Air Greenlandip aallarfissat arlallit unitsiinnarpai

Air Greenlandip nittartagaa misissuataalaaraanni takuneqarsinnaavoq, kitaata sineriaani illoqarfiit arlallit marlunngornermi anorersuarnissaannut ingerlatseqatigiiffik piareersaleruttortoq.

Kalaallit Nunaanni Politiit inunnut suliffeqarfinnullu atortuminnik qajannaarsuinissaannut kaammattuineranni, Air Greenland timmisartuussinnginnissaminik pilersaaruteqarpoq.

Air Greenlandip nittartagaatigut ilisimatitsissutigineqarpoq, pingaartumik Kangerlussuarmut, Nuummut, Paamiunut Narsarsuarmullu angallassinissat taamaatiinnarneqarsimasut.

Ingerlatseqatigiiffit nittartakkamini allappoq, marlunngornermi angalasoqartussannginnera pissutigalugu ilaasussat timmisartuussinernut allanut nussorneqaleruttortut.

- Ulluni tulliuttuni kitaata sineriaani piffinni arlaqartuni silarluttussaanerata peqqutigisaanik ajoraluartumik timmisartuusinissamut pilersaarutit allanngortinneqaleruttorput. Ilaasussagut timmisartuusinernut allanut nuussorneqaleruttorput piaartumillu angalanissamut pilersaarutinik nutaanik sms'ikkut e-mail'ikkut ilisimatinneqassallutik, Air Greenland nittartakkamigut ilisimatitsivoq.

Ulussaarsuartut sakkortutigisumik anoraasuartassasoq

DMI-mit aarlerisaarutigineqarpoq, marlunngornermi 33 m/s-imik sakkortussusilimmik anorersuassasoq aamma 43 m/s-imik sakkortussusilimmik anoraasuartassasoq.

- Ulloq naallugu anorlingaatsiassaaq, nalunaaquttallu ualikkut arfernut unnukkullu qulingiluat akoranni sakkortunerpaassaalluni, Jesper Rosberg DMI-meersoq oqaluttuarpoq.

Kalaallit Nunaanni Politiinit inuit suliffeqarfiillu pigisaminnik qajannaarsuillutik anorersuarnissaanut piareersaqquneqarput.