Aki-Matilda: Siumup siulittaasuuffik avinniarpaa - allat sorusuppat?
Folketingimi Kalaallit Nunaat pillugu ataatsimiititaliami siulittaassuuffiup avinneqarnissaa Siumut tunuliaqutaralugu folketingimi ilaasortamit Aki-Matilda Høegh-Dam-imit neriorsuutigineqarpoq. Siumut Folketingimut isertitaqaqqissappat tamanna pissaaq, neriorsuutigineqarpoq. IA isumaqatiginninniarnissamut ammassoq Aaja Chemnitz oqarpoq. Isumaqatiginninniarnerilli qinersineq pereerpat piumaartoq oqaatigaa.
Kalaallit Nunaannut tunngasunik ataatsimiititaliaq Nunatsinnit folketingimi ilaasortaasunit qinigaaffimmi matumani siulittaasuuffigineqarpoq.
Qinersinerup kingulliup aallartinnerani Aki-Matilda Høegh-Dam (S) ataatsimiititaliami siulittaasuuvoq. Qinigaaffiup aappaa nallermat, juunimi 2021-mi, Aaja Chemnitz ataatsimiititaliami qinersinissap nalunaarutigineqarnissaata tungaanut siulittaasuuvoq.
Aki-Matilda Høegh-Dam qinigaaffimmi assinganik iliuuseqarniarluni naqissusiivoq:
- Siumut Folketingimut qinigaaqqilluni iseqqissappat, Kalaallit Nunaannullu tunngasumik ataatsimiititaliami siulittaasuuffik qinigaaffiik siulianituulli pissarsiareqqissappagu, Nunarput sinnerlugu qinikkap aappaanut siulittaasuuffik avillugu tunniunniarpaa, piumasaqaateqanngitsumik.
- Siumup politikkianut ilaavoq
- Aakua Siumup isumaqatigiinngittarnerit aallaaviginagit, partiit akimorlugit suleqatigiikkusuinnermut anguniagaa. Siumup inuiaqatigiit sinnerlugit demokrati ataqqiniarpaa, piumasaqaateqanngitsumik, Aki-Matilda Høegh-Dam tusagassiutinut nalunaarummi allappoq.
Folketingimut qinigassanngortittut allat assingusumik iliuuseqassanersut paaserusuppaa:
- Qineqqusaarnermi arlaleriartumik tusareerparput Folketingimut qinigaagallartup aappaata piumasarinngikkaa, naak siulittaassuuffik taanna taamatut pissarsiareqqaarfissiornikuullugu, partiillu allat aamma tamassuma anguniarneranut oqaaseqarnikuunngikkaluartut, Siumup politikkini allat qanoq piumanerat aallaaviginagu anguniarniarpaa, Aki-Matilda Høegh-Dam allappoq.
IA isumaqatiginninniaqataarusuppoq - qinersereernerup kingorna
Ataatsimiititaliami siulittaasuuffiup avinneqarnissaa pillugu isumaqatiginninniarnissamut IA-mit ammaffigineqartoq Aaja Chemnitz oqarpoq. Isumaqatiginninniarnerilli qinersereernerup kingorna pissasut siunnersuutigaa:
- Qinersisoqareersinnagu ataatsimiititaliami inissat isumaqatiginninniutigineqarsinnaanngillat. Takoqqaartariaqarparput qinersinermi tapersersorneqarnerluta.
- Taama oqareerlunga oqarusuppunga IA isumaqatiginninniarnissamut ammasoq. Aamma Kalaallit Nunaat pillugu ataatsimiititaliami siulittaassuuffik avinneqarsinnaanersoq isumaqatiginninniarfigerusupparput. Ataatsimiititaliami inissat kisimik isumaqatiginninniarfigineqarsinnaanngillat, politikkikkut aamma isumaqatiginninniartoqassaaq, Aaja Chemnitz Sermitsiaq.AG-imut oqarpoq.
Qinersereernerup siuliani Kalaallit Nunaat pillugu ataatsimiititaliami siulittaasuuffik Demokraatinit Siumumut tunniunneqarnera IA-mit pakatsissutigineqarpoq. Kalaallit Nunaanni partii qinigaatitaqarnerpaajusoq ataatsimiititaliami siulittaasuuffeqartariaqartoq taamani isumaqarpoq, folketingimullu kingullermik qinersinermi Nunatsinni IA qinigaanerpaavoq. IA qinersisut 33,4 procentinik taaguunneqarpoq, Siumut 29,5 procentinik taaguunneqartoq.