Akileraartarnermut aaqqissuusseqqinneq: Naleraq isumaqatiginninniarnernit tunuarpoq
Naalakkersuisut akileraartarnermut aaqqissuusseqqinniarneranni Naleraq peqataasinnaanani nalunaarpoq. - Ajornartorsiutit aaqqiissutissaqartinnagit siunissamut illuartiteriinnarluni isumaqatigiinniarnermut peqataasinnaanngilagut, Naleqqami siulittaasoq oqarpoq.
Naleraq akileraartarnermut aaqqissuusseqqinnissamut isumaqatiginninniarnernit peqataajunnaarpoq.
Partii tusagassiorfinnut taama nalunaaruteqarpoq.
- Naleqqamiit isumaqatigiissut angusaqarfiunaveersaartutut, nunatsinnilu ajornartorsiutinik aaqqiissutaanngitsutut nalilerparput. Allaat ”issitumi kissasserniarluni qarlinut quinertut” taaneqarsinnaalluni, nunatsinni pisortat aningaasartorpallaarujussuarnerannik nikisitsissanngimmat, nantsinnilu inuuniarneq kajumiginarsarnagu, Naleqqami siulittaasoq, Pele Broberg, partii sinnerlugu nalunaaruteqarpoq.
Pele Broberg Sermitsiaq.AG-mut oqarpoq partiip maluginiarsimagaa isumaqatiginninniarnermi aqutsisut "ajornartorsiutinut aaqqiissutissanik suliniuteqarnissamut siunnersuutigineqartunik soqutigisaqanngitsut".
- Assersuutigalugu allaffissornikillisaanissamut aaqqiissutissat, eqaannerusumik sullissisoqalernissaa aaqqissuusseqqinniviillu siunnersuutigisagut soqutigineqanngillat. Aaqqiissutissanik isiginissamut soqutiginninngippata, peqataasinnaanngilagut, taava taama ingerlanermut peqataasinnaanngilagut, Pele Broberg Sermitsiaq.AG-mut oqarpoq.
Killormut ingerlagaluttuinnarneq
- Naleqqami isumaqatigiissutissap allaqqanera, Kalaallit Nunaanullu kingunissat nalilersorluareerlugit aaliangersimavugut. Partiitta pingaartutut nalilerpaa Kalaallit Nunaata siunissaa akisussaaqataaffigissallugu, qulakkeerlugu pitsaanerusumut ingerlanissaq, Naleraq allappoq.
Pele Brobergip erseqqissarpaa partii isumaqatiginninniarnerni maannamut pimoorussilluni peqataasimagaluartoq. Partiip akileraartarnermut aaqqiissutissat suliffeqarfinnut, innuttaasunut minnerunngitsumillu pisortanut iluaqutaasussat sulissutigeqqullugit 2021-mi ilunegrsorpoq. Naalakkersuisulli suliniutaasinnaasunut isumaqataannginnerat partiip maluginiaraa, illuatungiliuttunit oqaatigineqarpoq.
Naalakkersuisut isornartorsiorai
- Oqarluartaarummut ”Namminiilivinnissamut aqqutaani” aputaajaatit artugaannik niffakulersuineq ajornartorsiutit aaqqiiviginagit ingerlatsineruvoq, partii isornartorsiuivoq.
Naleqqap akileraartarnermut aaqqissuusseqqinnissamut isumaqatiginninniarnermit peqataajunnaarnera taamatullu isornartorsiuinera pillugu aningaasaqarnermut akileraartarnermullu Naalakkersuisoq, Erik Jensen oqaaseqartinniarlugu Sermitsiaq.AG sulissuteqarpoq.