Aaqqissuusseqqinneq ukiuni aqqaneq-marlunni ingerlanneqartoq unitsinneqassaaq
Ilinniartitaanermik aaqqissuusseqqinneq 2011-meersoq "inuussutissarsiornermut ilinniarfinnik siunertaasutut ineriartortitsinngilaq iluanaarutaasinnaasunillu angusaqartitsinani." Atuagarsorluni ilinniarfiit ilinniarfiit Ilinniartitaanermut Naalakkersuisoqarfimmut tunniunniarnerinut, siulersuisullu maannamut ilinniarfinnut akisussaasimasut soraarsinniarneqarnerinut tamanna nassuiaatigineqarpoq.
Tusarnersimagaluaqaaq, Danmarkimilu inuussutissarsiornermik ilinniarfiit namminersortut pisortanit aqunneqanngitsut isumassarsiorfiusimapput. Periuseq tamanna Kalaallit Nunaanni politikerinit ukiut aqqaneq-marluk matuma siorna atuutilersinneqarsimavoq.
Inatsisilli nutaat Naalakkersuisut tusarniaassutigisaat naapertorlugit tamanna atorunnaassaaq.
Pilersaarutaalerpoq assassorluni ilinniarfiit siunissami qitiusumik allaffissornermut atassuserneqarnissaat inatsisitigullu Namminersorlutik Oqartussat allaffissorneranni nalinginnaasumi, soorlu ilinniarnertuunngorniarfinni siulersuisoqanngitsuni, inissinneqarnissaat.
Aarleqqutissat
Siunnersuutip tusarniaassutigineqarnerani oqaaseqaatini allassimavoq aningaasanut missingersuutit malikkuminaatsinneqarsimasut.
Ukiup nikinneraniilli Ilinniartitaanermut Naalakkersuisoqarfik Deloitte ikiortigalugu ilinniarfiit aningaasaqarnerannut tunngatillugu sukumiisumik misissuisimavoq, Campus Kujalleq assersuutissaalluartut ilagaat, tassani aningaasaqarnerup aqunneqarnera ajorluinnarmat.
Campus Kujallermi missingersuutit qaangerlugit aningaasartuutit:
- 2022: 7,2 millionit koruunit.
- 2021: 8 millionit koruunit.
- 2020: 7,4 millionit koruunit.
- 2019: 2,3 millionit koruunit.
- 2016: 5,6 millionit koruunit.
Maluginiarneqarpoq atuinnginneruneq atuivallaarnertut isornartorsiorneqarnissamut pissutissaqarluartoq, tassami "aningaasaliissutinut aqutsisinnaannginnermik takutitsinerummat".
Assersuutigalugu Niuernermik Ilinniarfik 2022-mi aningaasaliissutigineqartunit 11 millionit koruunit missaannik atuinikinneruvoq, ukiullu siuliani 4 millionit koruunit missaannik atuinikinnerulluni.
Campus Kujallermi pissutsit pissutigalugit naalakkersuisoqarfik ukiup nikinneraniilli qaammammut missingersuutinik malinnaanermut ataatsimiinnernik nakkutilliivoq, tamannalu nukinnik annertuumik atuiffiuvoq. "Nakkutilliineq aningaasaqarnikkut unammilligassanik aaqqiinissamut iluaqutaasimasoq," Campus Kujalleq pillugu allassimavoq.
Misiliilluni suliffiit ikinnerusut
Ilinniartitaanermik aaqqissuusseqqinnermi iluatsinngitsut ilagaat ilinniartunut ilinniarnermut atatillugu suliffissanut periarfissat. Aaqqissuusseqqinneq ukiut aqqaneq-marluk matuma siorna atulermat suliffiit ilinniarnermi misiliilluni suliffiusinnaasut 1.000-it missaanniipput, maannali 800-t missaannaanniillutik.
- Aammattaaq atuagarsorlutik ilinniagaqartut ukiui pillugit kisitsisit tunngavigalugit paasineqarsinnaavoq, atuagarsorluni ilinniarfiit inuusuttut ilinniagaqarnissamik pisariaqartitaat annikitsuinnarmik matussusertaraat, inatsisissatut siunnersuummut 2024-mi upernaakkut ataatsimiinnermi saqqummiunneqartussamut oqaaseqaammi allassimavoq.
Tusarniaaneq januaarip 18-iannut killeqarpoq.