Akuerineqarani atuanngittarneq ukioqqortusiartornermi qaffakkiartortartoq
Qeqqata Kommuniani meeqqat atuarfiini atuartut akuerisaanngitsumik atuanngitsuukulasarnerata ikilisinnissaat suli ukkatarineqartariaqartoq, Qeqqata Kommuniani meeqqat atuarfiini pitsaassuseq pillugu nalunaarummi paasinarsivoq
Atuartut angajulliit akuerisaanngitsumik atuanngitsoortarput. Naak atuartut atuanngitsuukulasarnerata annikillisinneqarnissaat ukkatarineqarsimagaluartoq, Qeqqata Kommuniani meeqqat atuarfiini suli ajornartorsiutaavoq. Atuanngitsoornerit atuarfinni atuartuni angajullerni takussaanerpaavoq.
Atuarfiit akuerisaanngitsumik peqanngittarnerit apparsarnissaat ukkatarisariaqarpaat, tassani angajoqqaat atuarfimmut atuanngitsoornermut peqqutaasumik nalunaarsimanngitsut pineqarput, nalunaarussiami allassimavoq.
Ukioq kingullermiit pitsaassutsimut nalunaarusiamut sanilliullugu illoqarfinni atuarfinni immikkut atuartitsivinni akuerineqaratik atuanngitsoortarnerit annikillisimapput. Illoqarfiit atuarfiini tamani akuerineqarlutik atuanngittartut nalinginnaasumik qaffasillutik. Nunaqarfinni akuerineqarani atuanngitsoortarnerit annikinnerpaallutik.
Atuartut minnerit aamma atuanngitsuukulasut
Atuartuuniaraanni piffissaq eqqorlugu atuariartortassasut, atualeqqaaraanni paasititsiniutigineqartarpoq. Nalunaarusiamili paasinarsivoq atuartuni minnerni atuanngitsoortarnerit aamma amerlasut, borgmesterimik ernumasitsilersumik.
- Akuerineqaranilu atuanngitsoortarnerit allaat aamma klasseni mikinerni qaffasissumik
inissisimanerat isumaqarpunga assorujussuaq ernumanartoq, tamatumalu suli ukkatarineqarnissaa
ilanngullugu piumasaraarput, borgmesteri naggasiivoq.
Pitsaassutsimut nalunaarusiaq ukioq kingullermut sanilliullugu akuerineqarani atuanngittarnerit annikillilaarsimapput. Tamanna annerusumik Atuarfik Kilaaseeqqami atuuppoq.
Atuarfiit 5 % sinnerlugu inissisimasut ilinniartitsisut atuartullu peqanngittarnerannik apparsaaniassasut, nalunaarummi ilaatigut allassimavoq.
COVID-19 peqqutaaqataasinnaasoq
COVID-19 nuna tamakkerlugu 2022-mi tuniluunnikuummat atuartut ilinniartitsisullu peqanngittarnerannut sunniuteqaqataasimasinnaasoq aamma naggataatigut allassimavoq.