Ajortuliortut ajortuliorfigineqartullu Tasiorta-p ikiorneqaqquvai
Kinguaassiuutitigut atornerluffigineqarsimasunik tapersersuilluni peqatigiiffiup Tasiorta-p kinguaassiuutitigut ajortuliornermi illua'tungeriit tamaasa ikiorneqaqquvai
Ilisimasalittut angalasartut kinguaassiuutitigut atornerlunneqarsimasunik ikiuisartut, Tasiorta-p tikilluaqquvai erseqqissarluguli pingaaruteqartoq ajortuliorfigineqartoq ajortuliortorlu ikiorneqarnissamik neqeroorfigineqarnissaat.
Taamatut peqatigiiffik tusagassiorfinnut nalunaarutikkut allappoq, peqatigiiffiup ileqquusumik ataatsimeersuarneranut atatillugu, ataatsimeersuarnermi tamanna oqaluuserineqarsimalluni.
- Ilaqutariinnut Naalakkersuisup angalaqatigiinnik, inersimasunik meeraanerminni kinguaassiuutitigut atornerlunneqarsimanerminni kingusissukkut sunniuteqartitsisunik katsorsaasussanik, pilersitsiniarnera nuannaarutigaarput, Tasiorta-p siulittaasua Kisea Bruun oqarpoq, isumaqarlunili ajortuliortoq ajortuliorfigineqartorlu tamarmik ikiorneqartassasut.
- Kinguaassiuutitigut atornerluinermi katsorsaanermik pinaveersaartitsinermillu sulinerit ajortuliorfigineqartunuinnaq sammitinneqarpata tamanna nutaamik ajortuliornernik kinguneqassaaq, tamakkununngalu kinguneqarnerlutsitsinerit qaangerniarnerat sivisunerussaaq. Tasiorta-p isumaqatigaa meeqqanik inuusuttunillu kinguaassiuutitigut atornerluinerup pitsaaliorneranik suliniuteqarnerit saniatigut ukiuni aggersuni inersimasunik kinguneqarnerlutsitsinermik katsorsaanissaq pisariaqartinneqartoq. Inersimasut, meeraanerminni inuusuttuunerminnilu kinguaassiuutitigut atornerlunneqarsimasut iluatsilluartumillu kingunerlutsitsinermut katsorsarneqarsimasut inersimasunngortarput nukittuut, qitornaminnik, ilaquttaminnik attaveqarfimminnillu pitsaasumik sunniisinnaasut pinaveersaartitsinermillu suleqataasinnaasut - tamakkua tamatta atorfissaqartippavut, Kisea Bruun oqarpoq.