Akit qaffakkiartornerat ajornartoortitsisoq: Naalakkersuisooqatigiit partiivisa piumasartik pivaat - ikiorsiissutit piariilerput
Mariane Paviasen (IA) piumasaqarpoq inuussutissarsiornermut aatsitassanullu ataatsimiititaliami akit qaffakkaluttuinnarnerat RAL-illu assartukkat akiinik qaffaaniarnera pillugu ataatsimiissutigineqassasoq, tamatumalu saniatigut Doris J. Jensen (S) piumasaqarpoq Inatsisartut ilaqutariinnut peqqissutsimullu ataatsimiititaliaat naalakkersuisumik siunersiuisasut. Aningaasaqarnermut Naalakkersuisoq Erik Jensen (S) neriorsuivoq ikiorsiissuteqartoqassasoq.
Akit qaffakkiartuinnavinnerat tunngavigalugu Naalakkersuisut qanoq iliuuseqarnerat pillugu piumasaqaatit sakkortusiartorput. Maannalu IA-p aamma Siumup politikkikkut oqaaseqartartuisa iliuuseqaqqusilluni kaammattuineq iliuuseqaqqusillunilu oqaaqqissaarineq naammagiunnaarpaat.
Taakkumi marluullutik piumasaqarput Inatsisartut ataatsimiititaliaat pisumut attuumassuteqartut iliuuseqassasut isummersorfigissagaallu akit qaffakkaluttuinnarnerat, ullummi tamaasa akit qaffakkiartornerata ajornartoortitsinera tigussaasumik takussutissarisai amerliartormata, pingaartumillu isertitakinnerusut inuuniarnerminni ajornartorsiornerat ersarissigaluttuinnarmat.
Inatsisartut ataatsimiititaliaat iliuuseqassapput
Mariane Paviasen (IA) maanna piumasaqarpoq Inatsisartut inuussutissarsiornermut aatsitassanullu ataatsimiititaliaat ataatsimiisinneqassasoq, tassanilu akit qaffakkiartuinnavinnerat aammalu RAL-ip assartukkanut akigititaminik qaffaaniarnera isummersorfigineqarlutillu qanoq iliortoqarnissaanik tikkuussisoqassasoq:
- Akit qaffakkaluttuinnarnerinut tunngasumik sapaatip akunnerata siuliani saqqimmiivunga IA-p fb-atigut saqqummiunneqarpoq, manna tikillugu suliaqartoqarneranik tusagaqanngilanga taamaammat tallimanngormat piumasaraara inuussutissarsiornermi ataatsimiititaliami killiffik eqqartortariaqaripput, minnerunngitsumik RAL-ip akinik qaffaalernerisa kingunissai pisiassat akitsornerulertussaaneri qanoq iliuuseqarfigisinnaanersut eqqartorusullugu, Mariane Paviasen nammineq FB-mini allappoq.
Doris J. Jensen (S) piumasaqarpoq ilaqutariinnermut peqqissutsimullu ataatsimiititaliaq isumaginninnermut, ilaqutariinnut, suliffeqarnermut nunamullu namminermut Naalakkersuisoq, Jess Svane (S) siunersiorneqarnissaminut aggersarneqassasoq, pingaartumik paasiniarneqarluni aalisartut piniartullu Qaanaamiittut nunaqarfittaaniittullu ikiorneqarnissaannik pilersaaruteqartoqarnersoq, aammalu akit innuttaasunut artukkiigaluttuinnarnerat aallaavigalugu ikiorsiissutissanik pilersitsinissamik pilersaaruteqartoqarnersoq paasisaqarfigineqarniassammat.
Aningaasaqarnermut Naalakkersuisoq: Ikiorsiissutit piariilivipput
Aningaasaqarnermut Naalakkersuisoq, Erik Jensen (S) allaaserisap saqqumminngitsiarnerani oqaaseqartissallugu Sermitsiaq.AG-mit iluatsipparput.
Erik Jensen oqaluttuarpoq Naalakkersuisut piffissami matumani ulapputtut tigussaasumik ikiorsiisoqarnissaa piareersarlugu.
Taamaattorli piffissap imaalilerani kikkunnut, qanoq iliorluni aammalu qanoq annertutigisumik ikiorsiissuteqartoqassanersoq:
- Naalakkersuisunit assut ulapputigaarput ikiorsiissutissat naammassiniarlugit, taamaalilluta innuttaasunut eqqugaanerpaanut aammalu umiiffinni aalajangersimasuni inuussutissarsiortunut eqqornerlugaasunut ikiorsiissutissanik pilersitsiniarluta, Erik Jensen oqaluttuarpoq nangillunilu:
- Taamaattorli soorunami Inatsisartut aningaasaqarnermut ataatsimiititaliaanut qinnuteqaqqaassaagut akuersippatalu ikiorsiissutissat atuutsinneqalissapput, naatsorsuutigaaralu ulluni qaninnerni suliaq naammassineqarsinnaajumaartoq, ikiorsiissutit aningaasalersorneqarnissaat pillugu akuersissummik pisimaleriarutta, aningaasaqarnermut Naalakkersuisoq Erik Jensen (S) Sermitsiaq.AG-mut naggataatigut oqarpoq.