Ajunaartoqarnerani umiarsuaatileqatigiiffik unnerluutigineqassaaq
Kalaallit Nunaanni umiartortut marluk ajunaarneranni M.H. Simonsen akisussaatinneqassaaq, taamatut isumaqarpoq Søfartstyrelsen.
Søfartsstyrelsemi inatsisilerituut Fynimi Politiit qinnuigisimavaat Kalaallit Nunaanni ukioq manna 16. januarimi umiartortut marluk toqunerat misissuiffigeqqullugu. Taamaalilluni ilimanarsinnaavoq Svendborgimi umiarsuaatileqatigiiffiup M.H. Simonsen ApSip unnerluutigineqarnissaa. Taamatut allaaserisaqarpoq Fyns Amts Avis.
Søfartsstyrelsep paasiniaasartuisa immami ajunaarneq pillugu nalunaarusiaa 29. maj tunniussaat inatsisilerituut misissorsimavaat.
Misilittagakitsoq 18-inik ukiulik aamma aquttoq 45-nik ukiulik ajunaarput uuliamik assartuumminngaanniit Orasilamit slangimik nunaqarfimmi Saarlumi innaallagissiorfimmut uuliamik niooraassutissamik umiatsiaaqqamik kalillugu nunamukaassinerminni kinngunermikkut.
Ajunaarnermik nalunaarusiami isornartut arlallit tikkuarneqarput. Umiartortut taakku marluk annanniuteqanngillat imaluunniit atisarsuit annanniutit atorsimanagit. Orasilami taamaattunik annanniutinik taamaallaat pingasunik peqarpoq, tamarmillu ataasinnarmik angissuseqarlutik. Inuttaasut Søfartsstyrelsep paasiniaasartuinut nassuiaasimapput umiarsuaatileqatigiiffimmut saaffiginninnikkut atortussanik piniarneq ajornartarsimasoq.
Nalunaarusiami inerniliisoqarpoq umiarsuaatileqatigiiffiup pisortaasa issittumi umiatsiaaqqamik angalanermi nalorninarsinnaasut naammaginartumik nalilersorsimanngikkaat.