Aatsitassanik ujaasineq IA-p unitsikkallaqquvaa
– Issiaviit marluk akornannut inisseratarsinnaavugut, Kuupik Kleist oqarpoq
Ullumikkut ujaasinissamut akuersissutit 64-it, katillugit 24.522 kvadratkilometerinik - imalunniit Danmarkip affaatut angitigisutut - annertussusillit, tunniunneqarsimapput.
Maanna Inuit Ataqatigiit siulittaasuata Kuupik Kleistip siunnersuutigaa Kalaallit Nunaata inissisimaffissarsiorluni ujaasineq unitsikkallassagaa.
– Taamaanngippat issiaviit marluk akornanni inisseratarsinnaavugut, Inatsisartut ammaanersiorlutik oqallinneranni partiip siulittaasua oqarpoq.
– Uuliamik qalluineq politikkikkut aningaasarsiornikkullu kiffaanngissuseqarnerulernermut aqqutissaasinnaavoq qaninaariffik, tamannali peqatigalugu uulia Issittumi silap allanngorarneranut pissutaavoq.
– Aatsitassanik piiaaneq aamma aningaasarsiornitsinnik kivitsissutaasinnaavoq, piiaaffinnulli nunat allamiorpassuarnik tikisitsisalersinnaavugut, pissutigalugu nammineq sulisartunik ilinniarsimasunik pisariaqartitatsinnik peqannginnatta.
Kuupik Kleistip qaninnerusumik eqqarsaatigeqquvaa Kalaallit Nunaata aatsitassanut akuersissutinik tunniussiunnaartarnissaa, nunamik piginnittuunermik aammalu nunap pisuussutaanik atuinissamut apeqqutip qulaajarneqareernerata tungaanut.
– Qularnarunnaareerpat suliniutit tamakkua kalaallinut innuttaasunut iluaqutaassasut, pissutsit nalileqqissinnaavagut, IA-p siulittaasua oqarpoq.