ADHD: Tiliup ikiortissaaleqisarneq paasisinnaavaa
Inersimasut arlallit innarluummik suussusiliiffigineqarsimasut, ADHD ilanngullugu, kommunimit ikiorserneqarniarnerup arriinneranik imaluunniit ikiorserneqannginneq pissutigalugu Tiliumut saaffiginnittarput. Kisianni inersimasut innarluummik suussusiliiffigineqarsimasut ikiorneqarumanngippata pinngitsaalillugit ikiorserneqarsinnaanngillat.
Tilioq aamma Kalaallit Nunaanni ADHD/ADD-mut peqatigiiffiup angummut inersimasumut ADHD-eqartumut, sapaatip-akunnerani kingullermi sioorasaarineq pissutigalugu politiinit tigusarineqartumut ataataasup oqariartuutaa ilisarisinnaavaat.
Angummut inersimasumut ataataasoq ikiorneqarumalluni kommunimut arlaleriarluni saaffiginnittarsimavoq.
Tassanili pissutsit arlallit apeqqutaapput. Tassami innuttaasoq inersimasoq nammineerluni kommunimut aatsaat saaffiginnippat, kommuni ikiorsiisinnaavoq. Inersimasut innarluummik suussusersiffigineqarsimasut ikiorserneqarnissamik kissaateqanngippata, kommunip ikiorsinnaanngilai.
Inuit innarluutillit illersuisoqarfiata Tiliup suliami pissutsit tamaasa ilisimatinnagit suliat ataasiakkaat oqaaseqarfigisinnaanngilai. Kisianni pisuni inersimasoq ikiorneqarnissamik imaluunniit tapersersorneqarnissamik kissaateqartillugu, sulianik suliarinninnerup arriittarnera aporfittut misigineqartarpoq, inuit illarluutillit illersuisuat, Anja Hynne Nielsen, Sermitsiaq.AG-mut taama oqarpoq.
- Innuttaasut innarluutillit – ADHD-ertut ilanngullugit – naleqqutinngitsumik sulianik suliarinninnermut piffissaq atorneqartartoq aamma kommunip tungaanit ikiorsiineq amigartoq misigikkajuttaraat Tiliup nalunngilaa. Aammattaarlu tamanna ajoraluartumik ajornartorsiutit anneruleriartornerinik aamma akisunerulernerinik kinguneqartarpoq – innuttaasunut ataasiakkaanut, ilaqutaasunut aamma inuiaqatigiinnut, Anja Hynne Nielsen Sermitsiaq.AG-mut oqarpoq.
Inuiaqatigiit paasinninngitsut
Nunatsinni ADHD/ADD-ertut peqatigiiffiata inersimasoq kommunimit ikiorneqarsinnaanngitsoq pillugu suliap oqaaseqarfiginissaa mianersuuppaa. Peqatigiiffimmili siulittaasup, Josephine Holdingip oqaluttuaraa, ilaasortat inuiaqatigiinni paasineqanngitsutut misigisimasartut.
- Ilaasortavut arlallit ADHD/ADD-mik innarluuteqarlutik suussusersiffigineqarsimasut inuiaqatigiinni paasineqarnissamik pisariaqartitsillutik oqariartuuteqarput, ajortumik isigineqarneq aamma ADHD/ADD-eqarnerup suuneranik paasinnittoqartannginnerat misigisarpaat, Josephine Holding Sermitsiaq.AG-mut taama oqarpoq.
Tiliup 2017-imili pilersinneqarneranit innuttaasunit saaffiginninnerit pissarsiarisaat kommunini sulianik suliarinnittarnerit arriinnerannik imaluunniit amigarnerannut tunngapput. Siusinaarluni iliuuseqartarneq qulakkeerneqartariaqartoq Tiliup tassani erseqqissarpaa, taamaalilluni innuttaasut pisariaqartitsinerminni piaarnerpaamik tapersersorneqarlutillu ikiorserneqartarniassammata. Tassani meeqqanut inersimasunullu suliat pineqarput.