Akisuunik inissialiorniarneq isornartorsiorneqarpoq
Nuummi Niels Hammekenip Aqqutaani villanik sanaartornissamik pilersaarut pillugu tusarniaanerup nalaani sanilerisassat arlallit akerliliipput.
Sanaartornermik ingerlatsivik EMJ Atcon Nuummi Niels Hammekenip Aqqutaata isuani illunik qulinik nutaanik sanaartornissamik pilersaaruteqarpoq, illullu nutaat eqqaanni sineriak atuarlugu aqquserngup tallinissaa pilersaarutaalluni.
Illut nutaat akisuut ilaqutariinnut ataasiinnarnut inissiat akisooqarfiit nalaanni sanaartorneqassapput. 165 kvadratmeterit 235-llu akornanni angissuseqassapput.
Suliniut tusarniaassutigineqarpoq, sapaatillu-akunnerani matumani Kommuneqarfik Sermersuumi Illoqarfiit Ineriartortinneqarnissaannut Sanaartornissamullu Ataatsimiititaliap suliniut qanoq ingerlanneqassanersoq aalajangiiffigissavaa.
Suliniut piumasaqaatinik arlalinnik ilaqartoq akuerineqassasoq kommunimi ingerlatsiviup inassuteqaatigaa, suliniulli arlalinnit, ingammik sanilinit, akerliliissutigineqarsimasoq, aammali Namminersorlutik Oqartussanit isornartorsiorneqarsimasoq, suliassamik saqqummiussinermi atuarneqarsinnaavoq.
Tamanna pillugu piffissami tusarniaaffiusumi akissutit 13-it tiguneqarput, atsiornernillu katillugit 55-inik katersisoqarluni.
Atorluaanissap procentinngorlugu annertusitinneqarnissaanik Naalakkersuisoqarfik inassuteqaateqarpoq
Ingerlatsiviup isumakuluutit ukununnga immikkoortiterpai:
- Sukisaarsarfittut pingaartinneqartut, uumasut innuttaasullu atuinerat ilanngullugit
- Aqqusineqarnermut tunngasut, pingaartumik sanaartornerup nalaani
- Nuup alliartuinnarneranik eqiterutitsinerlu pillugit nalinginnaasumik ernumassuteqarneq
- Ingerlatsiviup pilersaarutitut qinnuteqaammik suliaqarneranik isornartorsiuineq
Inissiaq ataaseq agguaqatigiissillugu 192 m2-inik angissuseqartoq sanaartorfigineqartussatut siunnersuutigineqartoq, Namminersorlutik Oqartussat Ineqarnermut Atassuteqaatinullu Naalakkersuisoqarfiata eqqaavaa. Inissiat agguaqatigiissillugu angissusiat affaannanngortinneqarpat, inissiat marloriaammik amerlanerusut sanaartorneqarsinnaasut Naalakkersuisoqarfik allappoq:
- Nuummi inissialiornissamut nunaminertat amigaatigineqartut nalinginnaasumik ilisimaneqarpoq, naallu ukiuni makkunani annertoorujussuarmik inissialiortitertoqaraluartoq, Nuummi utaqqisut allattorsimaffianiittut qangalili 2.000-nngoreersimanerisa takutippaat inissianik ujartuineq malinnaaffigiuminaatsuusoq. Mianerisassat taakkua eqqarsaatigalugit nunaminertamik atorluaanissaq procentinngorlugu annertuumik annertusitinneqassasoq inassutigineqarpoq.
Illussanik titartaanermik pitsaasumik tunniussaqassasoq
Ingerlatsivimmiilli nalilerneqarpoq "pilersaarutitut siunnersuut illussanik titartaanermik pitsaasumik tunniussaqassasoq, illoqarfiup immikkoortuanut najugaqartunullu nuannaarutaasussanik. Naak pilersaarummi quassugaq sukisaarsarfigissallugu ornigineqarluartoq ilanngunneqaraluartoq, sineriak atuarlugu aqqutip ingerlateqqinneratigut illoqarfiup ilaa ataqatigiinnerusoq anguneqassaaq, sukisaarsarfittut imaq sinerlugu sammisassat tikikkuminarnerulerlutik."
Ingerlatsivik suliniummi suliniuteqaqqinnermi akuerineqarsinnaasunik arlalinnik nangaassuteqarpoq, sumiiffimmi sineriak atuarlugu aqqusinniortoqassasoq, aamma sanaartornerup nalaani Niels Hammekenip Aqqutaani angallanneq najugaqartullu oqilisaaffiginiarlugit Nuukullammit suliartortarfissamik aqqusinniortoqarsinnaanersoq misissorneqassasoq, ilaatigut piumasarineqarluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...