Aki-Matilda Høegh-Dam: - Angusagut nuannaarutigaagut
Siumut Folketingimi danskit aningaasanut inatsisissaanni suliniutinik arlalinnik angusaqarpoq. Taamaakkaluartoq aningaasanut inatsisissamut isumaqatiginninniarnerit qanoq ingerlanneqarnerat Aki-Matilda Høegh-Damip isornartorsiorpai.
Aki-Matilda Høegh-Dam (S) suliniutinik qulingiluanik angusaqarpoq, tamannalu naammagisimaarpaa.
Siumut tusagassiuutinut nalunaarummi taama ilisimatitsivoq.
Danskit aningaasanut inatsisissaat pillugu isumaqatiginninniartoqarneranni, danskit naalakkersuisuisa aamma Aki-Matilda Høegh-Damip akornanni qanimut suleqatigiittoqarsimasoq, tassani atuarneqarsinnaavoq.
Suliniutit ukiunut sisamanut agguarneqartut 39 millionit koruunit missaannik akeqarput. Tamatuma saniatigut aamma Socialministerietimi isumaqatiginninniartoqarpoq, tassanilu aamma Siumut suliniuteqartitsivoq.
Killilersuisut
Aningaasat suliniutinut ukununnga agguataarneqarput:
- Tamat oqartussaaqataanerat pillugu kalaallit piviusulersaarusiaat – 9,5 millionit koruunit
- Kollegianik pilersitsineq – 6 millionit koruunit
- Inuusuttut nalerisimaarnerat, Operation Dagsværk INUA – 6 millionit koruunit
- Qaammataasamit ikkarlunnik assiliorneq – 4,4 millionit koruunit
- Foodlab Kujataanut tapiissutit – 4 millionit koruunit
- ICC-mi nunani tamalaani siulittaasuutitaqarnermut tapiissutit – 3 millionit koruunit
- Kalaallisut inatsisinik nassuiaasiornerup ineriartortinnissaa – 3 millionit koruunit
- Mentor Immanuelimut aamma MAPI-mut aningaasaliissutit – 1,5 millionit koruunit
- Imperiets Børn nutserneqarnissaa – 100.000 koruunit
Naak Siumup suliniutit nuannaarutigigaluarai, aningaasanut inatsisissap isumaqatiginninniutigineqartarneranut tunngatillugu allannguisoqartariaqartoq, partii isumaqarpoq.
- Maanna isumaqatigiinniarnerit ingerlariaasii periarfissaqartitsinngillat sunniuteqarnissamut imaluunniit itisiliinissamut isumaqatigiinniarnerit ingerlanneqarneranni, danskit Kalaallit Nunaanni akisussaaffiit annerit iluanni, assersuutigalugu inatsisinut atuutitsineq, Aki-Matilda Høegh-Dam oqarpoq.
Siumut Folketingimi naapertorlugu, maanna aningaasanut inatsimmut isumaqatiginninniartarneq, tassa Nunanut Avannarlernut aningaasaliissutit killilersuipput, tassani suliniutit annerit oqaluuserinissaannut periarfissiinngilaq.
Pissutsit kivissagai
Taamaammat Kalaallit Nunaat isumaqatiginninniarnerni sunniuteqarnerusariaqartoq, Aki-Matilda Høegh-Damip siunnersuutigaa.
Kalaallit Nunaanni akisussaaffigisaanni aaqqissuussaanikkut ajornartorsiutinik aaqqiissuteqarnissamut danskit naalakkersuisui isumaqatiginninniarfigineqarsinnaanissaannut periarfissamik qulakkeerinnissaaq – partiit Nunanut Avannarlernut aningaasaliissutitigut imaluunniit immikkut aningaasaliititsinikkut aaqqiigallarnernut taarsiullugit.
- Suliniutit qulakkeernissai uagitsinnut pingaaruteqarsimavoq, kalaallit suliniutaanut Kalaaallit Nunaanni Kalaallinullu Danmarkimi anguneqassapput. Suliniutit pissutsit kalaallinut piffinni arlallinni kivinneqassapput, tamaat isigalugu naammagisimaarpunga, Aki-Matilda Høegh-Dam oqarpoq.
Nunanit Avannarlernit folketingimut ilaasortat sisamat ukioq manna suliniutinut 23-nut aningaasaliissuteqartitsipput, taakku katillugit ukiut sisamat ingerlanerannut 120 millionit koruuninik aningaasartaqarput, maannamut 80 millionit koruuniusaraluarput. Folketingimut ilaasortap Aaja Chemnitzip aamma suliniutini naammagisimaarpai.