Akitsuutit: Imeruersaatit puuisa akitsuutaat neqit akitsuutaarutsinnissaannut Naalakkersuisut akuliukkaat
Siunnersuut neqit eqqussukkat akitsuutaasa peerneqarnissaanik imaqartoq, partiillu tamarmik isumaqataaffigisaat, piffissaq kingullerpaaq atorlugu Naalakkersuisunit atorneqarpoq akitsuummut allarujussuarmut saatillugu, tassalu imeruersaatit akitsuutaasa allanngortinneqarnissaannut atoramikku. Tamanna Inatsisartuni sakkortuumik oqallinnermik malitseqarpoq.
Naalakkersuisut akitsuutitigut aaqqiissutissarsiornissamik periarfissartik Inatsisartut ataatsimiinnerat naatinnagu atorpaat.
Partiit tamakkerlutik isumaqatigiissutigisaat, tassalu puulukit nersussuillu akitsuutaasa ataavartumik atorunnaarsinneqarnissaannik siunnersuut, tassanngaannaq akuneqarpoq imeruersaatit akitsuutai pillugit allannnguutissatut siunnersuummik, taanna Naalakkersuisunit tunngavilerneqarpoq, "nioqqutissanik eqqussuineq annissuinerlu pillugit Inatsisartut inatsisaata allannguutaasa malitsigisaannik allannguineq, innersuussutigineqarlunilu aningaasanut inatsisissaq pillugu isumaqatigiissut.
Tamanna Demokraatinik assut aalassatsitsivoq, tassami Demokraatit neqit akitsuutaannik atorunnaarsitsinissamik siunnersuuteqartuupput, taannalu qitiutillugu suliaq ingerlanneqartussaagaluarluni. Taanna partiit tamarmik akuersaassallugu piareersimanikuugaluarput, taamaattorli pinngitsaalineqartutut misigisimallutik neqinut akitsuutit peerneqavinnissaannut akuersisussaagaluarlutik taaseqataannginnerannik kinguneqartinneqarluni.
Taamatuttaaq Naleraq, aningaasanut inatsisissamut isumaqatigiissusioqataanikuugaluarluni assut aalassassimaaqataavoq iliuuseriniarneqartumullu akerlilersuilluni. Tamatuma pissutissaqalersippaa apeqqusissallugu Naalakkersuisut aningaasanut inatsisissatut siunnersuummik innersuussigaluarlutik partiit isumaqatigiinniaqatigisatik ersarissuliorfigisimannginneraat neqit akitsuutaasa peerneqavinnissaannut tunngatillugu imeruersaatit puuisa akitsuutaat taputartuunneqassamaartoq.
Aningaasanut inatsisissaq pillugu isumaqatigiissut sioqqullugu tusarniaasoqarpoq
Naalakkersuisut tassanngaannartumik neqit akitsuutaasa ataavartumik peerneqarnissaanik siunnersuummut allannguutissatut siunnersuutaat nalaatsornerunngitsoq takuneqarsinnaavoq, tassami Naalakkersuisut allannguutissatut siunnersuumminni erseqqissaatigaat piffissami 6. junimiit 4. juli ilanngullugu tusarniaasoqarsimasoq.
Tamaaakkaluartorli aningaasanut inatsisissaq pillugu isumaqatigiissut partiit peqataasut aatsaat atsiorpaat ulloq 9. november. Tammaattorli Naalakekrsuisut isumaqatigiissut taanna innersuussutigaat:
- Aningaasanut inatsimmik isumaqatiginninniarnernut atatillugu, Naalakkersuisut puunik utertitsisarnermik aaqqissuussinermi nutaami aningaasartuutit pisiniarfiit taamaalillunilu neriunartumik atuisut aningaasartuuteqarnerunissaat pinngitsoortinniarlugu allannguutissatut siunnersuummik saqqummiipput.
D: Innuttaasut 85 millioner koruuninik aallerfigineqalerput
Naak massa allannguutissatut siunnersuut aqqutigalugu Naalakkersuisut imeruersaatit akitsuutaannik appaanertut taagaluaraat, taamaakkaluartoq tamanna isumaqarpoq aappaagumiit, Nuuk Imeq matuneqarpat, nunatta karsianut 85 millioner koruunit missaat isertinneqartalissapput, tamannalu Demokraatit sakkortuumik naammaginngilaat.
- Matumani aallarniutigalugu oqaatigiumavarput puunut imeruersaatinik imalinnut akitsuutit siunnersuummut matumunnga, Inatsisartunit isumaqatigiiffiulluartumut, Naalakkersuisunit ilanngunneqariataarnerat assorsuaq kusanaammat. Tamat oqartussaaqataanerannik ataqqinnikkaanni nalinginnaasumik pisarnertut Naalakkersuisut siunnersuut Inatsisartunit pingasoriarlugu suliarineqartissimagaluarpassuk pitsaasimassagaluarpoq, Demokraatit ikinnerusussuteqarlutik oqaaseqaamminni erseqqissaapput.
Naalakkersuisut oqaaseqartinnissaat Sermitsiaq.AG-mit sulissutigaarput.