AG isumaqarpoq: Nersutit inaat guultitigaq
Piffissami inuit tamat naalakkersueqataanerannik pingaartitsiffiusumi naalakkersuinermik kisermaassinerup qunutitsiffiusup ukiuni untritilikkaani naalagaaffeqatigiinnik naakkittaatsuliorfiusimasup suli nersorniarneqarnera pissutsit killormut samminerattut ippoq: Danmark-imi kunngikkormiut. Dronning Margrethe tallimanngorpat 70-iliilluni inuuissiussaaq. Pisup tamanut saqqummiunnissaani tusagassiorfiit tamarmik piareersimapput, uagut inuunitsinnut nalinginnaasumut nutaaliaasumullu kunngikkormiut soorlumi ilaalluinnartut tusartikkumallugu. Danmarks Radio aningaasassaaleqisoq isiginnaartartunit akilersorneqartoq ulloq taanna nalliuttorsiornissamit nalunaaquttap akunnerini aqqaneq-marlunni toqqaannartumik aallakaatitsinissamik soorlu pilersaaruteqarpoq. Kunngikkormiunik saqqummersitsiniarneq ingasaassaq, tusagassiortorpassuarnit maliguutiinnartunit suli sakkortusarneqartoq, nipaatsumik oqalunnermikkut imaluunniit saamasumik allaaserisaqarnermikkut kunngikkormiut nalliuttorsiortarnerinik isiginnaartartunut atuartartunullu paasissutissiisunit.
Kunngikkormiut ataannarsinnaanerat pillugu tusagassiorfiit ikittuinnaat isornartorsiorlutik apeqqusiisarput. Ilaqutariit ukiumut 95 millioner koruuninik akileraarutitaqanngitsunik akissarsiaqartinneqartut, niuertarfissuarni immaqa pisiniarsimanngisaannartut, imaluunniit qaammatip naalernerani aningaasanik amigaateqarsimanngisaannartut. Illussaarsuit arlallit aserfallatsaalinerannut, kunngikkormiut umiarsuaata inuttaqartinneqarneranut, timmisartumut ilaalluni angalanernut il.il. aningaasat millionillit pingasunik kisitsisitallit akileraartartunit akilerneqarsimasut ilanngunneqassapput. Aningaasat taakku allani iluaqutaanerusumik atorneqarsinnaasut isumaqartoqarsinnaavoq. Taamatut aningaasarpassuarnik atuisarneq naalagaaffeqatigiinni innuttaasunit amerlanernit akuersaarneqartoq taamaattoq misissuinerit tamarmik takutippaat. Kunngikkormiullu imminnut nittarsaannissartik paasilluarsimavaat. Nunarsuarmi avissaartuuffiusumi amerlasuunullu paasiuminaatsumi nukissamik ataatsimut katersuuffiusutut tamanna takutitsineruvoq, qangali pingaartitat atorunnaarsinnaanerannik navianartulimmi.
Kunngikkormiut ataannassappata dronningikkut kunngissakkullu Kalaallit Nunaannut sinniisuulluarsimanerat isumaqatigisariaqarpoq, tamatigut ajunngitsumik eqqaaneqartartoq. Kalaallit Nunaannut akuttunngitsumik tikeraartarnerat tamani erseqqissaataasarluni, naalagaaffeqatigiinnili namminersortut aappaat, Savalimmiut, piumavallaanngikkaluarluni tikeraarneqartartutut paasinarluni. Taamaalilluni paasineqarluarsinnaavoq partiini siulersuisut arlallit ullumikkut aviisimi kunngikkormiunik nersorinninniarnerujussuat, minnerunngitsumik 70-iliilluni inuuissiortussaq pillugu. Pujortarneq peqqinnissamut navianartoq ilisimaneqaraluartoq, taamaattoq pujortarunnaarnissaq ajornakusoortoq ilisimaneqarpoq.
Nutaaliaasumilli inuit tamat naalakkersueqataaneranni kunngikkormiut annertuumik akerliunerat takuneqarsinnaavoq, kikkut tamarmik assigiinnissaat assigiimmillu periarfissaqarnissaat pingaartinneqarmat. FN-illu inuit pisinnaatitaaffii pillugit isumaqatigiissutaanut kunngikkormiut aamma akerliulluinnarput. Kunngikkormiut atugarissaarlutik inuupput, siumulli aalajangersarneqareersut malillugit allatut ajornartumik inuusariaqarlutik, namminneq aalajangersimanngisaminnik. Namminneq inuunerminnit inussiaataallutik. Kunngikkormiunut ilaqutariinnut ilaajunnaaraluarunilluunniit, inuinnartullu inuulernissaminni pisinnaatitaaffiit akeqanngitsut pigiunnaarnissaat aalajangiukkaluarunikku, taamaattoq inunnit maluginiarneqartuassapput. Kunngikkormiunut ilaqutaanerminit tunuarsimasoq inuunermi sinnerani tusagassiutinit piumaneqarluarluni sammineqartuassaaq. Allatut oqaatigalugu kunngikkormiut inunnit tamanit sammineqartussatut »eqqartuunneqarsimapput« - piumagunik piumanngikkunilluunniit. Tassami naalagaaffeqatigiit iluanni suli najugaqartillutik. Dronningi tallimanngorpat 70-iliilluni inuuissiorpat amerlasuut soorunami erfalasulissapput. Sunali tamaat eqqarsaatigalugu sunaana nersorniaripput?