Air Greenlandimi napparsimasoqarmat angalanissat unitsinneqaqqittut
Air Greenlandimi sulisut arlallit napparsimanerat pissutigalugu nunap iluani angallassinerit aamma Københavnimiit Kangerlussuarmut angalanerit ullumi taamaatiinnarneqarput.
Air Greenland sapaatit akunneri marluk iluinnaani aappassaanik napparsimasoqarneq pissutigalugu Kæbenhavnimiit Kangerlussuarmut angalatitsinissaminik taamaatitsiinnartariaqalerpoq.
Air Greenlandimi attaveqatigiinnermi pisortap Katja Vahlip tamanna uppernarsarpaa.
- Ilumoorpoq Norsaq ullumi angalassanngitsoq sulisut akornanni napparsimasoqarnera pissutigalugu. Aatsaat taama amerlatigisut napparsimallutik nalunaarput, arfinillit napparsimallutik nalunaarmata, Sermitsiaq.AG-mut ilisimatitsivoq.
Air Greenlandip sulisut taarsiisinnaasut tallimat ullumikkumut piareersimasuutigigaluarpai, sulisulli arfinillit napparsimallutik nalunaarmata Danmarkip nunattalu akornanni angalatitsinissaraluaq taamaatiinnarneqarpoq.
Air Greenlandip sulisut sumik napparsimanersut ilisimatitsissutiginngilaa, Katja Vahlili oqarpoq napparsimanerit assigiinngitsut nalunaarutigineqarsimasut.
Nunatta nakorsaaneqarfiata sapaatip akunnerani matumani tunillatsissimasut nalunaarutiginerini ilisimatitsissutigereerpaa angalatitsiviit ilaanni tunillatsissimasoqartoq.
Norsaq sulisut napparsimaneri pissutigalugit tallimanngormat aamma angalanngilaq.
Timmisartoq aqagu attartorneqassaaq
Norsap uninngatinneqarnerani nunap iluani angallannermi aamma kinguaattoortoqarpoq. Angalasussat katillugit 430-t kinguaattoorput. Danmarkimut angalasussat ilaat Kangerlussuarmut tikereersimapput, Air Greenlandillu ilisimatitsissutigaa unnuisussanngortut aqagulu arfininngornermi apuuffissaminnut angalajumaartut.
- Timmisartumik aqagu attartussaagut, angalatitsinissagullu aqagumut nuuppagut, Katja Vahl ilisimatitsivoq.
Angalasut kinguaattoortut nutaamik angalanissamut pilersaarummik tunineqarsimapput.
Coronamut misissortinnerit atorneqaqqissasut
Københavnimiit Kangerlussuarmut angalasussat coronamut PCR atorlugu misissortinnerisa inerneri aqagu atoqqinneqarsinnaassapput. Air Greenlandilli angalasussat piumaffigai maanna mattusimaqqullugit.
- Kæbenhavnimiit angalasussat PCR atorlugu Covid-19-imut misissortittarput, akunnerillu 72-t tunillatsissimannginnermut uppernarsaat atorsinnaammat qaangiisoortoqarsinnaavoq. Taamaattoq misissuutip inernera aqagu atuuttussanngortinneqarpoq, angalasussallu misissorteqqittariaqaratik. Angalasussalli aallannginnerminni mattusimanissamik piumaffigaagut, Air Greenland ilisimatitsivoq.