Agathe aamma Ove Karl tallimanngorneq 13'iat naakkiupput
Naalakkersuisut imeruersaatinik nukkassaatitalinnik inerterinermi ussassaarinermilu amerlanerussuteqanngillat
Sillimmasiisarfik Codan ajoqqusernerit millionit misissoreerlugit paasissutissaateqarpoq tallimanngorneq 13’iat ulloq ulorianartuusoq, qaammatip ulluini allani tallimanngornernut allanut naleqqiullugit, ullormi tassani amerlanerit orlusartut.
Aamma atuaruk ”Upernaakkut ataatsimiinneq tallimanngornermi 13'iani aallartissaaq”
Inatsisartut siulittuummut tassunga naalasseripput. Upernaakkut ataatsimiinneq nalunaaqqutaq 13.00 allartippoq, naalakkersuisunut ilaasortat marluk uppernarsivaat, ulloq ilumut ajutoorfiusoq ajornerpaamillu misigisaqarfiusinnaasoq.
Ussassaarutit inerteqqutaalernissaat naaggaaraa
Peqqissutsimut naalakkersuisoq Agathe Fontain, Inuit Ataqatigiit, siunnersuuteqarpoq imeruersaatit nukassaatitallit meeqqanut inuussuttuaqqanullu 18’it inorlugit ukiulinnut tuniniaaqqusaajunnaarnissaat aamma Kalaallit Nunaanni imeruersaatinik koffeinitalinnik ussassaarinerup inerteqqutaalernissaa. .
Inuit Ataqatigiit aamma Kattusseqatigiit Partiiat ussassaarinerup inerteqqutaalernissaa tapersersorpaat, amerlanerussuteqarnerli naammanngilaq. Siumut ussassaarinerup inerteqqutaalivinnissaa akerleraa, imeruersaatit nukassaatitallit inersimasunit pisiarineqarsinnaajuaannassammata.
Demokraterne aamma Atassut imeruersaatit nukassaatitallit meeqqanit pisiarineqarsinnaannginneri akerleraat, taamaattumillu partiit tamarmik imeruersaatinik koffieinitaluinnik ussassaarineq akuersaarlugu.
Aningaasat amerlassusaat iluamik ilisimanngilaa
Aatsitassanut naalakkersuisup Ove Karl Berthelsenip siunnersuutigaa, Kalaallit Nunaata Aatsitassanut aningaasaateqarfik pilersinneqassasoq, aatsitassanik isertitat 75 million koruuninngorpata maannakkutut 5 million koruuniinnaajunnaarlutik.
Atassut aamma Kattusseqatigiit Partiiat naalakkersuisut siunnersuutaannik tapersersuipput. Inuit Ataqatigiit aamma Siumut 75 million koruuninorpiaq killiutitaq apeqquserpaat. Demokraatit 10 million koruuninut qaffaateqaqqusipput, ernummatigigamikku aningaasat Naalakkersuisunit asuli atorneqarnissaat.
Ataatsimeeqatiserineqarutta aggissaagut
Imeruersaatit nukkassaatitallit aamma taakkunannga ussassaarinerup inerteqqutaalernissaanik siunnersuut Ilaqutariinnermut Peqqissutsimullu ataatsimiititaliami kaajallaqqaassaaq, Kalaallit Nunaata Aatsitassanut inatsisaa Inuussutissarsiornermik ataatsimiititaliaq aqqusaassavaa, ukiakkut ataatsimiinnermi aappassaaneerinninneq pingajussaanerinninnerlu ingerlanneqassallutik.
– Ataatsimiititaliat ataatsimeeqateqatigisinnaavagut nassuiaateqaqqulluta aggersarpatigut, Agathe Fontain aamma Ove Karl Berthelsen ilisimatitsipput.