AG isumaqarpoq: Oqaatsini atortussat
Oqaatsinik ilinniartitsineq pillugu apeqqut arlalippassuariarluni oqallisigineqartarsimavoq, kalaallillu oqaasii nunatsinni siullertut atorneqartussatut inissinneqarmata nutaamik oqallisigineqalersoq.
Pissusiviusulli sakkortuut tassaapput, marlunnik ajornanngippallu pingasunik oqaasilittut ilinniagaqarnissarput suli anguniartuartariaqaratsigu - soorlu nunani allarpassuarni pissutsit taamaattut, tuluit oqaasii sulinermi oqaatsitut atorneqaleraluttuinnarmata. Ilinniartitaanerpassuit suli Danmark-imi ingerlanneqartariaqarput, tassanilu qallunaatut oqalussinnaaneq piumasaqaatigineqarluni. Tassani ilinniarfissat akeqanngitsumik naalagaaffimmit atugassanngortinneqartarput. Ukiut arlaqanngitsut qaangiuppata aningaasaqarnerput ima siuarsimatigilernavianngilaq, nammineq akiliussilluta annertuumillu inuusuttavut soorlu Canadamut aamma USA-mut ilinniariartortittalissagivut, ilinniagaqarnissami akiliisarnissaq piumasaqaatigineqarmat.
Oqaatsinilli ilinniartitsinermik inuiaqatigiinni inuusuttut kisimik neqeroorfigineqartariaqanngillat. Aatsitassarsiornerup annertusiartornissaa ilimanaateqarmat, aluminiumimik aatsitsiviliortoqarsinnaammat aammalu uuliamik qalluisoqalersinnaammat, nunatsinni suliamik ilinniagaqarsimanngitsut oqaatsinik ilinniartinneqarnissaat amerlasoorpassuartigut pissutissaqarpoq, suliffinni nutaani suleqataalersinnaaqqullugit. Suliffeqarfiit nunani tamalaaneersut imaassinnaavoq oqartut kalaallinik sulisussanik pingaarnertut atorfinitsitsisassallutik. Tamatumanili qularnaarisoqarsinnaanngilaq, pingaartumilli tuluit oqaasiinik sapinngisaqarneq aalajangiisuusinnaasoq eqqarsaatigineqarsinnaavoq, nunani tamalaaneersut suliffeqarfianni atorfinitsinneqassagaanni. Suliffeqarfiit ilaat sulisussanik nunanit allaneersunik arlalinnik immaqa atorfinitsitsinissaat eqqarsaatigissagaanni ilisimatuujusariaqanngilaq, suliat ingerlannissaanni oqaloqatigiissinnaaneq pingaaruteqartoq innersuussutigalugu. Allatut oqaatigalugu qanoq iliuuseqartoqanngippat kalaallisuinnaq oqaasillit tunulliunneqarluarsinnaapput.
Anguniakkat ajunngitsut allaapput. Pissusiviusullu allaallutik. Minnerunngitsumik aningaasatigut iluanaarutissat akuutillugit. Assersuutigalugu aatsitassarsiorfinni sulinissamik piukkunnarsaanermi nunaqqatitta ilinniartinneqarnissaat naalakkersuisut kisiat isumagisariaqanngilaat. Oqaatsinik ilinniartitsinissaq aamma anguniarneqassaaq, unammillernermut atatillugu suliffissat ilaannik sapinngisamik amerlanerpaanik pissarsinissaq qularnaarumallugu. Kalaallit Nunaata siunissaanut inuiaqatigiillu ineriartortinnissaannut maannakkut aningaasaliissuteqartoqassaaq, ukiut ingerlanerini aningaasatigut imminut ingerlassinnaasunik. Oqaatsinut tunngasut aamma pingaartinneqarnissaat aningaasarsiornikkut politikikkullu piumassuseqarnermik pisariaqartitsivoq. Piumasarineqartorlu siulleq pigaarput: Oqaatsinik annertuumik sapinngisaqarnissaq. Tamanna kikkut tamarmik ingerlaannaq paasisinnaavaat, kalaallit qanoq amerlatigisut qallunaat oqaasiinik atuisinnaanerat eqqarsaatigigaanni, qallunaallu qanoq ikitsigisut kalaallit oqaasiinik atuisinnaasut. Taakkulu oqaatsinik atuisinnaanngitsut soorlu tuluit oqaasiinik ilinniartinneqarnissaq suli annertunerusumik pisariaqartippaat, atugarissaartunut akuulissagunik, nutaanik inuussutissarsiuteqalernerup nassatassaanik.
Imaanngitsoq ataasiinnarnik oqaasillit annertuumik piumasaqarfigissanngikkivut, piiaalernissamut akuersissutinik agguaassinermi. Pissusiviusulli tamatigut eqquunneq ajorput, pappiaqqani allassimasutut. Pitsaasumik anguniagaqaraanni anguniagaqanngikkaanniluunniit.