Aarhusimi kalaallit illuutaat: Ullukinneq malunnartinneqassaaq
Aarhusimi kalaallit illuutaanni decembarip 21-ani ullukinneq malunnartinneqassaaq
Decembarip aallaqqaataani juullip ulloriaa Aarhusimi ikinneqarpoq – kalaallit ileqquat pingaartoq, aammalu ataatsimuussuseq ilorrisimaarnerlu pillugit oqaluttuartoq.
- Misigissutsit annertuut juullip ulloriaanut atassuserneqartarput. Pilluarnermik, asanninnermik, ilaqutariissusermik, nuannaarnermik, meeraanermik ataqatigiinnermillu takutitsisuuvoq, paasissutissiisartoq Hanne Bjerre Lassen, Sermitsiaq.AG-mut oqaluttuarpoq.
Ulloriaq ikinneqarmat kalaallit erinarsoqatigiit Aningaaq erinarsorput, kingornalu glögginik æbleskivinillu sassaalliisoqarpoq.
Julebazar
Dalgas Avenuemi illumik kusanartumik atuisut decembarip 21-ani ullukinnerup malunnartinneqarnissaanut qaaqqusaapput.
- Kaageeraqarlunilu æbleskiveqassaaq, juullimullu tunissutissanik kingullernik illup pisiniarfiutaani imaluunniit nammineq pinnersaasianik sanalukkanillu allanik nerrivinni pisinissamut periarfissaqassaaq. Aaqqissuussineq ukiup naggaserneranik malunnartitsinerussaaq, ukiumullu qaangiuttumut naggasiinissatsinnut periarfissiissalluni, qaammariartoqqilernerata tikilluaqqunissaanut periarfissiissalluni, Hanne Bjerre Lassen paasissutissiivoq.
Ileqqutoqqamik attassineq
Vor Frue Kirkemi naalagiareernerup kingorna kaffisortitsineq ukioq manna aaqqissuussani kingullerpaajussaaq. Decembarip 23-ani kalaallisut naalagiareernerup kingorna illup kaffisortitsisarnera ileqqutoqaavoq. Danmarkimi palasi kalaaleq, Marianne Lynge Krog, naalagiartitsissaaq, kingornalu kalaallit illuutaannukartoqarsinnaavoq, kaffi kaageeqqallu sassaalliutaassallutik.
- Juullip nalaani piffissaq ataatsimoornissamik pisariaqartitsiviusarpoq. Inuppassuit Kalaallit Nunatsinni ilaquttaminnik maqaasisarput, tamannalu inissaqartinneqassaaq. Kalaallit illuutaanni juullip nalaa maqaasisaqarneq inissaqartinniartarparput, taamaattorli aamma nuannisaqatigiittarpugut, erinarsoqatigiittarpugut, oqaloqatigiittarpugut illaqatigiittarlutalu aammalu ilaanni nipaallisimaqatigiittarluta. Devemberip qaammataata ullui nuannersuutinniartarpagut, Hanne Bjerre Lassen oqarpoq.