Aasianni initaarnissamut utaqqisut amerlisimasut
2022-mi qaammatit pingasut siullerni naatsorsuereernerup kingorna maannamut INI A/S-imi inissiamik attartortunngornissamut utaqqisut 70-inik amerleriarsimapput. Aasianni innissiamik attartortussatut utaqqisut maanna 204-pput.
Aasianni INI A/S-ip ataani inissiamik 2022-mi qaammatit pingasut siulliit ingerlaneriniilli utaqqisut allattorsimaffianni allatsissimasut 70-it sinnerlugit amerleriarsimapput.
Ineqarnermut Naalakkersuisoq Erik Jensen (S) Kristian Jeremiassenip (IA) Aasianni inissiamik attartornissamut allatsissimasut pillugit, inissialiortitsinissamullu pilersaarutit pillugit paragraf 37 atorlugu apeqquteqaataanut taama akissuteqarpoq.
Naalakkersuisup paasissutissaatai naapertorlugit Aasianni inissiamik attartornissamut utaqqisunut allatsissimasut maanna 204-pput.
- INI NS ilisimatitsivoq, Aasianni inissarsiortut 204-usut, taakkunanngalu 18-it aamma 35-t akornanni ukiullit 95-iusut.
- Nittartakkami allassimavoq, 31. marsi 2022 aallarnerfigalugu Aasianni inissiamut utaqqisarneq agguaqatigiissillugu qaammatinut aqqanilinnut naatsorsorneqarsimasoq, Erik Jensen allappoq.
Inuusuttut inissiassaannik sanaartortoqarpasilinngitsoq
Kommune Qeqertalik namminersorlutillu oqartussat inissiaqarfinni portusuunik pingasunik Aasianni sanaartortoqarnissaanut aningaasaleeqatigiinnissamik isumaqatigiissuteqarnikuupput. Inissiat sanaartungassat naammassippata inissianut utaqqisut 60-inik ikilisinneqarsinnaassapput.
Inatsisartuni ilaasortaq Kristian Jeremiassen Aasianni inissarsiorneq pillugu apeqqutinik arlalinnik nassiussaqarsimavoq, taakkununnga ilanngullugu inuusuttunut inissialiortitsinermut pilersaarutit.
Naalakkersuisulli Aasianni inuusuttunut inissialiortitsinissamut maannakkut pilersaaruteqarpasinngitsut, akissummi atuarneqarsinnaavoq.
Naalakkersuisut naatsorsuutigaat illoqarfinni pingasuni inuusuttunut inissiat 2024-imi atulerneqarsinnaasut.
Illoqarfiit ukuupput:
Upernavik: inuusuttunut inissiat katillugit sisamat
Qasigiannguit: inuusuttunut inissiat katillugit sisamat
Tasiilaq: inuusuttunut inissiat katillugit arfineq-pingasut
Inuusuttunut inissialiortitsinissamut Uummannami, Kangaatsiami Ittoqqortoormiinilu aamma pilersaaruteqartoqartoq, Erik Jensen ilanngullugu ilisimatitsivoq. Pilersaarutini Aasiaat taaneqanngilaq.