Air Greenland: Ikummatissamut akitsuut maannangaaq apparneqassanngilaq
Ikummatissat akii oktobarimiilli 30 procentimik apparput. Akillu appasiinnassappata Air Greenlandip ikummatissamut akitsuutini naleqqussassavaa.
Uuliap akuiagaanngitsup akia oktobarimiilli 30 procentimik apparsimavoq, Air Greenlandimili imarpik qulaallugu timmisartuussinermi ikummatissanut akitsuut 300 koruuneqartoq imaaliallaannaq peerneqassanngilaq. Akilli appasiinnassappata ikummatissanut akitsuut februaarip aallartinnerani naleqqussarneqassaaq. Air Greenland Sermitsiaq.AG-mut taama allappoq.
Air Greenlandip ikummatissanut oktobarimi akitsuusiigami ilanngullugu nalunaarutigigaluarpaa, akit apparpata akitsuut peerneqarumaartoq.
Akinut arlallit aalajangeeqataasarput
Air Greenland nassuiaavoq ikummatissanut akitsuut ullormiit ullormut peerneqaannarsinnaanngitsoq, qaammatit arlariinnut naammattukkuutaarlugit ikummatissanik pisisoqartarmat.
Taamaammat uuliap akuiagaanngitsup akia appareeraluartoq, Air Greenland februaarip aallartinnerani ikummatissanik pisinissani sioqqullugu akinik naleqqussaasinnaanngilaq.
Air Greenlandip ilanngullugu ilisimatitsissutigaa dollarip naliga qaffassimammat, taamatullu uuliap akuigaanngitsup akia timmisartunullu orsersuutip akia imminnut naleqqussarsimanngimmata, akit apparnerat 8 procentiusoq, naak uuliap akuiagaanngitsup akia oktobarimiilli 30 procentimik apparsimagaluartoq.