Akileraarutip allannguutaa nammineq naatsorsoruk
Naalakkersuisut 2013-imut aningaasanut inatsisissatut siunnersuutaat Maliina Abelsenip saqqummiuppaa
Aningaasaqarnermut Naalakkersuisup Maliina Abelsenip, Inuit Ataqatigiit, pingasunngormat ualikkut Naalakkersuisut 2013-imut aningaasanut inatsisissatut siunnersuutaat saqqummiuppaa, sisamanngormallu ualikkut inatsisissatut siunnersuutit pingasut saqqummiullugit, akileraarutit appartinneqarneranni annaasassanik 71,8 millioner koruuninik matussutissiisussat.
Inatsisartullu ukiakkut ataatsimiinneranni ullut ataatsimiiffiit taakkua marluk imminnut attuumassutilerujussuupput.
Maliina Abelsenip aningaasanut inatsisissatut siunnersuutip ilaatut siunnersuutigaa nuna tamakkerlugu akileraarut 1 procentimik appartinneqassasoq, tamannalu matussutissinneqassaaq utaqqiisaagallartumik inissiat akileraarusernerisigut, avataani qaleralittat akitsuusernerisigut, aammalu biilit oqimaatsut akitsuusernerisigut, kiisalu nammineerluni nalunaarsuiffimmi ilanngaatit arlallit allanngortinnerisigut.
- Ilinniagaqarneq sulinerlu akilersinnaasapput, Maliina Abelsen akileraarutit allanngortinnerisa tunuliaqutaat pillugu oqarpoq.
Amerlanerpaat iluaqutigissavaat
Innuttaasunut ataasiakkaanut ajornakusoorsinnaavoq nalilissallugu allannguineq aningaasanngorlugu qanoq kinguneqassanersoq.
Taamaattumik Akileraartarnermut Aqutsisoqarfik https://aka.nanoq.gl-imi sullissivimmik "nammineq toorsigit" sanasimavoq, tassanilu paasissutissaatitit allariarlugit akileraarutit allanngortinnerisa kinguneqaataa naatsorsorsinnaavat.
Aningaasaqarnermut Naalakkersuisoqarfimmit kisitsisit takutippaat 2013-imi Naalakkersuisut akileraarutinik allanngortitsinerat akileraartartut 36.00-it iluaqutigissagaat, akileraartartut 1.000 inorlugit amerlassusillit annaasaqassasut.