Ajutoorneq: Biilertoq aqquserngup illuatungaanut sisoormasoq
Politiit nalunaarutigaat, illoqarfiit pingaarnersaanni aqquserngit quatsersimanerisigut biilertut marluk ajutoorsimasut.
Nuummi ulluni marlunni kingullerni aqquserngit quasannerisa malitsigisaannik biilertut marluk ajutoorsimapput.
Sisamanngornermi ualikkut biilertup ataatsip biilini aqussinnaajunnaaramigit aqquserngup illuatungaanut sisoorami biili alla aporsimavaa.
Ajutoorneq pisimavoq illoqarfiup immikkoortortaata Nuussuup tungaanut aqqusinermiittumi Eqalugalinnguit kaajallattariaani.
Kalaallit Nunaanni Politiit pigaartuisa pisortaat Hans-Peter Berthelsen naapertorlugu, ajutoortoqarnerani inunnik ajoqusertoqarani atortut kisimik ajoqusersimasut.
Sisamanngornermi unnuap-qeqqata missaani ajutoortoqaqqissimavoq, tassani politiit biilertoq ataaseq qulliup napasuanut aporsimasoq orniguffigisimavaat. Tassani aamma atortut kisimik ajoqusersimapput.
Politiinit oqaatigineqarpoq, pingasunngornermi illoqarfiit pingaarnersaanni silarlulluni isseerummat aqquserngit quatsersimanerisigut ajutoornerit marluk pisimasut.
Pigaartut pisortaata oqaatigaa, ajutoornerit takku marluk saniatigut, ulloq eqqissisimanarsimasoq, taamaallaalli angerlarsimaffinni ataasiakkaani eqqissiviilliortoqarsimasoq.