Aatsitassanut siulittaasunngoqqittoq
Folketingimut ilaasortaq Kim Andersen, Venstre, Kalaallit Nunaanni Aatsitassat Pillugit Ataatsimiittartoqatigiinni dronningip siulittaasunngorteqqippaa.
Kim Andersenip Christian Mejdahl ataatsimiittartoqatigiinni siulittaasutut kingoraarpaa, taanna Folketingimi siulittaasunngormat. Dronningillu kunngip aalajangersagaatigut maanna Kim Andersen ukiunut sisamanut nutaanut, 2011-mi martsip tungaanut, siulittaasunngorteqqippaa.
Kim Andersen Venstre sinnerlugu folketingimut ilaasortaavoq, Storkreds Østjylandimi Skanderborg-kredsimi qinigaalluni.
Folketingip Inuussutissarsiornermut ataatsimiititaliaani siulittaasuuvoq, Venstrellu akileraarutinut politikkimi oqaaseqartartoralugu, ilaatigullu Kalaallit Nunaannut ataatsimiititaliami ilaasortaalluni.
Kalaallit Nunaanni Aatsitassat Pillugit Ataatsimiittartoqatigiinni ilaasortaapput siulittaasoq, Dronningimit toqqarneqartartoq, qallunaat nunattalu naalakkersuisuisa ataatsimut inassuteqanerat malillugu, kiisalu politikkikkut toqqakkat tallimat, nunatsinni Inatsisartut toqqagaat tallimat Danmarkimilu Folketingip toqqagai tallimat.
Ataatsimiittartoqatigiit suliassaraat aatsitassaqarnermi ineriartornermut malinnaanissaq kiisalu qallunaat naalakkersuisuinut nunattalu naalakkersuisuinut inassuteqartarnerit, ilaatigut misissueqqaarnissamik, ujaasinissamik atuinissamillu akuersissutinut apeqqutini.