Aasiaat: Coronamik tunillatsissimasoq peqqisseqqissimavoq
Nunatsinni Nakorsaaneqarfik naapertorlugu, Aasianni coronamik tunillatsissimasoq maanna peqqisseqqissimavoq. Najukkami immikkut innersuussutigineqartut atorunnaarsinneqarput.
Oqartussat oktobarip 21-ani ilisimatitsissutigaat, Aasianni inuk ataaseq coronavirusimik tunillatsissimasoq.
Tunillatsittoqarsimanera mattusimanissamut malittarisassat malinneqarsimanngimmata annertuumik kinguneqarsimavoq, tamatumami malitsigisaanik Inatsisartut matugallarneqarput aamma Sisimiuni KTI-mi ilinniartut tamarmik angerlartinneqarsimapput.
Tamatumali kingorna allanik tunillatsittoqarsimaneranik nalunaaruteqartoqarsimanngilaq, Nunatsinnilu Nakorsaaneqarfik naapertorlugu maanna tunillatsissimasoqanngilaq.
Nakorsaaneqarfiup nittartagaani atuarneqarsinnaavoq, nunami maani tunillatsissimasut katillutik 17-iusimasut, taakkulu 17-it tamarmik peqqisseqqereersut.
Naalakkersuisut Facebookikkut saqqummiussinerminni allapput, Aasianni tunillatsittoqarsimaneranut atatillugu immikkut innersuussutit atuutsinneqalersimasut maanna atorunnaarsinneqartut:
Innersuussutit atorunnaarsinneqartut
- Aasianni COVID-19-mik tunillatsissimasoq maanna ajorunnaartoq nalunaarutigineqarpoq. Sapaatit akunnerillu marluk ingerlanerani katerisimaartarnerit, nalliuttorsiornerit kaffisortitsinerillu pillugit Aasiammiunut innersuussutit immikkoortut atorunnaarsinneqarput, Naalakkersuisut allapput.
Nunatsinni Nakorsaanerup Henrik L. Hansenip Aasianni tunillatsittoqarsimasoq paasineqarmat innersuussutit immikkut ittut taakku atuutsilersimavai.
Innersuussutigineqartut tassaapput, innuttaasut katerisimaarnissamik, nalliuttorsiornissamik kaffisortitsinissamillu aaqqissuussanut peqataanaveersaarnissaat.
Mattusimasussaaneq atuutsinneqaqqilersoq
Aasianni inuk coronamik tunillatsissimasoq Danmarkimiit Kalaallit Nunaannut tikissimavoq, tikinnerminiillu ullut tallimassaanni misissortikkami tunillatsissimasoq paasineqarluni.
Nunatsinni nakorsaanerup arlaleriarluni oqaatigisarsimavaa, assersuutigalugu Danmarkimi nunanilu allani arlalinni coronamik tunillatsissimasut arlalippassuummata, Kalaallit Nunaanni tunillatsissimasunik inoqartarnissaa oqartussanit naatsorsuutigineqartoq.
Septembarip qaammataata naalernerani Kalaallit Nunaannut tikittut tamarmik ulluni 14-ini mattusimasarnissaannut piumasaqaat oqartussanik atuutsinneqaqqilerpoq. Tikittulli tikinnerminnit ullut tallimat qaangiunnerani misissorteqqinnerminni tunillatsissimanngikkunik mattusimajunnaarsinnaapput.