Akitsinnguaq aningaasanut siulittaasunngorpoq
Ilaasortat nutaat amerlasuut Inatsisartut ataatsimiititaliaanni pissaaneqarnerpaani ilaasortanngortinneqarput. Katillugit 20-nit sisamaannaat siusinnerusukkut inatsisartuni sulinermik misilittagaqarput.
Inatsisartut ataatsimiititaliaanni pingaarnerpaami, aningaasanut ataatsimiititaliami, siulittaasutut Inatsisartut arfininngormat toqqarpaat 38-nik ukiulik inatsisartunut qinigaarlaaq Akitsinnguaq Olsen, Inuit Ataqatigiit. IA-meersut allat marluk ilaasortaaqatigissavai, Naaja Nathanielsen, siulittaasup tulliatut inissittoq, aamma Hans Aronsen.
Aningaasanut ataatsimiititaliami ilaasortat allat marluk tassaapput Niels Thomsen, Demokraatit, aamma ilaasortatoqaq Per Berthelsen, Siumut.
Ataatsimiititaliaq pingaarutilik alla tassaavoq kukkunersiuinermut ataatsimiititaliaq. Tassani Atassummeersoq Knud Kristiansen siulittaasunngorpoq, taannalu qinigaaffimmi siuliani sinniisutut Inatsisartunut ilaasortaavoq.
Kukkunersiuinermut ataatsimiititaliami ilaasortat allat tassaapput Anders Olsen (IA), siulittaasup tullia, Jane Petersen (IA), Andreas Uldum (D) qinigaaqqittorlu Kristian Jeremiassen (S), qinigaaffimmi kingullermi Atassut sinnerlugu ilaasortaasimasoq.
Nunanut allanut isumannaallisaanermullu ataatsimiititaliami siulittaasutut toqqarneqarpoq Hans Aronsen (IA). Ataatsimiititaliami IA-p ilaasortaatitai allat marluk ataatsimiititaliami allami aamma ilaasortaapput, Jane Petersen, siulittaasup tulliatut inissittoq, aamma Naaja Nathanielsen. Demokraatinit ilaasortanngorpoq Justus Hansen Siumumillu ilaasortanngorluni Aleqa Hammond.
Inatsisinut ataatsimiititaliami Justus Hansen (D) siulittaasutut toqqarneqarpoq, ilaasortatoqaq Olga P. Berthelsen (IA) siulittaasup tulliatut toqqarneqarpoq, ilaasortallu sinneri tassaapput Aqqaluaq Egede (IA), Akitsinnguaq Olsen (IA) aamma Aleqa Hammond (S).