Ajunaarnersuarmi ikiorsiissutit: Naalakkersuisut Inatsisartullu suli utaqqisitsipput
- Killiffipput ajorluinnarpoq! Meeqqat kaallutik innartalerput utoqqalinersiallillu atorniarfigeqqissinnaajunnaarpagut, taamak oqarpoq Savissivimmi aalisartut piniartullu peqatigiiffianni siulittaasoq, Ole Kristensen.
Savissivimmi meeqqat ilaqutaallu kaallutik innartarput, piniartummi silap allanngornerata kingunerisaanik inuussutissarsiumminnik ingerlatsisinnaajunnaarsimasut novemberip aallartilaarneraniilli isertitaarunnikuusut suli utaqqisinneqartuarsinnarput ajunaarnersuaqarnerani ikiorsiissoqarnissaanik neriorsorneqareeraluarlutik suli ikiorneqannginnamik.
Piniartoq Ole Kristensen, aamma Savissivimmi KNAPK-p immikkoortortaqarfiani siulittaasuusoq Sermitsiaq.AG-mut oqaluttuarpoq Savissivimmi piniartut tamarmik ikiorneqarnissaminnik qinnuteqareeraluartut suminermilluunniit manna tikillugu tusagaqartinneqarsimanngitsut:
- Ajoraluartumik nassuerutigisariaqarpara killiffipput ajuuimmat, utoqqalinersiallit utoqqalinersiannguaminnit ikiuuttarnikuugaluarput, tamannali maanna periarfissaajunnaarpoq, taakkunnguimmi ikiuuttarnikuugaluarput minnerpaamik meerartatta kaannatik innarsinnaanissaannut, maannali angajoqqaat allatut iliorsinnaannginnamik meeqqat kaattut innartittariaqartalernikuuaat, tamannalu assut ajuusaarnarpoq attanneqarsinnaananilu, Ole Kristensen Sermitsiaq.AG-mut oqaluttuarpoq.
Suminermilluunniit pisortat tutsiutinngillat
Savissivimmi piniartut silap allanngorneranit eqqorneqarnerpaanut ilaasut, decemberip 18-ianili 2023-mi ikiorsiisoqalerneranik ilisimatinneqarlutillu isumalluarsaarneqarnikuupput. Maanna januarip aqqarnangut killippugut, suminermilluunniit qinnuteqaatit pillugit siuariartoqarsimaneranik tutsaqartoqarnikuunngilaq, sulilu piniartut ikiorneqarnissaminnut qinnuteqaatimik akineqarnissaannilluunniit utaqqiuarsinnarput:
- Suminermilluunniit akissutisinikuunngilagut, aamma ilumut qinnuteqaatigut eqqortumik tiguneqarsimanersut uppernarsaataasinnaasunnguamilluunniit utertitsiffigineqarnikuunngilagut. Iluaqutaassagaluaqaarmi minnerpaamilluunniit qinnuteqaatitta akineqarnissaannut piffissalersuinermik piviusorsiortumik nassuiaanneqalaarsinnaasuugutta, taamaalilluta paasisinnaassagaluaratsigu ikiorsissutit ilumut takkuttussaasut, takkutissappatami, Ole Kristensen kiisa qulalersimalluni oqarpoq.
Siullermik Naalakkersuisut utaqqisitsipput
Naalakkersuisut 18. december ilimasaaripput ajunaarnersuartut ittutut taasaminnut ikiorsiissutit pinasuartumik suliarineqassasut. Taamaattorli juullertinnagu qinnuteqaammik Naalakkersuisut nassiussinissaminnut angumersinngitsoorput, 28. december aalisarnermut piniarnermullu naalakkersuisoqarfimmit ilisimatitsissutigineqarpoq qinnuteqarsimasut 300-it sinnerlugit amerlassuseqartut ukiortaartinnagulu aningaasaqarnermut ataatsimiititaliamut qinnuteqaammik tunniussinissaq siunnerfigineqartoq, tassami aningaasaqarnermut ataatsimiititaliap aamma qinnuteqaatit suliarisussaammagit, massa naalakkersuisoqarfimmi qinnuteqaatit taakkorpiaat suliarineqareeraluartut.
Ukiortaanngitsiartoq aningaasaqarnermut ataatsimiititaliap siulittaasua, Asii Chemnitz Narup (IA) tusagassiuutitigut nalunaaruteqarluni utaqqeqqissinnaajunnaartutut nipilimmik uppernarsaavoq naalakkersuisut suli qinnuteqaateqanngitsut.
Maanna aningaasaqarnernermut ataatsimiititaliaq utaqqisaavoq
Taamaattorli sisamanngornermi 11. januar suliaq pillugu siuariartortoqarsimaneranik takussutissaqanngilaq. Aalisarnermut piniarnermullu naalakkersuisoqarfimmit uppernarsarneqarpoq suliassartik naammassereersimagitsik taamaammallu suliap naalakkersuinikkut suliarineqarnera utaqqisaaginnaleqqasoq.
Aningaasaqarnermut ataatsimiititaliap allattoqarfianit Sermitsiaq.AG-mut uppernarsarneqarpoq ataatsimiititaliap Naalakkersuisut qinnuteqaataat tigoreersimagaat suliarereersimagaallu aalajangiisoqareersorlu, taamaattorli ataatsimiititaliap siulittaasuata, Asii Chenmnitz Narup-ip atsioreerpagu ataatsimiititaliap qinnuteqaammut akissutaa aatsaat naalakkersuisunut apuunneqarinnaasoq.
Aningaasaqarnermut ataatsimiititaliap nammineerluni ajunaarnersuaqarnerani ikiorsiissuteqartoqarnissaa akuersaarnikuuaa, taamaalillunilu decemberimili ilisimaneqalerpoq en million koruunit qinnuteqartunut akuerineqartunut agguaanneqartussaasut, maanna aningaasaliissutit akuerineqarneraniit qaammatinngulerpoq, sulili piniartut utaqqisinneqarput, akissutinnguamilluunniit qinnuteqaatertik ilumut iluamik apuussimanersoq uppernarsaaammik utertitsiffigineqarnikuunatik.
Sermitsiaq.AG-mit aningaasaqarnermut ataatsimiititaliap siulittaasua, Asii Chemnitz Narup attaviginiaraluarparput paasiniarlugu qaqugu ataatsimiititaliap Naalakkersuisunut akissutaa nassiunneqassanersoq, iluatsinngilarpulli.