Akitsinnguaq Janelu COP15-imi
Inatsisartut immikkut aallartitaqarput sila pillugu Københavnimi FN-ip ataatsimeersuartitsinerani. Naalakkersuisooqatigiit illuatungiliuttullu tamarmik sinniisoqarput.
Inatsisartut eqqissisimatitsinermut avatangiisinullu ataatsimiititaliami ilaasortat marluk COP15-imut peqataassapput.
Akitsinnguaq Olsen, Siumut, piffissap siulliup ilaanut peqataassaaq, Jane Petersen, Inuit Ataqatigiit, ullut kingulliit sisamat peqataassalluni. Taamaalilluni Inatsisartuni naalakkersuisuutitaqartut illuatungiliuttullu tamarmik ataatsimeersuarnermut pingaarutilimmut peqataatitaqassapput.
Eqqissisimatitsinermut avatangiisinullu ataatsimiititaliap peqataatitassani qinnuigisimavai piffissami sumiiffinnilu silap pissusiisa malunnartumik allanngoriartorfigisaanni inuussutissarsiornikkut siuarsaanerup attatiinnarneqarsinnaaneranut ineriartortinneqarsinnaaneranullu atatillugu oqallinnerit, paasissutissat oqaaseqaatillu pingaarteqqullugit.
Tamatuma saniatigut silap pissusiata allanngoriartorneranut atatillugu nioqqutissanik pilersorneqarneq tamatumanilu ajornartorsiutaasinnaasut ataatsimiititaliap soqutigai.
Isumaqatigiinniarniviit saniatigut nunatsinneersut pisorpassuarnut allanut peqataanissaminnut aamma periarfissaqassapput. Akitsinnguaq Olsen aamma Jane Petersen Folketingip avatangiisinut pilersaarusiornermullu ataatsimiititaliaat ilanngullugu, peqataasut 40-t missaat ilagalugit taakkununnga aaqqissussaasimasunut pisussanut taamaalillutik aamma peqataanissaminnut periarfissaqassapput.
Inatsisartunut ilaasortat marluk taamatuttaaq ingerlaavartumik Naalakkersuisut aallartitaannik, Kuupik Kleistimit siulersorneqartunik, oqaloqateqartassapput, Inatsisartut allattoqarfiat nalunaarpoq.
COP15 piffissami decembarip 7-anniit 18-iannut ingerlanneqassaaq, piffissanullu marlunnut avinneqarsimalluni, siulleq decembarip 7-anniit 12-annut, aappaalu decembarip 14-ianniit 18-iannut.