AI-teknologiimik, nammineerluni eqqarsarsinnaasumik nutserisinnaasumillu Sermitsiaq.AG aningaasaliivoq
Teknologiimik nammineerluni eqqarsarsinnaasumik (AI) siuarsimalluartumik, oqaatsit kalaallisut qallunaatullu akornanni nutserinermik allanngortitsilluinnartussamik, pisinissamut aningaasaliisimaneq Tusagassiuuteqarfiup Sermitsiaq.AG-p nuannaarutigalugu saqqummiuppaa.
Aningaasaliineq tamanna Kalaallit Nunaanni inuussutissarsiortuni pisortanilu allaffissornermi sulinerup pitsaassusianik sukkassusianillu pitsanngoriartitsinissamut periarfissaqalersitsivoq.
AI-teknologii nutaaq atorlugu 90 procentit angullugit eqqoqqissaartumik oqaatsit taakkua marluk akornanni sukkasuumik nutserinissamik ajornarunnaarsitsissaaq, tamannalu inuiaqatigiinnut piffissamik aningaasanillu sipaarutaassalluni.
Inuiaqatigiinnut qanoq iluaqutaassava?
Tusagassiuuteqarfiup Sermitsiaq.AG-p AI-teknologiimik pisinissamut aningaasaliinerata suliffeqarfiit oqartussallu oqaatsitigut aporfissat akimorlugit sukumiisumik sukkasuumillu attaveqatigiinnissaq ajornannginnerulersissavaa:
1. Piffissamik aningaasartuutinillu sipaarutissat: Sukkanerusumik nutserisoqartalerneratigut inuiaqatigiit piffissamik aningaasanillu assassorluni nutserinernut oqaluttaanermillu kiffartuussinernut atorneqartussaagaluartunik, malunnaateqarluartumik sipaaruteqarsinnaalissapput.
2. Naammassisaqarsinnaaneq annertunerusoq: Suliffeqarfiit oqartussallu sukumiinerusumik attaveqaqatigiissinnaalissapput, tamannalu naammassisaqarsinnaassutsimik annertunerulersitsissalluni aalajangiisarnernilu kinguaattoornernik annikillisitsissalluni.
Tusagassiuuteqarfik isumaqarpoq aningaasaliinerit matumatut ittut oqaatsit mikisut, ilaatigut kalaallisut oqaatsit, oqaaserujussuarnit teknologiimilu ineriartornermit arlalippassuartigut aarlerinartorsiortitaasut, pigiuaannarnissaannut ineriartortittuarnissaannullu pingaaruteqartut.
Periarfissamik ineriartortitsisoq siuttuusoq suleqatigalugu
- Kalaallisut oqaatsinik tammatsaaliuinissaq, nukittorsaanissaq ineriartortitsiuarnissarlu pingaaruteqartorujussuuvoq, matumanilu inuiattut nunarsuarmiunillu kulturikkut kingornussarsiavut aningaasaliiffigaavut, Tusagassiuuteqarfiup Sermitsiaq.AG-p pisortaa, Masaana Egede, oqarpoq.
Tusagaassiuuteqarfik Sermitsiaq.AG suliniummi tassani Europami oqaatsit iluanni suleriaatsinik nammineq eqqarsarsinnaasunik qarasaasiartalinnik ineriartortitsisut siuttuusut ilaannik suleqateqarsimavoq teknologiimillu nioqqutitut 2024-p kvartaliani siullermi saqqummiussinissamik pilersaaruteqarluni.
Oqaaseqatigiit tulliuttut teknologiip taassuma Sermitsiaq.AG-p aningaasaliiffigisaata piareersarlugu suliarineqarneranit nammineq nutsigai assersuutaapput:
Qallunaatut: Årets mest omdiskuterede lov til behandling i dag
Kalaallisut: Ukioq manna inatsit eqqartorneqarnerpaasoq ullumi oqallisigineqarpoq