Ajornartoortoqarpoq: Siumut Nuuk avissaartuuppoq
Siumut Nuuk ilaasortaminut attaveqarniarnermigut ajornartorsiorpoq. Tamanna ilaasortaasa arlaqaleriartortut uppernarsarpaat, taakkunanngalu arlallit piumasaqarputimmikkut ittumik ataatsimeersuartoqarnissaanik isumaqatigiissutaasimasoq naammassineqartariaqartoq.
Siumut Nuup siulittaasua kamaammersimaqaluni immikkoortortaqarfiup siunnersuutai tallimanngornermi saqqummiuppai, minutsinimi arfineq marlunni saqqummiussinissaminut periarfissami aallaqqaata siulittaasutut siulini marluk, siunnersuutinut peqataatinneqarsimannginnerminnik uppernarsaanikut naveerlugit Sermitsiaq.AG-lu Danmarkip nunat tamalaat eqqartuussivissuannut sassartinneqarnissaanik siunnersuutiminnik saqqummiussisimasoq saassullugu atorpai.
Taamaattorli siunnersuutit annertummata, aammalu qularnanngimmat ataatsimeersuartunit akuerineqassappata Kalaallit Nunatta Danmarkillu akornanni attaveqaqatigiinnermut allannguisussaasut, Sermitsiaq.AG-mit sulissutigaarput paasiniarlugu suna siunertaralugu taamatut siunnersuuteqartoqarsimanersoq, pingaartumillu Danmarkip nunat tamalaat eqqartuussivissuannut tunniunneqarnissaannik siunnersuuteqarsimaneq itisileqqullugu.
Oqaaseqarumanngilaq
Siumut Nuup siulittaasua, Qarsoq Høegh-Dam Sermitsiaq.AG-mit apersorniarsarigaluarparput, ilaatigut paaserusullugu sooq siunnersuuteqarsimanersut ilaasortatik peqatigalugit oqaluuserisimanngisaminnik.
Taanna apersorneqarusunngilaq, paarlattuanilli allaaserisaq kikkut siunnersuuteqarnernut akisussaaqataatinneqarnersut pillugit allaaserisaq naqqinneqaqqullugu piumasaqarluni. Tamanna pivoq siulittaasutut siulini marluk, Inga Dora Gudmundsdottir Markussen aamma Hans Peter Poulsen siunnersuutinik akuutinneqarsimannginnertik pillugu oqaaseqareersut, taakku aamma Siumut Nuuk sinnerlugu qinikkatut inissisimapput, kommunalbestyrelsimi aammalu Inatsisartuni ilaasortaallutik.
Taamaattorli apeqqutit ikittuartannguit Siumut Nuup siulittaasuanit Qarsoq Høegh-Dam-imit akissutisissallugit Sermitsiaq.AG-mit iluatsitsivugut, Qarsoq Høegh-Dam, taanna erseqqissaaqattaarpoq namminneq (immikkoortortaqarfimmi siulersuisut) "siunnersuutit nassiunneqarsimasut" ingerlateqqissimagitsik kattuffimmut.
Taava nassiutiinnarpisigit isummersorfiginagillu?
- Soorunami siunnersuutit isummersorfigaagut!
Kisiannimi Siumut Nuummi siulittaasuusimasut marluk siunnersuutit nassiunneqartinnagit peqataatinneqarsimannginnerarlutik oqarpout. Kikkut taava siunnersuutit isummersorfigigamikkit?
- Siumut Nuup siulersuisui.
Tunuliaquttasimi? Periarfissippisigit siunnersuutinut isummersornissaannut?
Qarsoq Høegh-Dam apeqqummut akinani ingerlavoq.
Ilaasortat naammaginninngitsut amerliartortut
Maanna pissutissaqarpoq ilimagissallugu siunnersuutit pineqartut inuit ikittuaraannaat akunnerminni piareersarlugillu nassiussimagaat partiip ataatsimeersuarnerani oqaluuserisassanngortillugit.
Maannami inuit attaveqaqatigiittarfiini Siumut Nuup ilaasortai arlaqaleriartortut ataatsimeersuarnermut apuunneqartut qanoq suliarineqarsimaneri pillugit naammaginninnginnerminni ersersitsipput.
Ilaasortat arlallit naqissusiipput oqaluuserisassatut nassiunneqarsimasut ataatsimoorluni suliarineqarsimanngitsut aammalu 14. juni 2023-mi ataatsimiinnermi isumaqatigiissutaasimagaluartut malinneqarsimanngitsut, tassa immikkut ittumik ataatsimeersuarnissaq isumaqatigiissutaasimagaluarpoq aammalu taamaalilluni Siumut Nuuk sinnerlugu ataatsimeersuarnermi peqataasut ilaasortaminnit pisinnaatitsissummik pissarseqqaarsimanngitsut siunnersuutinik pineqartunik saqqummiussinissaminnut.
Taakku ilaasortat namminneq atertik atorlugu inuit attaveqaqatigiittarfiini saqqummiussisut naammaginninngillat, immikkut ittumik ataatsimeersuarneq pisimanngimmat, tassanimi Siumut Nuup siunnersuutissai suliarineqartussaasimagaluarmata aammalu Siumut Nuuk sinnerlugu partiip ataatsimeersuarnissaanut maanna sapaatip akunnerata naanerani Qasigiannguani ingerlanneqartumut aallartitassat toqqarneqartussaasimagaluarmata. Pisussatulli isumaqatigiissutaareersimagaluartut Siumut Nuummi ilaasortat arlallit naapertorlugit pisimanngillat.