Akileraartarnermut Aqutsisoqarfiup 6 mio. kr.-t inuttassaarukkai
Innuttaasut 1.400-t missaanniittut aningaaserivimmi kontumik normuannik Akileraartarnermut Aqutsisoqarfimmut ilisimatitsissuteqarsimanngillat. Innuttaasut taakku Akileraartarnermut Aqutsisoqarfimmit seks millioner koruunit missaanniittunik pissaqarput.
Immaqa illit seks millioner koruuninik pineqartunik iluaquteqarsinnaasut ilagaatsit?
Akileraartarnermut Aqutsisoqarfiup ukiup siulianit akileraarutinit utertoorutissat 6 millioner koruunit missaanniittut tunniunniarlugit aningaaserivimmi kontut normui 1.400-t amigaatigai. Akileraartarnermut Aqutsisoqarfik innuttaasut ataasiakkaat aningaaserivimmi konto normuannik pissarsereeruni aatsaat ikisisinnaalluni ilisimatitsissutigaa.
-Aningaaserivimmi paasissutissat eqqortut Akileraartarnermut Aqutsisoqarfimmit pigineqarnissaat illit innuttaasutut qulakkeertussaavat. Sullissivimmi kontup assilinerani pissaqartutit takusinnaagukku immersugassaq immersussavat Akileraartarnermullu Aqutsisoqarfimmut nassiullugu. Matuma kingorna Akileraartarnermut Aqutsisoqarfik aningaaserivimmi kontumut ikisisinnaassaaq, aqutsisoqarfik tusagassiorfinnut nalunaaruteqarluni allappoq.
Akiitsunnut tunngatillugu ikiorneqarsinnaavutit
Pisortanut akiitsunut, assersuutigalugu meeqqanut akilersuutinut akilerneqanngitsunut, eqqaavilerinermut akiligassanut, akileraarutissat sinnerinut, atuagaateqarfimmut akiligassanut imaluunniit innaallagissamut/imermut akiligassaqaruit, akilerneqarnissaannut ikiorserneqarsinnaavutit, Akileraartarnermut Aqutisoqarfik allappoq.
-Akileraartarnermut Aqutsisoqarfik pisortat innuttaasunit suliffeqarfinnillu pissaannik akiliisitsiniartarnermik suliaqartarpoq aammalu Qaqortumi, Nuummi, Maniitsumi, Sisimiuni Ilulissanilu sulisoqarluni. Taamaammat innuttaasut suliffeqarfiillu pisortanut akiitsut akilernissaannut toqqissillutik ikiorneqarlutillu ilitsersorneqarsinnaapput, aqutsisoqarfimmit ilisimatitsissutigineqarpoq.
Kontup assilinerani paasissutissaatitit tamaasa tunniussimanerlugit Sullissivik.gl-imi takusinnaavatit.