Aarlerisaarisoqaraluartoq: Tunumi qilalugarniartoqaannarnissaa Naalakkersuisut siunnersuutigaat

Tunumi qilalukkanik qernertaqassuseq ukiuni kingullerni isiginiarneqartorujussuuvoq.

Ilisimatuussutsikkut peqassuseq ernumassutigineqarpoq, Tunumilu qilalukkanik qernertanik pisaqartoqannginnissaa NAMMCO-mit 2019-imili siunnersuutigineqarpoq, taamaalillutik eqqissisimatinneqarlutik amerliartorniassammata.

Kisianni Naalakkersuisunit siunnersuutit naapertorlugit Tunumi qilalukkanik qernertanik piniarneq 2024-mi ingerlaannarsinnaavoq.

Naalakkersuisummi pisassiissutit 50-it nunap immikkoortuani ingerlateqqinniarlugit siunnersuuteqarput:

Neqinik nutaanik qulakkeerinninniartut

- Naalakkersuisut Tunumi qilalukkanik qernertanik piniartoqaannassasoq aalajangernikuuaat, innuttaasunut nutaanik neqissaqarniarneq eqqanaarniarlugu, pisassiissutinut siunnersuummi taama tunngavilersuisoqarpoq.

Naalakkersuisut siunnersuineq ima eqikkarpaat:

- Inassuteqaateqarnermi nutaanerpaami 2019-imi tiguneqartumi inerniliunneqarpoq, Tunumi qilalukkanut pissutsit ima ilungersunartigisut, allaat Tunumi qilalugaqatigiiaat immikkoortut pingasut pisaqarfigineqarnissaat nammanneqarsinnaanani. Tassa imaappoq; qernertaqatigiiaat amerlinissaannut 70 %-imik ilimanaateqartitsinermut aaqqissuussineq inassuteqaateqarrnermi atorunnaarsinneqartariaqassasoq, taamaalillunilu Tunumi qernertaqatigiit eqqissillutik amerliartorsinnaassallutik.

Qaqortat 20-nit 30-t pisarineqartut

Tunumut tunngatillugu Naalakkersuisut siornatigut teknikikkut pisassiissutinik taaneqartartunik qaqortanik 30-nik, 2022-2027-imi atuuttussamik pisassiinikuupput.

Tunumi qilalukkat qaqortat pillugit qernertat assigalugit biologit piniartoqannginnissaanik siunnersuipput, qaqortat sumiiffimmi qaqutigoormata.

- Ulloq manna tikillugu 20-it pisarineqarsimasutut nalunaarutigineqarsimapput, taamaasilluni 10-it 2027 tungaanut sinnerupput, Naalakkersuisut allapput, pisassiissutinullu neqimik nutaamik pisariaqartitsisoqarneranik tunngavilersuillutik.

Kitaani aamma siunnersuinerit qaangerneqarput

Naalakkersuisuniit Kalaallit Nunaata Kitaani 2024-mut qilalukkanut qernertanut qilalugartassiissutit ataatsimut 455-iunissaat siunnersuutigineqarpoq, 2023-mi pisassiissutit attanneqarlutik.

Naalakkersuisoq oqarnerat naapertorlugu Kalaallit Nunaata Kitaani ilisimatuussutsikkut siunnersuineq nutaaq qilalukkat qernertat piujuaannartumik tunngavillit pisassiissutit 117-imiit 267-imut inissisimavoq, periarfissaq sorleq atornerlugu apeqqutaalluni.

Kitaani siunnersuineq aamma qaangerneqarpoq.

Naalakkersuisut maluginiaqquaat, misissuinerni inernerit tiguneqareerpata pisassiissutit annertussusaat nalilersoqqinneqarnissaat.