Akuerineqartoq: Naalakkersuisut nutaamik politeeqarfiliortoqarnissaanik qinnuteqassapput
Politiit siunnerusukkut tamanna pisariaqanngitsoq nalilersimavaat, Naalakkersuisulli Kangaatsiami politeeqarfiliortoqarnissaanik qinnuteqassasut Inatsisartunit aalajangerneqarpoq.
Siunnersuut Inatsisartunit sisamanngornermi ilalerneqarpoq, taamaalilluni Naalakkersuisut Kangaatsiami sapinngisamik piaarnerpaamik politeeqarfiliortoqarnissaa eqqarsaatigalugu Danmarkimi naalakkersuisunut saaffiginnissuteqarnissamut peqquneqarlutik.
Siunnersuuteqartoq Inatsisartuni ilaasortaq Hans Aronsen (IA) naammagisimaarinnilluinnarpoq:
- Kangaatsiami politeeqarfeqarlernissaa piffissanngorpoq, pisunik misigisaqaraangatta pisariaqarfiani saaffigisatagassatsinnik, Hans Aronsen oqaluttarfimmiit oqarpoq.
2021-mi septembarip qaammataani sakkortuumik pisoqareersoq illoqarfimmi politeeqarfeqarnissaa pillugu apeqqut saqqummiunneqarpoq. Taamanikkut angut peqqarniitsumik persuttaasimavoq, inuillu arlallit ajoqusersimallutik, taamanikkut pisup malitsigisaanik folketingimi ilaasortap Aaja Chemintz Larsenip (IA) illoqarfiup nammineq politeeqarfeqalernissaa kissaatigisimavaa.
Politiit Aasiaanniit orniguttartut
Kommuni Qeqertalimmi borgmesteri Ane Hansen (IA) isumaqataalluni aamma taamatut piumasaqarsimavoq, borgmesterip taamanikkut oqaatigaa, illoqarfimmi ilaannikkooriarluni ilungersunarluinnartunik pisoqartartoq, politeeqartuuppallu politiit iluaqutaasassangaluarlutik.
Ullumikkut illoqarfimmi kommunefogedeqarpoq, politiillu pisariaqartinneqaraangata, politiit Aasianniit orniguttarlutik.
Inatsisartunilu politikkerit pissutsit pillugit naammaginninnginnertik takutippaat, inatsisartuni partiini tamani ilaasortat siunnersuummut akuersillutik taasimmata.
Siunnersuutip akuerineqannginnerani suliaq Inatsiseqarnermut ataatsimiititaliamit suliarineqarsimavoq. Ataatsimiititaliap politimesteri Bjørn Tegner Bay paasissutissiinertalimmik ataatsimeeqatigisimavaa, tassani politimesterip Kangaatsiami pissutsit erseqqinnerusumik nassuiaatigisimallugit.
1,5 udrykning om året
Politimesterip ilaatigut ataatsimiititaliamut ilisimatitsissutigisimavaa, ukiut kingulliit tallimat ingerlaneranni Kangaatsiami ukiumut unnerluussinerit 16-iusarsimasut. Ukiumullu suliat 1,5-imik amerlassusillit politiinik aggertitsisariaqarfiusarsimasut.
Taamanikkut Danmarkimi inatsisinik atuutsitsinermut ministeriusup Nick Hækkerupip allakkatigut akissuteqarnermini politiit naliliisimanera innersuussutigisimavaa, tassani nalilerneqarsimammat illoqarfimmi kommunefogedeqarneq naammattoq.
Hans Aronsenip sisamanngornermi oqaatigaa, nammineq kommunefogediusimalluni, suliamullu atatillugu politiit naliliisimanerat tupaallaatigisimallugu:
Aronsen: Sulinermi atugassarisitaasunik ilisimasanngillat
- Ukiuni arlaqartuni kommunefogediusimavunga, pisunullu assiginngitsunut aggersarneqartarsimallunga, politimesterillu nalunaarutaa tupaallaatigisimavara.
- Kommunefogedit sulinerannut atugassarititaasunik naalagaaffimmi oqartussat ilisimasaqannginnerat tupaallaatigaara, Hans Aronsen oqarpoq.
Naalakkersuisut Kangaatsiami politeeqarfeqalertoqarnissaa pillugu Danmarkimi naalakkersuisunik siornali oqaloqateqartarsimapput. Inatsisinik atuutsitsinermut ministerip tamanna itigartitsissutigisimavaa, Naalakkersuisulli suliamik maanna qaqitseqqipput:
- Inatsisinut Ataatsimiititaliap isumaqatigiissup siunnersuut akuersissutigaa, taamaammat tuaviornerpaamik Kangaatsiami marlunnik politiitut atorfilinnik sulisulerlugu politeeqarfiliortoqarnissaa noqqaassutigalugu, qallunaat naalakkersuisui saaffigissavakka, Inatsisinik Atuutsitsinermut Naalakkersuisoq Aqqaluaq B. Egede Inatsisartunut allakkatigut akissuteqarluni ilisimatitsivoq.