AG: Ajorpallaaqaaq
Nuummi pineqaatissinneqartunut inissiisarfimmiittut atukkatik naammagiunnaarpaat. Isumaginnittut naammaginanngitsumik ingerlatsisut misigisimapput, pisinnaatitaaffigik ataqqineqanngimmata. Matut parnaaqqasut tunuini pissutsit pillugit allatut sapileramik Folketingip Ombudsmandianut naammagittaalliuteqarsimapput, sunngiffimmi sammisassanut periarfissat annikippallaaqimmata, inatsisiliornermillu ilisimasaqarneq aamma amigaataagunarmat. Eqqortumik iliornissamik misigissuseq eqqarsaatigalugu inuit parnaarunnerisigut pitsaanerulersinneqarsinnaanerat oqallisigineqarsinnaavoq. Inuilli aserorsarneqarnissaat kialuunniit naammagisinnaanngikkaa qularutissaanngilaq.
Pineqaatissinneqartunut inissiisarfimmi pissutsit inatsisilerinermut naleqqunnersut uagut aalajangersarsinnaanngilarput. Taamaallaalli tikkuarsinnaallugu - soorlu aviisip iluani allaaserisami atuarneqarsinnaasoq - pissutsit misissuiffiginissaannut pissutissaqarluartoq. Nunatsinni isertitsisarfinni arlalinni pissutsit Folketingip Ombudsmandiata siornagut isornartorsioreersimavai. Taakkulu iluarsiivigineqarput. Aatsaalli Ombudsmandi 4.000 km-it atorlugit Danmark-imit Kalaallit Nunaannut qanoq iliuuseqarniarluni angalareersoq. Tamannalu soorlu pisariaqarsimanngikkaluartoq.
Nuummi pineqaatissinneqartunut inissiisarfimmi pissutsit inatsisiliornermik malinninngippata, ulluinnarni aqutsisut kisimik pinnatik aammali inatsisinik atortitsinermut ministeri Brian Mikkelsen ajornartorsiuteqarsimassapput. Inatsisinik atortitsineq kingulliulluni taaneqartup ilisimaneqartutut pingaarnertut akisussaaffigaa. Danmark-imi parnaarussivinni parnaarussat atortorissaarluartunik timigissartarfeqarnerat ilisimaneqarluarpoq. Timigissarneq iluaqutaalluartutut ilisimaneqarmat. Timigissarnermi atortut ilaat soorunami navianarsinnaasarput, soorlu oqimaalutat kivittakkat, kamaammernerup nalaani sakkutut atorneqarsinnaasut. Ilinniagartuutulli soraarummeersimasariaqanngilaq soorlu cykelimik timigissaammik natermut aalajangerlugu ikkussissagaanni - taassumalu aserfallatsaalinissaa isumagissagaanni.
Pineqaatissinneqarsimagaanni soorunami atugarissaarluni inuusoqarsinnaanngilaq. Pitsaasumilli anguniagaqarfiusinnaanngilaq pineqaatissinneqarsimasut ukiuni arlalinni ineqarfeqartinneqarnissaat aserfallassimasunik putoorsimasunillu pequtilinnik. Tamanna pisortat qangali aaqqiivigisimassagaluarpaat. Akiligassallu inatsisinik atortitsinermut ministerimut Brian Mikkelsen-imut nassiunneqarsinnaapput, inatsisinik atortitsinermi missingersuusianik atornissaannillu tamakkiisumik akisussaasumut. Kalaallit Nunaata nunatut ineriartorsimannginnerusutut pineqarneratigut Danmark ukiorpassuarni aningaasanik sipaaruteqartarsimavoq, isertitsisarfiit inissiisarfiillu eqqarsaatigalugit. Tamatumani Herstedvester-imi parnaarussivik assersuutissaalluarpoq. Kalaallit Nunaanni parnaarussiviliornissamut taarsiullugu naalakkersuisut paarlagaattut ukiorpassuarni akikinnerpaamik aaqqiissutissaqarniartarsimapput: Kalaallit pineqaatissinneqarsimasut Danmark-imut aallartinnerisigut. Eqqartuussisarnermi inatsimmi nutaami tamatumani allannguutissanik siunnersuuteqartoqaraluarpoq, pineqaatissinneqartunut inissiisarfinnik nutaanik sanaartornikkut. Oqaluttuarisaanerulli tamanna erseqqissumik ersersippaa, isumaliutiinnartakkallu ullormiit ullormut allanngortinneqarsinnaanngillat. Aaqqissuussisoqarnissaanut piffissanngorpoq. Annikitsut annertuullu eqqarsaatigalugit.