Akiligassiineq, anori ikittaartullu tungujortut: Politiit nakkutilliimmata Sermitsiaq.AG ilaasuuvoq
Nuummi politiit tallimanngornermi nakkutilliingamik biilinik arlalinnik unitsitsipput. Akunneq ataaseq affaalu ingerlaarnermi biilit pingasut akiligassinneqarput. Sermitsiaq.AG-mi tusagassiortoq politiit biiliini ilaasuulluni malinnaavoq.
Nuummi politeeqarfimmit politiit biilii tallimanngornermi nal. 9.15 aallarmata suli sila taarpoq.
Politiit Knud Madsen aamma Nukannguaq Lennert Nuummi tallimanngornermi ullaap tungaani aqqusinermi angallannermi nakkutilliimmata Sermitsiaq.AG peqataavoq.
Kalaallit Nunaata Politiivisa aqqusinermi angallattunik nakkutilliinissartik pillugu tusagassiorfinnut nalunaaruteqareerput. Knud Madsenillu neriuutigaa aqqusinermi angallannermi mianersornissaq eqqumaffigineqartoq. Taassuma tusarsimavaa biilileriffiit nalunaaruteqartoqareernerani ulapingaatsiarsimasut.
Knud Madsenip ingerlaarfissaq suussanersoq siumoortumik aalajangersimanngilaa. Politiit biiliili siullermik Qinngorput tungaanut ingerlappai.
Ajutoortoqarujussuartoq
Akiligassiinissaq kisimi pineqanngitsoq, Knud Madsen nassuiaavoq. Aqqusinermili angallannermi sillimaniarnermut tunngatillugu biilit atortuisa ajunnginnissaat aamma qulakkeerneqartariaqarpoq:
- Aputeqartinnagu aqquserngit ingerlaarfigalugit taartorujussuusarput. Aporsisoortoqarnissaanut aarlerinaat taamaasilluni annertunerulertarpoq, oqarpoq eqqaallugulu siorna aporsisoqarnerani arnaq ajunaarsimasoq.
- Aqqunartiternerminit taanna ajunaarpoq. Aquttoq takusinnaasimanngilaa taarnera pissutigalugu, oqarpoq.
Nuup illoqarfiata ilaani Qinngutsinni, aqquserngup nerngallaani siullermi Qarsup tungaanut ingerlasumi politiit biiliisa ikittaartartui tungujortut siullermeerlutik ikinneqarput. Biilit assartuutit saavani qullia ataaseq akornuteqarpoq.
- Biilit tunuini kingaallannermi qulli ikittussaq aamma ikittanngilaq, Nukannguaq Lennert maluginiakkaminik oqarpoq.
Unipiloorneq, aqquserngullu qeqqaannaatigut utimut saanneq
Aquttoq 500 koruunimik akiligassitsittoq Knud Madsen oqaluttuarpoq. Taassuma unnerluussisussaatitaanermut allakkiaq immersorpaa.
Biilit assartuutit aquttua nassuiaasimavoq biilit qulliisa iluarsinissaat sulissutigisimagaluarlugu. Biilillu assartuutit qullii iluarsitissallugit neriorsuereermat biilit ingerlateqqinneqarput.
Politiit biilii nakkutilliisut allat miiterit 100-kkaat tikillugit ungasinngisaanni aamma uninngapput.
- Una unitsereerassiuk, politiit radioatigut aperisoqarpoq.
Nukannguaq Lennert uppernarsaavoq unitsinneqareersimasoq.
Sila qaamanerulerpoq biilillu radioatigut Let's get down, let's get down to business tusarnaajutigalugu illoqarfiup tungaanut politiit biilerput. Eqqissisimaarnerulernerli tassanngaannartumik taamaateriasaarpoq, Knud Madsenimmi biilit saavani qulliit akornuteqartut ingerlanneqartut takuai, biilinilu unikaallatsipilooriarlugit aqquserngup qeqqaannaatigut illuanut sanguvoq biilillu akornuteqartut unitsikkiartorlugit.
Qulliit saavi kasuttulaarai
Politiit biiliisa nilliasaataat aallartinneqarpoq, politiillu biilii sukkatsipput. Kofoeds Skolep eqqaani sanasup biilini unitsippai. Biilit silataanni politiit nikorfaqatigigamigit, sanasoq ussersungaatsiarpoq.
Politiit uninnganeranni biilit qernertut, tunorlermi qullermik akornuteqartut arriitsuannguamik saneqqupput. Pissutsit qanoq inneri maliinnarlugit Sermitsiaq.AG-mi tusagassiortup politiit biiliit aallartingajalluinnarpai unitsitsiniarluni, politiilli biiliini tunuani issiaannassalluni aalajangerluni.
Politiit biiliinut ikeqqereeramik Nukannguaq Lennert nassuiaavoq biilinik aquttoq nassuiaasimagaluartoq biilit qullii akornuteqannginnerarlugit.
- Qullini kasuttulaaramigit aamma qullia iluarsivoq, Nukannguaq Lennert oqarpoq illarlunilu.
- Pissusissamisulli ajoquteqanngittussaagaluarpoq, Knud Madsen oqarpoq. Taanna illoqarfiup qeqqata tungaanut ingerlaarpoq, imersiniassalluni. Biilit qullii akornuteqartut nakkutigineqaqqissapput.
Upperiumanngikkaa
Biilit qulliminnik ajoquteqartut, Nuuk Centerip eqqaatigut saneqqupput. Lastianniipporlu qimmeq. Politiit unitsitsiniarlutik aallarsarput. Aquttorli akiligassinneqanngilaq.
Qimmerli biilit iluanut ikineqassasoq, Nukannguaq Lennert aquttumut qinnuiginnippoq. Anorlerpoq, silallu tarrajunnerani biilit orfaaqqajaapput.
Piffissaq sivisunngitsoq qaangiutiinnartoq sanasut biilii aamma takuneqarput. Aquttoq seqerneqartilluni qaamasartumik atoraluarpoq, biiliisali qullii ajorput. Aquttup siullermik upperiumanngikkaluarpaa. Biililli saavani qulliit ajoquteqarneri Nukannguaq Lennertip takutimmagit, akiligassaq 500 koruuniusoq assortorneqarani tiguiannarneqartariaqarpoq.
Sermitsiaq.AG-p tusagassiortua nal. 10.45 nutaarsiassaqartitsiviup silataanut apuunneqarpoq. Taanna akunnerit aappaa avillugu ingerlaaqataasimavoq. Ingerlaarnermilu sisamanik unitsitsisoqarpoq, pingasunillu akiligassiisoqarluni.
- Naatsorsuutigisatsitut ingerlavoq, Knud Madsen nassuiaavoq.
Nukannguaq Lennert anngaavoq.
Politiit marluk akunnialunni suli nakkutilliissapput, unitsitsinerillu pillugit nalunaarusiornerit politeeqarfimmi ualimut suliarissallugit.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...