Aki-Matilda: Inuit imminnut avitseqatigiisinnaasariaqarput
Nivi Rosing kalaaliunera (Inuk) Canadami uppernarsarneqarsinnaanersoq maanna folketingimi qaqinneqarpoq. Ajornartorsiut pillugu Danmarkimi nunanut allanut ministeri qanoq iliuuseqartariaqartoq, Aki-Matilda Høegh-Dam kaammattuivoq. Kalaallimmi tamarmik Danmarkimi innuttaassuseqartutut allassimapput.
Kiap kalaallit inuit-iusut aalajangersassavaa? Taama folketingemi ilaasortaq Siumumeersoq, Danmarkimi nunanut allanut ministerimut apeqquteqarpoq. Danskit nunanut allanut ministeriat, Jeppe Kofod naalakkersuisut nunanut allanut tunngasut- isumannaassusermilu politikkikkut pilersaarusiornermi Folketingip ataatsimittarfiani sapaatip akunnerata siuliani nassuiarpaa. Tassungalu atatillugu Aki-Matilda Høegh-Dam-ip Canadamut annertunerusumik atassuteqalernissaq kaammattuutigaa.
Kalaaleq inuusuttoq, Nivi Rosing Canadami ilinniarpoq, taassumallu Canadami uppernarsarsinnaanngilaa kalaaliulluni (Inuk). Inuit allat sanilliullugit taamaasilluni ilinniarnermi aningaasartuutinut sipaaruteqarsinnaatitaanngilaq. Tamannalu Aki-Matilda Høegh-Dam-ip allanngortikkusuppaa, taannami isumaqarpoq inuit imminnut avitseqatigiinnerusariaqartut.
- Kalaallit tamarmik Danmarkimi innuttaassuseqarmata Canadami oqartussat uppernarsarsinnaanngilaat Nivi kalaaliussasoq – pappiliatigut qallunaajugatta. Taamaattumillu maanna ajornartorsiuteqarpugut, nunanut allanut tunngasunut politikki ukiuni 300-ni Danmarkimit aqunneqarnikuuvoq, kalaallinut inuinut silarsuarmut nunanullu sanilerisanut soorlu Canada sunneeqataarusuttunut periarfissiinngilaq, Aki-Matilda Høegh-Dam Folketingimut oqalugiarnermini Danmarkimilu nunanut allanut ministerimut apeqquteqarnermini taama ilaatigut oqarpoq.
Annertunerusumik ilisimasanik avitseqatigiinneq
Aki-Matilda Høegh-Dam-ip aamma erseqqissaatigaa Canada taamaallaat 16 kilometerisut Kalaallit Nunaanniit ungasissuseqarmat. Taamaakkaluartorlu naalakkersuinikkut attaveqaatit annertunerusumik suli qulakkeerneqanngitsut.
- Taamaattumik oqaaqqissaarivunga kunngeqarfik ataatsimoortoq Kalaallit Nunaat tapersersussagaa, nunanullu sanilerisanut qanimut atassuteqarlernissamut pilersitsissalluni aporfeqarani, annertunerusumillu ilisimasanik avitseqatigiinnissamik pilersitsineq ilinniakkamillu imminnut akornanni, Aki-Matilda Høegh-Dam oqarpoq.
Siumut tunuliaqutaralugu folketingimi ilaasortap nunanut allamut ministerimiit suli akissutissarsinngilaq. Naak nunatsinni kinaassuseq pillugu inatsiseqanngikkaluartoq, taava Aki-Matilda Høegh-Dam isumaqarpoq piffissanngortoq kalaallit inuit allat assigalugit periarfissaqalernissaat.
- Isumaqarpunga eqqartugassaq qaqinnissaannut piffissanngortoq. Piffissanngorpoq uagut kalaaliusugut, Inuit, nunat saniligullu assinganik periarfissinneqassasugut, soorlu Canadami qanigisagut, Siumeersoq folketingemi ilaasortaq oqarpoq.