiuk.