AG isumaqarpoq: Matu ikersilaarsimasoq
Naalakkersuisut uranisiorluinnannginnissamik pinngoqqaatinillu radiup qinngorneranik akulinnik piiaanissamik polikkeqarnertik suli attakkaluarpaat. Imaanngilarlini uranimut politikki allanngunngitsoq, soorlu taama aatsitassanut naalakkersuisoq Ove Karl Berthelsen tusagassiuutitigut nalunaarummi allattoq. Nutaartatut aatsitassarsiorfiit uranisiornissamit allanik siunertaqarlutik ujaasisut Aatsitassanut pisortaqarfimmut qinnuteqarsinnaalerput »Avatangiisinut sunniutaasinnaasut nalilersorneqarnissaannut kiisalu inuiaqatigiit tamakkiisumik isigalugit nammanneqarsinnaasumik ingerlatsisoqarsinnaanermut«, pinngoqqaatinik radiup qinngornerinik akulinnik naammattuuigaangamik. Periarfissaq tamanna siusinnerusukkut periarfissaasimanngilaq, tassaavorlu aamma Naalakkersuisut »pinngoqqaatinik radiup qinngornerinik akulinnik ujaasinerup piiaanerullu kingunerisinnaasaata« ilisimasaqarnerulernissamik kissaataata ilaat.
Allatut oqaatigalugu maannakkut aatsitasarsiorfiit misissuinerminnik ujaasinerminnillu unitsitsiinnartarunnaassapput, aatsitassanik allanik ujaasinerminni uranimik naammattuuigaangamik. Imaanngilarli aatsitassarsiorfiit aatsitassanik uranitalinnik piiaasinnaalersut. Tassani suliffeqarfiit pinngortitamut inuiaqatigiinnullu qanoq kinguneqarsinnaanermik naliliinerat apeqqutaassaaq, tamannalu Aatsitassanik pisortaqarfimmi aalajangiivigineqassaaq. Periarfissarli ammaanneqarpoq. Taamaanngippammi Naalakkersuisut allannguinerat paasiuminaatsuussaaq. Suliffeqarfiit soorunami aningaasarpassuit atorlugit naliliinissamik akiligassaminnik qinnuteqarnavianngillat, sumiiffimmi uranitalimmi aatsitassanik piiaanissaminnut periarfissaqartinneqarnissartik ilimaginngikkunikku, uppernarsarsinnaatillugu tamanna avatangiisinut peqqinnissamullu illersorneqarsinnaasumik pisinnaassasoq. Takujuminaappoq pisortat suut tunngavilersuutigalugit soorlu Greenland Minerals and Energyp Narsarmi Kuannersuarni aatsitassanik qaqutigoortunik piiaanissaminnut qinnuteqaataat itigartissaneraat, suliffeqarfiup uppernarsarsinnaappagu aatsitassat uranitaqaraluartut tamanna isumannaatsumik pisinnaasoq.
Naalakkersuisut matu ikersilaarpaat. Aammali misissuinissaq akisoqisoq nunarsuarmi tamarmi aatsitassarsiorfinnut suliassanngortippaat, nunatsinni avatangiisinut qullersaasut – tassalu maannakkuugallartoq Aatsitassanik pisortaqarfik – taakkununnga illuatungiuttutut inissillugu. Suliassaq tamanna pisortaqarfimmut sulisuinullu 30-t missaaniittunut suliassaassaaq annertooq, aatsitassarsiornerummi iluani allanik annertuunik aamma suliassaqarput. Aamma ajornartorsiutaavoq, Aatsitassanut pisortarfiup aatsitassarsiorniartunik pilerisaariutigaluni aamma tassaassasoq aatsitassarsiornissamut piiaanissamullu akuersissutinik tunniussisussaq. Taamatut taputartuussineq ilaatigut taamaatinneqartussaavoq, Naalakkersuisut aalajangerpata avatangiisinut tunngasortaa nuutinneqassasoq, taamatulli aaqqiineq suli nangiarnartortaqarpoq.
Aatsitassanik ujaasinissamut maleruagassat Naalakkersuisunit allanngortinneqarnerannut peqqutaaqataavoq qinigaaffimmi uani aatsitassanut inatsit nalilersoqqinniarneqarmat. Ilimagineqarpoq uranimut tunngatillugu apeqqut – maannakkut aatsitassanut inatsimiinngitsoq – ilanngunneqassasoq. Inatsisip naleqqussarnera pissaaq siunissami aggersumi aatsitasarsiorfiit Aatsitassanut pisortaqarfik peqatigalugu misissuinermi akuersissuteqarfigineqartussaasut inerneri tunngavigalugit. Pinngoqqaatinik radiup qinngornerinik akulinnik misissuinissami piiaanissamilu uranisiorluinnanginnissamik politikkeqartoqaraluarpoq. Nutaartatulli periarfissaalerpoq uraneqarfimmi aatsitassanik allanik piiaanissaq.